ទណ្ឌិត១៩៩នាក់ ត្រូវបានផ្ទេរពីពន្ធនាគារកំពង់ស្ពឺ ទៅពោធិ៍សាត់ ដើម្បីរំដោះភាពចង្អៀតណែន

ដើម្បីរំដោះភាពចង្អៀតណែនក្នុងពន្ធនាគារខេត្តកំពង់ស្ពឺ  ទណ្ឌិតចំនួន ១៩៩នាក់ ត្រូវបានផ្ទេរចេញ ទៅកាន់មណ្ឌលអប់រំកែប្រែទី៤ ដែលស្ថិតនៅក្នុងខេត្តពោធិ៍សាត់ ដើម្បីឃុំខ្លួនបន្ត។ នេះបើតាមសេចក្ដីប្រកាសព័ត៌មាននៅលើទំព័រហ្វេសប៊ុកអគ្គនាយកដ្ឋានពន្ធនាគារ។

តាមអគ្គនាយកដ្ឋានពន្ធនាគារ ការផ្ទេរទណ្ឌិតចេញពន្ធនាគារខេត្តកំពង់ស្ពឺ ទៅកាន់ខេត្តពោធិ៍សាត់ ដែលធ្វើឡើងកាលពីថ្ងៃទី២៣ ខែតុលា ឆ្នាំ២០២៤  គឺទទួលបានគោលការណ៍អនុញ្ញាតពីលោក ស សុខា ឧបនាយករដ្ឋមន្រ្តី រដ្ឋមន្រី្តក្រសួងមហាផ្ទៃ និងអាជ្ញាធរដែនដីពាក់ព័ន្ធ។

តាមសំណេរលើទំព័រហ្វេសប៊ុកអគ្គនាយកដ្ឋានពន្ធនាគារ នាថ្ងៃទី២៤ ខែតុលា  ឱ្យដឹងថា ក្រោមកិច្ចសហការរវាងអគ្គនាយកដ្ឋានពន្ធនាគារ សហការជាមួយអគ្គស្នងការដ្ឋាននគរបាលជាតិ រួមគ្នាជាមួយនឹងអាជ្ញាធរខេត្ត ស្នងការដ្ឋាន សមត្ថកិច្ចពាក់ព័ន្ធគ្រប់ជាន់ថ្នាក់របស់ខេត្តកំពង់ស្ពឺ កណ្តាល កំពង់ឆ្នាំង និងខេត្តពោធិ៍សាត់ បានធ្វើការផ្ទេរ និងដឹកជញ្ជូនជនជាប់ឃុំចំនួន១៩៩នាក់ ពីពន្ធនាគារខេត្តកំពង់ស្ពឺ ទៅឃុំបន្តនៅមណ្ឌលអប់រំកែប្រែទី៤ គឺប្រកបដោយសុវត្ថិភាព។

គួរឱ្យដឹងថា នៅទូទាំងពន្ធនាគារក្នុងប្រទេសកម្ពុជាមានអ្នកជាប់ឃុំជាង៥ម៉ឺននាក់ ដែលអ្នកជាប់ក្នុងពន្ធនាគារភាគច្រើនគឺជាប់ពាក់ព័ន្ធនឹងបទល្មើសគ្រឿងញៀន។ ចំនួនអ្នកជាប់ឃុំ៥ ម៉ឺននាក់នេះ ត្រូវបានអ្នកនាំពាក្យពន្ធនាគាររអ៊ូថាជាចំនួនដ៏ច្រើន បណ្ដាលឱ្យមានភាពចង្អៀតណែនក្នុងពន្ធនាគារ បើទោះបីជាពង្រីកទំហំពន្ធនាគារក៏ដោយ ក៏នៅតែមានជនជាប់ឃុំកើនឡើងបន្ថែមជានិច្ច។

ដើម្បីកាត់បន្ថយភាពចង្អៀតណែនក្នុងពន្ធនាគារ សមត្ថកិច្ច បានបញ្ជូនទណ្ឌិត ចេញពីពន្ធនាគារមួយទៅកាន់ពន្ធនាគារមួយទៀត ដើម្បីបន្តឃុំខ្លួន តួយ៉ាងកាលពីថ្ងៃទី១២ខែតុលា ទណ្ឌិតចំនួន៤៤នាក់ ត្រូវបានផ្ទេរដឹកចេញពីពន្ធនាគារខេត្តកណ្ដាលទៅកាន់មណ្ឌលយុវនីតិសម្បទា ក្នុង​ឃុំបាគូរ ស្រុកកណ្តាលស្ទឹង​ ខេត្តកណ្តាល។ 

កាលពីថ្ងៃទី១២ ខែកញ្ញា អគ្គនាយកដ្ឋានពន្ធនាគារ ក៏បានផ្ទេរទណ្ឌិតចំនួន១៩៧នាក់ ពីពន្ធនាគារខេត្តកណ្តាល ទៅកាន់មណ្ឌលអប់រំកែប្រែទី៤ ដែលមានទីតាំងស្ថិតនៅក្នុងខេត្តពោធិ៍សាត់។

សូមជម្រាបជូនបន្តិចថា មណ្ឌលអប់រំកែប្រែទី៤ គឺមណ្ឌលដែលទទួលអនុវត្តឃុំឃាំងជនជាប់ឃុំបុរសជាទណ្ឌិត ដែលត្រូវបានតុលាការផ្តន្ទាទោសដាក់ពន្ធនាគារក្រោម ៥ឆ្នាំ ឬអនុវត្តទោសពន្ធនាគារនៅសល់ក្រោម ៥ឆ្នាំ៕

ដោយ៖ ង៉ិល ណារ៉ាត់