រដ្ឋមន្ត្រី៖ វិស័យទេសចរណ៍កម្ពុជា មិនអាចកាត់ផ្ដាច់បានឡើយពីការទាញលំហូរទេសចរ និងវិនិយោគិនចិន

រដ្ឋមន្ត្រី ហូត ហាក់ បានថ្លែងថា វិស័យទេសចរណ៍កម្ពុជា មិនអាចកាត់ផ្ដាច់បានឡើយពីការស្រូបទាញកំណើននៃលំហូរទេសចរ និងវិនិយោគិនចិន ខណៈរយៈពេល១០ខែ ឆ្នាំ២០២៤ ទេសចរចិនមកទស្សនាកម្ពុជាជាង ៦៩ម៉ឺននាក់ បើធៀបនឹងឆ្នាំ២០២៣។

លោក ហូត ហាក់ រដ្ឋមន្ត្រីក្រសួងទេសចរណ៍ បានថ្លែងថា តាមរយៈការដាក់ចេញគំនិតផ្ដួចផ្ដើមជាយុទ្ធសាស្ត្រ និងកិច្ចខិតខំប្រឹងប្រែងជាច្រើនរបស់ក្រសួងទេសចរណ៍ ដោយមានកិច្ចសហការល្អជាមួយអន្តរក្រសួង ស្ថាប័ន រដ្ឋបាលថ្នាក់ក្រោមជាតិ ស្ថានទូតបរទេសនៅកម្ពុជា ស្ថានទូតកម្ពុជានៅបរទេស ដៃគូអភិវឌ្ឍ ពិសេសវិស័យឯកជន បាននិងកំពុងជំរុញវិស័យទេសចរណ៍កម្ពុជាឱ្យតែរីកចម្រើនជាលំដាប់។

ជាក់ស្ដែង កាលពីឆ្នាំ២០២៣កន្លងទៅ កម្ពុជាទទួលបានភ្ញៀវទេសចរអន្តរជាតិប្រមាណ ៥លាន៤៥ម៉ឺននាក់ ដែលក្នុងនោះ ភ្ញៀវទេសចរចិនប្រមាណ ៥៥ម៉ឺននាក់។ សម្រាប់រយៈពេល១០ខែ ឆ្នាំ២០២៤នេះ កម្ពុជាទទួលបានភ្ញៀវទេសចរអន្តរជាតិ​ ៥លាន៣៧ម៉ឺននាក់ កើនឡើងប្រមាណ ២២% ប្រៀបធៀបឆ្នាំ២០២៣។ ក្នុងនោះ ទេសចរចិនជាង ៦៩ម៉ឺននាក់ កើនឡើង ៥២,៥% ធៀបរយៈពេលដូចគ្នាក្នុងឆ្នាំ២០២៣។

ក្នុងន័យនេះ លោក ហួត ហាក់ គូសបញ្ជាក់ថា អនាគតវិស័យទេសចរណ៍អាស៊ាន ក៏ដូចជានៅកម្ពុជា ពិតជាមិនអាចកាត់ផ្ដាច់បានឡើយពីការស្រូបទាញកំណើននៃលំហូរទេសចរ និងវិនិយោគិនចិន។ ស​ម្រាប់កម្ពុជា បានត្រៀមលក្ខណ សម្បត្តិគ្រប់គ្រាន់ក្នុងការទទួលស្វាគមន៍ការវិលត្រឡប់មកវិញនៃភ្ញៀវទេសចរ និងវិនិយោគិនចិនមកកម្ពុជា។ លោករដ្ឋមន្ត្រី ថ្លែងឱ្យដឹងបែបនេះ ក្នុងសន្និសីទផ្សព្វផ្សាយទេសចរណ៍វប្បធម៌នៅខេត្តក្វាងស៊ី ឆ្នាំ២០២៤ នារសៀលថ្ងៃទី២៩ ខែវិច្ឆិកា ឆ្នាំ២០២៤នេះ។

លោក ថា សម្ដេចធិបតី​ បានចាត់ទុកវិស័យទេសចរណ៍ ជាវិស័យអាទិភាពដែលជាជន្ទល់សេដ្ឋកិច្ចមួយដ៏សំខាន់ រួមចំណែកការអភិវឌ្ឍសង្គម-សេដ្ឋកិច្ចជាតិ ហើយរាជរដ្ឋាភិបាល ក៏បានចាត់ទុកវិស័យទេសចរណ៍ ថា គឺជាមាសបៃតង ដែលទទួលបានកំណើនជាវិជ្ជមានរៀងរាល់ឆ្នាំ និងបានរួមចំណែកប្រមាណ ១៣% ក្នុងផលិតផលកក្នុងស្រុកសរុប។

រាជរដ្ឋាភិបាល ក៏បានលើកកម្ពស់វិស័យទេសចរណ៍ តាមរយៈការអភិវឌ្ឍទេសចរណ៍វប្បធម៌ ទេសចរណ៍ប្រវត្ថិសាស្ត្រ ទេសចរណ៍ធម្មជាតិ អេកូទេសចរណ៍ ទេសចរណ៍ធុរកិច្ច និងទេសចរណ៍សាសនា។ ការបង្កើតផលិតផលទេសចរណ៍ថ្មីៗបន្ថែមទៀត ដែលមានតម្លៃថែមខ្ពស់ ដោយបន្ថែមទេសចរណ៍បៃតង ទេសចរណ៍ស្អាត និងទេសចរណ៍វៃឆ្លាត។ នេះជាបន្ថែមរបស់រដ្ឋមន្រ្តី ហួត ហាក់ ដដែល៕