ព័ត៌មានជាតិ
ខេត្តបាត់ដំបងយកដើមចេក រចនាប្រទីបជំនួសជ័រលើកកម្ពស់បរិស្ថាន
លោក ឈឹម វិជិរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបងបានឱ្យដឹងថា ឆ្នាំនេះការរៀបចំប្រទីបនៅក្នុងខេត្តបាត់ដំបងខុសប្លែកពីឆ្នាំមុន គឺរៀបចំរចនាប្រទីបឡើង មិនប្រើជ័រ ដោយជំនួសមកវិញជាដើមចេក ស្លឹកចេក ស្លឹកត្នោត ដើម្បីលើកកម្ពស់បរិស្ថាន។
លោក ឈឹម វិជិរ៉ា បានឱ្យ «កម្ពុជាថ្មី» ដឹងថា ឆ្នាំនេះការរៀបចំប្រទីបនៅក្នុងខេត្តបាត់ដំបងខុសប្លែកពីឆ្នាំមុន ដោយសារតែរដ្ឋបាលខេត្ត និងអង្គភាពមន្ទីរចំនួន ៧ ទៀត បានឯកភាពគ្នារៀបចំរចនាប្រទីបឡើង ដោយមិនប្រើជ័រ ឬជំនួសដោយការរៀបចំពីដើមចេក ស្លឹកចេក ស្លឹកត្នោត ឬប្រភេទស្លឹកឈើធម្មជាតិផ្សេងៗ ដើម្បីបង្ហាញពីការចូលរួមចំណែកលើកតម្លៃជាតិ តម្លៃវប្បធម៌ដូនតា និងបរិស្ថានសង្គម ជាពិសេសដើម្បីថែរក្សាអនាម័យបរិស្ថាន ប្រព័ន្ធអេកូឡូស៊ី ឱ្យបានល្អប្រសើរដើម្បីប្រែក្លាយក្រុងបាត់ដំបងទៅជាទីក្រុងវៃឆ្លាត និងជាក្រុងដែលស្អាតបៃតង។
លោកបន្តថា៖ «នេះជាលើកទីមួយហើយ ដែលជាបទពិសោធន៍របស់យើង ក្នុងការរៀបចំរចនាប្រទីបឡើងដោយប្រើប្រាស់របស់ជាធម្មជាតិពិតៗ ហើយឆ្នាំខាងមុខទៀត ក៏ត្រូវបានអនុវត្តវិធីនេះដដែល ហើយយើងក៏ខិតខំកែលម្អបន្ថែមទៀតឲ្យកាន់តែមានភាពទាក់ទាញភ្ញៀវជាតិ និងអន្តរជាតិឲ្យកាន់តែប្រសើថែមទៀតផងដែរ»។
ប្រធានមន្ទីរកសិកម្មខេត្តរូបនេះ ក៏បានអំពាវនាវដល់សាធារណជនភ្ញៀវទេសចរជាតិអន្តរជាតិ និងប្រជាពលរដ្ឋអញ្ជើញមកចូលរួមកម្សាន្តឲ្យបានច្រើនកុះករនាថ្ងៃទី១៦ និងទី១៧ ខែតុលា ឆ្នាំ២០២៤ នេះ។
លោកថា ក្រៅពីទស្សនាកម្សាន្តការប្រណាំងទូកបណ្តែតប្រទីបក៏មានដាក់តាំងលក់ម្ហូបអាហារ នំចំណី និងវត្ថុអនុស្សាវរីយ៍យ៉ាងសំម្បូរបែបចេញពីស្នាដែកូនខ្មែរអ្នកបាត់ដំបងពិតៗតែម្តង ជាមួយនិងអ្នកលក់មានភាពរួសរាយរាក់ទាក់ប្រកបដោយភាពទន់ភ្លន់ប្រកាន់ខ្ជាប់នូវទំនៀមទម្លាប់ប្រពៃណីជាខ្មែរផង។
លោក ហម អរុណ អនុប្រធានមន្ទីរទេចរណ៍ខេត្ត បានឲ្យដឹងដែរថា សម្រាប់ខេត្តបាត់ដំបង មុនឈានដល់ពិធីបុណ្យធំ លោកបានចុះណែនាំដល់ម្ចាស់សណ្ឋាគារនានាក្នុងក្រុង រួមទាំងអាជីវករទាំងអស់ត្រូវធ្វើយ៉ាងណា យើងត្រូវរក្សារតម្លៃ និងមុខមាត់របស់ខេត្តបាត់ដំបង។
ក្នុងនោះមាន កុំមានការតម្លើងតម្លៃកន្លែងស្នាក់នៅរបស់ភ្ញៀវ និងម្អូបអាហារនំចំណី ឬរបស់របរផ្សេងៗ ដោយហួសហេតុដែលមិនអាចឲ្យភ្ញៀវក្នុង ឬក្រៅស្រុក ទទួលយកបានត្រូវធ្វើយ៉ាងណាឲ្យបានសមរម្យបំផុត ដែលធ្វើឲ្យភ្ញៀវទេសចរចង់មកម្តងហើយម្តងទៀត សម្រាប់ខេត្តបាត់ដំបង។
ក្រៅពីទូកប្រណាំងទូក គេសង្កេតឃើញប្រទីបជាច្រើន បានអណ្តែតលើផ្ទៃទឹកមានពណ៌ចម្រុះយ៉ាងស្រស់ស្អាត ដើម្បីត្រៀមខ្លួនប្រកួតប្រជែងគ្នា នាល្ងាចថ្ងៃទី១៧ ខែតុលា ដែលជាពេលវេលាត្រូវបានបិទបញ្ចប់នៃពិធីបុណ្យជាតិដ៏វិសេសវិសាលនេះ។
ក្រៅពីសម្រស់លើផ្ទៃទឹក ក្នុងដងស្ទឹងសង្កែ គេក៏សង្កេតឃើញនៅតាមដងស្ទឹងសងខាង ក៏មានបង្កោលភ្លើងសូឡាយ៉ាងច្រើន ដែលត្រូវបានក្រុមការងារបច្ចេកទេសរបស់រដ្ឋបាលខេត្ត និងក្រុងបាត់ដំបងបានតម្លើងរួមទាំងនៅតាមសួនច្បារអមសងខាងដងស្ទឹងសង្កែនៃក្រុងបាត់ដំបង។
ក្រុមការងាររដ្ឋបាលខេត្តបានឲ្យដឹងថា បង្គោល និងអំពូលភ្លើងសូឡាដែលត្រូវបានតម្លើងនេះ សរុបទាំងអស់ចំនួន ១២៨ដើម ក្នុងនោះបានតម្លើងនៅអមសងខាងស្ទឹងសង្កែ តាមសួនកម្សាន្ត និងលើស្ពានឆ្លងស្ទឹងសង្កែ ក្នុងក្រុងបាត់ដំបង ដើម្បីបំភ្លឺផ្លូវ និងលម្អរក្នុងក្រុងបាត់ដំបង។
មុនឈានដល់ថ្ងៃនៃពិធីបុណ្យនេះ លោក សុខ លូ អភិបាលខេត្ត ក៏បានអំពាវនាវដល់បងប្អូនប្រជាពលរដ្ឋ ក្នុងខេត្តក៏ដូចជាអ្នកក្រៅខេត្ត រួមនិងជនបរទេស អញ្ជើញធ្វើដំណើរមកចូលរួមកម្សាន្តទាំងអស់គ្នា លើទឹកដីខេត្តបាត់ដំបង ដែលជាខេត្តពោរពេញទៅដោយសក្តានុពលផ្នែកវិស័យកសិកម្ម និងទេសចរណ៍ដ៏សម្បូរបែបនេះ។
ក្នុងនោះបានដើរកម្សាន្តតាមសួនច្បារនានាមើលការតុបតែងភ្លើងលម្អរចម្រុះលើស្ពានឆ្លងកាត់ស្ទឹងសង្កែ និងតាមដងផ្លូវសំខាន់ៗក្នុងក្រុងបាត់ដំបងផង។
បើតាមក្រុមការងាររដ្ឋបាលសាលាក្រុង ទូកដែលចូលរួមប្រកួតចំនួន ៤២ទូក មានកីឡាករចូលរួមចំនួន ១៤៩០នាក់ ក្នុងនោះកីឡាករបម្រុង ចំនួន ៣៩៧នាក់។
ប្រភេទទូកដែលចូលរួមមាន ប្រភេទទូកមួង ឬទូកផ្កាចារ ទូកខ្នាតអន្តរជាតិបុរសនារី ទូកខ្លីប្រពៃណី រួមនិទូកងប្រពៃណីជាតិជាដើមផង៕
អត្ថបទ៖ សៅ សារិទ្ធ
-
សន្តិសុខសង្គម១ សប្តាហ៍ agoទុរេនរាប់តោននៅផ្សារភូពុយ អនុញ្ញាតឱ្យបន្តលក់ ក្រោយមន្ត្រីជំនាញប្រមូលសំណាក និងសាកសួរប្រភពនាំចូល
-
សេដ្ឋកិច្ច៥ ថ្ងៃ agoរដ្ឋាភិបាលហាមឃាត់ក្រុមហ៊ុនផលិតស្រា និងភេសជ្ជៈផ្ដល់រង្វាន់តាមក្រវិលកំប៉ុង ចាប់ពីដើមខែតុលា ឆ្នាំនេះ
-
ព័ត៌មានជាតិ៤ ថ្ងៃ agoក្រសួងវប្បធម៌ ព្រមានចាត់វិធានការច្បាប់លើជនដែលនៅតែបន្តកែច្នៃ ប្រើគ្រឿងលម្អយកគំរូគ្រឿងឥស្សរិយយស«ព្រះរាជមហាកណ្ឋាភណ្ឌគ្រងរាជសម្បត្តិ»
-
ព័ត៌មានជាតិ៦ ថ្ងៃ agoអ្នកជំនាញ ទាញសញ្ញាបន្ទាត់ក្រហម វិបត្តិនយោបាយផ្ទៃក្នុងថៃអាចផ្ទេរមកជម្លោះព្រំដែនសារជាថ្មី
-
ព័ត៌មានជាតិ១ ថ្ងៃ agoក្រសួងសុខាភិបាល ត្រៀមបង្ការ និង ទប់ស្កាត់ការនាំចូលជំងឺឆ្លង ហាន់តា នៅអាកាសយានដ្ឋានអន្តរជាតិតេជោ
-
ព័ត៌មានជាតិ៤ ថ្ងៃ agoថៃលុបMoU 2001៖ សម្ដេចតេជោប្រាប់ថៃថា កុំបបួលកម្ពុជាចរចាទ្វេភាគីទៀត ត្រូវដឹកដៃគ្នាទៅរកយន្តការអន្តរជាតិ
-
ព័ត៌មានអន្ដរជាតិ២ ថ្ងៃ agoកូរ៉េខាងជើង ត្រៀមដាក់ពង្រាយកាំភ្លើងធំស៊េរីថ្មី នៅក្បែរព្រំដែន និងបង្អួតនាវាចម្បាំងខ្នាតយក្ស
-
ព័ត៌មានជាតិ១ ថ្ងៃ agoប្រព័ន្ធហ្វឹកហ្វឺនអាវុធជាអំណោយរបស់ឥណ្ឌា នឹងរួមចំណែកលើកកម្ពស់សមត្ថភាពកងទ័ពជើងគោកកម្ពុជា