ព័ត៌មានជាតិ

ស្ថានភាពប្រជាពលរដ្ឋចូលមកខេត្តសៀមរាបតាមផ្លូវជាតិលេខ៦មកពីខេត្តកំពង់ធំថ្ងៃនេះហាក់មានការថយចុះ

បានផុស

៥ years មុន

នៅ

ថ្ងៃព្រហស្បតិ៍ ១១ មីនា ២០២១

ដោយ

លោក ពៅ ប៊ុនធឿន អភិបាលស្រុកជីក្រែង ដែលបានប្រចាំការនៅប៉ុស្តិ៍ត្រួតពិនិត្យសុខភាពបឋមនៅព្រំប្រទល់ខេត្តសៀមរាបជាមួយខេត្តកំពង់ បានឲ្យដឹងនៅរសៀលថ្ងៃទី១១ ខែមីនា ឆ្នាំ២០២១នេះថា នៅក្នុងរយៈពេល២ថ្ងៃ គឺចាប់ពីថ្ងៃទី០៩ដល់ទី១០ខែមីនាឆ្នាំ២០២១នេះ អាជ្ញាធរខេត្តសៀមរាប បានត្រួតពិនិត្យសុខភាពបឋមសម្រាប់ប្រជាពលរដ្ឋចូលមកខេត្តសៀមរាបនៅព្រំប្រទល់ខេត្តសៀមរាបជាមួយខេត្តកំពង់ធំ គឺបានចំនួន២៧៣១នាក់ ក្នុងនោះបានស្កេន QR Code បានចំនួន៧៣៩នាក់។ ក្នុងប្រជាពលរដ្ឋទាំងនេះ មិនទាន់ឃើញមានជនណាម្នាក់សង្ស័យពាក់ព័ន្ធកូវីដ១៩ហើយត្រូវឱ្យធ្វើចត្តាឡីស័ននៅឡើយទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលស្រុកបានបញ្ជាក់ថា សម្រាប់ថ្ងៃទី១១ ខែមីនានេះ គិតត្រឹមរសៀលថ្ងៃទី១១នេះ ស្ថានភាពប្រជាពលរដ្ឋចូលមកខេត្តសៀមរាប តាមផ្លូវជាតិលេខ៦ តាមចក្រមកពីខេត្តកំពង់ធំមានការថយចុះជាមុន កត្តាទាំងនេះអាចបណ្តាលមកពីប្រជាពលរដ្ឋ មានការប្រុងប្រយ័ត្នខ្ពស់ជាងមុន ហើយមិនហានចេញដើរ ដោយសារការរីករាលដាលនៃមេរោគកូវិដកាន់តែខ្លាំង។

សូមបញ្ជាក់ថា កាលពីថ្ងៃទី០៩ ខែមីនា ឆ្នាំ២០២១កន្លងទៅ លោក ទៀ សីហា អភិបាលខេត្តសៀមរាប បានសម្រេចដាក់ចេញវិធានការត្រួតពិនិត្យសុខភាពបឋមនៅចំណុចព្រំប្រទល់ស្រុកជីក្រែង ខេត្តសៀមរាប និងស្រុកស្ទោង ខេត្តកំពង់ធំ។ ហើយការដឹកទំនិញ និងប្រជាពលរដ្ឋ អាចធ្វើដំណើរឆ្លងកាត់បានជាធម្មតា ដោយមិនមានការហាមឃាត់នោះឡើយ ដោយគ្រាន់តែមានការត្រួតពិនិត្យសុខភាពបឋម ដោយមិនមានតម្រូវឲ្យធ្វើចត្តាឡីស័ក លើកលែងតែករណីសង្ស័យ។

ក្នុងនោះក្រុមការងារក៏បានដាក់ដំណើរត្រួតពិនិត្យសុខភាពបឋម និងស្រង់ស្ថិតិ នៅចំណុចព្រំប្រទល់នេះ ដើម្បីងាយស្រួលក្នុងការគ្រប់គ្រង ព្រមណែនាំឱ្យអនុវត្តការស្កែន QR Code Stop COVID-19 “ទប់ស្កាត់ ជំងឺកូនវីដ១៩”ផងដែរ៕

អត្ថបទ ៖ កុសល