ព័ត៌មានជាតិ

អ្នកនាំពាក្យ បង្ហាញព័ត៌មានបឋមពីផលប៉ះពាល់ជំនន់ទឹកភ្លៀង នៅស្រុកចិត្របុរី ខេត្តក្រចេះ

បានផុស

២ years មុន

នៅ

ថ្ងៃអង្គារ ១៧ កញ្ញា ២០២៤

ដោយ

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ១៧ កញ្ញា នេះថា ព័ត៌មានបឋមនៅព្រឹកថ្ងៃទី ១៧ កញ្ញានេះ ជំនន់ទឹកភ្លៀងបានបង្កឱ្យជន់លិចផ្ទះសម្បែងប្រជាពលរដ្ឋ ផ្លូវ សាលារៀន មណ្ឌលសុខភាព និងវត្តអារាម ស្ថិតនៅភូមិអញ្ចាញ ឃុំដារ ស្រុកចិត្របុរី ខេត្តក្រចេះ បន្ទាប់ពីមានភ្លៀងធ្លាក់មួយមេធំ និងពេញមួយយប់កាលពីយប់មិញ។

លោកបានបន្តថា នៅឃុំដារ មានភ្លៀងធ្លាក់ខ្លាំងចាប់ពីម៉ោង ១:០០-ម៉ោង ៤:០០ ភ្លឺ ថ្ងៃទី ១៧ ខែកញ្ញា ឆ្នាំ ២០២៤ ធ្វើឱ្យមានជំនន់ទឹកភ្លៀងលិចទីធ្លាវត្តដារ សាលាបឋមសិក្សាដារ មណ្ឌលសុខភាពដារ ជម្រៅ ១.៤០ ម៉ែត្រ ទំហំការខូចខាតមិនអាចវាយតម្លៃបាន។ ដោយឡែកស្ត្រីសម្រាលកូន ក្រុមការងារបានសម្រួលឱ្យស្នាក់នៅជាន់ទី ១ លិច និងហូរកាត់ផ្លូវ ១០ កន្លែង ប្រវែង ១ ២៥០ ម៉ែត្រ នៅភូមិអញ្ចាញ និងភូមិស្ទឹងស្វាយ លិចក្រោមផ្ទះអ្នកភូមិចំនួន ២០ ខ្នង ផ្ទះនៅភូមិអញ្ចាញ និងស្ទឹងស្វាយ។

លោកបានបន្តទៀតថា ចំណែកភូមិចំនួនបួននៅជាប់ព្រែកទេបានគឺភូមិម្រ៉ើមលិចផ្លូវ ប្រវែង ១ ៥០០ ម៉ែត្រ ភូមិតាងួនលិចផ្លូវប្រវែង ៣ ៥០០ ម៉ែត្រ ភូមិជួរជ្រៃលិចផ្លូវប្រវែង ១ ២០០ ម៉ែត្រ និងភូមិខ្នងពស់លិចផ្លូវប្រវែង ៦៥០ ម៉ែត្រ តែមិនប៉ះពាល់ដល់មនុស្ស និងសត្វទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក៏ដោយ អ្នកនាំពាក្យ បានបញ្ជាក់ថា ចំពោះផលប៉ះពាល់របស់ប្រជាពលរដ្ឋ ចំនួនគ្រួសារ និងចំនួនមនុស្ស នឹងជូនពេលក្រោយ។

យោងតាមក្រសួងធនធានទឹក និងឧតុនិយម បានបញ្ជាក់ថា កម្រិតកម្ពស់ទឹកទន្លេមេគង្គខេត្តក្រចេះ នៅព្រឹកថ្ងៃទី ១៧ ខែកញ្ញា ឆ្នាំ ២០២៤ នេះ មានកម្ពស់ ១៩,៨៤ ម៉ែត្រ (កើនឡើងកន្លះម៉ែត្រ ឬ ០,៥០ ម៉ែត្រ ធៀបនឹងថ្ងៃម្សិលមិញ) ខណៈកម្រិតកម្ពស់ទឹកប្រុងប្រយ័ត្ន គឺ ២២,០០ ម៉ែត្រ។ ខណៈព្យុះចំនួន ២ នឹងវាយប្រហារក្នុងពេលតែមួយ ដែលមានឥទ្ធិពលខ្លាំងជាងមុន ជះឥទ្ធិពលលើកម្ពុជាគឺ ព្យុះទី ១៣ ឈ្មោះ ប៊ីប៊ីនកា នៅមិនទាន់ថយឥទ្ធិពលនៅឡើយ តែនៅពេលនេះមានព្យុះទី ១៤ មួយទៀត ឈ្មោះ ពូលឡាសាន ដែលនឹងបង្កើនឥទ្ធិពលរួមគ្នាបន្តវាយប្រហារតាមបណ្ដាប្រទេសមួយចំនួន ហើយក្នុងនោះក៏មានប្រទេសកម្ពុជាផងដែរ៕

អត្ថបទ ៖ សំអឿន