កសិករនៅស្រុកបាណន់ម្នាក់ ទទួលផលពីផ្លែទៀបស្វិតខ្មែរ ដោយនឹកស្មានមិនដល់

ប្រភេទផ្លែទៀបស្វិត ត្រូវបានប្រជាពលរដ្ឋខ្មែរទូទៅស្គាល់ថា ជាប្រភេទពូជទៀបរបស់ខ្មែរ វាមានរស់ជាតិផ្អែមុតពេល​បកសំបកបរិភោគម្តងៗ ប្រឡាក់ដៃស្អិត ដោយសារតែមានសារធាតុផ្អែមច្រើន បើបានបរិភោគហើយ ចង់តែបរិភោគទៀត ខណៈទៀបប្រភេទនេះ កម្ររមានអ្នកដាំណាស់ តែគេសង្កេតឃើញនៅតាមដីភូមិ មានដាំតិចតួចសម្រាប់បរិភោគក្នុងគ្រួសារប៉ុណ្ណោះ ព្រោះទៀបប្រភេទនេះ នៅលើទីផ្សារវាមានតម្លៃថ្លៃគួរសម។

ក្នុងសកម្មភាពកំពុងប្រមូលផលផ្លែទៀបស្វិតលើផ្ទៃដីលំនៅដ្ឋានស្ថិតក្នុងភូមិទួល ឃុំចែងមាជ័យ ស្រុកបាណន់ ខេត្តដំបង អ្នកស្រី សុី ថាវ បានដាំផ្លែ​ទៀប​តិចតួច តែមិននឹកស្មានថា វាបានហុចផលបានល្អ ហើយលក់បានថ្លៃ និងប្រមូល​ផលបានច្រើនសារ ក្នុងមួយរដូវកាលធ្វើឲ្យអ្នកស្រីរកប្រាក់កម្រៃបានគួរសម។

អ្នកស្រីបន្តថា ពេលនេះជាការប្រមូលផលលើកទី២ ដែលអ្នកស្រីត្រៀមដឹកជញ្ជូនមកលក់ជូនភ្ញៀវក្នុងរដូវកាលបុណ្យ​២ ថ្ងៃនេះ ខណៈប៉ុន្មានថ្ងៃមុនអ្នកស្រីបានប្រមូលត្រៀមម្តងរួចហើយ តែត្រូវបានម៉ូយមកទិញយកអស់តែម្តង។ អ្នកស្រីបន្ថែមថា បើលក់នៅចម្ការបាន ១ គីឡូចន្លោះពី ៤ទៅ ៥ពាន់រៀលក្នុង១គីឡូក្រាម ហើយបើនៅក្នុងខេត្ត អាជីវករលក់១​គីឡូក្រាម ចន្លោះពី ៨០០០ រៀលទៅ ១២ ០០០ រៀល តាមប្រភេទតូចធំ។

អ្នកស្រីបន្តថា ការប្រមូលផលម្តងៗអាចបានចន្លោះពី៣៥០ ទៅជាង៤០០គីឡូក្រាមដែរ និងបានកម្រៃគ្រាន់បើតាមរយៈលក់ផ្លែទៀបបន្តិចបន្តួចនេះ ហើយផលដែលប្រមូលត្រៀមលក់ថ្ងៃទី១៦-១៧ខែតុលាខាងមុខនេះ គឺបានជិត៥០០​គីឡូក្រាម សរុបទាំងសល់ពីថ្ងៃទី១៣ និងបេះនៅព្រឹកថ្ងៃទី១៥នេះ។ អ្នកស្រីបន្តថា “ខ្ញុំមិននឹកស្មានដល់ថា វាបានជួយទ្រទ្រង់សេដ្ឋកិច្ចគ្រួសារបានប្រសើរបែបនេះសោះ ហើយគេនិយមបរិភោគច្រើនទៀត ខ្ញុំកំពុងសាបគ្រាប់បណ្តុះដាំបន្ថែម ឲ្យបានពេញលើដីលំនៅដ្ឋាន ហើយខ្ញុំរំពឹងថា នឹងអាចជួយរកកម្រៃបានច្រើនបន្ថែមទៀត ដែលធ្វើឲ្យជីវិភាពគ្រួសារខ្ញុំកាន់តែឈាទៅមុខ តាមរយៈផលដំណាំទៀបស្វិតនេះ”៕

អត្ថបទ៖ សៅ សារិទ្ធ