ព័ត៌មានជាតិ

រដ្ឋមន្ត្រីសុខាភិបាល ណែនាំបុគ្គលិក នៃមន្ទីរពេទ្យបង្អែកអ្នកលឿង ត្រូវពង្រឹងក្រមសីលធម៌វិជ្ជាជីវៈផ្តល់សេវាជូនពលរដ្ឋប្រកបដោយគុណភាព

បានផុស

២ years មុន

នៅ

ថ្ងៃសុក្រ ២៦ កក្កដា ២០២៤

ដោយ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានធ្វើការលើកទឹកចិត្ត និងណែនាំដល់បុគ្គលិក នៃមន្ទីរពេទ្យបង្អែកអ្នកលឿងនៅខេត្តព្រៃវែង ត្រូវពង្រឹងក្រមសីលធម៌វិជ្ជាជីវៈ ដើម្បីផ្ដល់សេវាជូនប្រជាពលរដ្ឋប្រកបដោយគុណភាព និងប្រសិទ្ធភាពខ្ពស់។

នៅក្នុងដំណើរទស្សនកិច្ចពិនិត្យសេវាសាធារណៈ និងសួរសុខទុក្ខបុគ្គលិកសុខាភិបាល នៅមន្ទីរពេទ្យបង្អែកអ្នកលឿង ខេត្តព្រៃវែង នៅព្រឹកថ្ងៃទី ២៦ កក្កដានេះ លោករដ្ឋមន្ត្រី បានសំដែងនូវការកោតសរសើរជូនចំពោះមន្ត្រីសុខាភិបាល រួមទាំងអាជ្ញាធរ ដែលបានខិតខំប្រឹងប្រែងបម្រើផ្តល់ជូនសេវាថែទាំសុខភាពជូនប្រជាពលរដ្ឋប្រកបដោយស្មារតីទទួលខុសត្រូវ និងក្រមសីលធម៌វិជ្ជាជីវៈ។

ទន្ទឹមនឹងនេះ លោករដ្ឋមន្ត្រី បានណែនាំ និងលើកទឹកចិត្តដល់មន្ត្រីសុខាភិបាលទាំងអស់ សូមបង្កើនការយកចិត្តទុកដាក់បន្ថែមទៀត ពិសេសពង្រឹងក្រមសីលធម៌វិជ្ជាជីវៈ និងត្រូវបង្កើនសមត្ថភាពបន្ថែមទៀត តាមរយៈការបណ្ដុះបណ្ដាលលើផ្នែកសង្គ្រោះបន្ទាន់ ផ្នែកវះកាត់ និងការកត់ត្រា រក្សាទុកដាក់ឯកសារឱ្យបានត្រឹមត្រូវ ជាពិសេសការរៀបចំសម្ភារៈបរិក្ខារវេជ្ជសាស្ត្រ និងផ្នែករូបភាពវេជ្ជសាស្ត្រ ដោយធានាឱ្យបានការបម្រើ និងផ្តល់ជូនសេវាពិនិត្យថែទាំសុខភាពជូនប្រជាពលរដ្ឋ ប្រកបដោយគុណភាព ប្រសិទ្ធភាព សុវត្ថិភាព និងសមធម៌។

គួរបញ្ជាក់ថា មន្ទីរពេទ្យបង្អែកអ្នកលឿង ជាមន្ទីរពេទ្យបង្អែកកម្រិត ២ (CPA2) ស្ថិតក្នុងការិយាល័យសុខាភិបាលស្រុកប្រតិបត្តិពាមរក៍ ខេត្តព្រៃវែង ដែលមានបុគ្គលិកសរុបចំនួន ៦២ រូប បម្រើផ្តល់ជូនសេវាសាធារណៈផ្នែកជំងឺទូទៅ វះកាត់ សម្ភពរោគស្ត្រី ជំងឺមិនឆ្លងទឹកនោមផ្អែម លើសឈាម និងសង្គ្រោះបន្ទាន់៕

អត្ថបទ ៖ សំអឿន