ការប្រឡងបញ្ចប់ កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត នៅមណ្ឌលសិក្សាពន្ធនាគារ

កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត (BEEP) បានរៀបចំការប្រឡងបញ្ចប់ នៅមណ្ឌលសិក្សាពន្ធនាគារ រាជធានីភ្នំពេញ មណ្ឌលយុវនីតិសម្បទា ខេត្តកណ្តាល សម័យប្រឡងចាប់ពីថ្ងៃទី៨ ដល់ថ្ងៃទី៩ ខែកក្កដា ឆ្នាំ២០២៤ ក្នុងនោះមានបេក្ខជនចូលរួមប្រឡងសរុប ៣៤នាក់ ស្រី ០០នាក់។

ក្រសួងអប់រំ យុវជន និងកីឡា បានឱ្យដឹងថា កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត (BEEP) បានគិតគូរយ៉ាងយកចិត្តទុកដាក់ដល់យុវជនជាក្រុមគោលដៅ ដែលមានយុវជនងាយរងគ្រោះ យុវជនដែលជាជនជាតិដើមភាគតិច និងយុវជនដែលមានពិការភាពជាដើម ដើម្បីផ្ដល់ឱកាសដល់យុវជនដែលបោះបង់ការសិក្សាកម្រិតមធ្យមសិក្សាបឋមភូមិ ទទួលបានវិញ្ញាបនបត្រសមមូល ក្នុងការបន្តសិក្សាបណ្ដុះបណ្ដាលជំនាញ។

សិស្សានុសិស្សដែលបានប្រឡងបញ្ចប់ទទួលបានសញ្ញាបត្រអាចបន្តការសិក្សាចុះឈ្មោះចូលរៀននៅក្រសួងការងារ និងបណ្ដុះបណ្ដាលវិជ្ជាជីវៈ (TVET) ឬវិទ្យាល័យបច្ចេកទេសទូទៅ នៃក្រសួងអប់រំ យុវជន និងកីឡា៕