បណ្ឌិត សៀន សុវណ្ណា៖ ការលើកកម្ពស់គុណភាពអប់រំ គឺដើម្បីអភិវឌ្ឍន៍យុវជនឱ្យក្លាយជាទំពាំងស្នងឫស្សី

លោកបណ្ឌិត សៀន សុវណ្ណា រដ្ឋលេខាធិការនៃរដ្ឋលេខាធិការដ្ឋានកិច្ចការព្រំដែន និងជាស្ថាបនិក និងប្រធានក្រុមប្រឹក្សាភិបាលនៃសាលា អន្តរជាតិ ភ្យូឆឺរប្រាយបានមានប្រសាសន៍ថា រាជរដ្ឋាភិបាលកម្ពុជា បានការលើកកម្ពស់គុណភាពអប់រំ ដើម្បីអភិវឌ្ឍធនធានមនុស្សនៅក្នុងព្រះរាជាណាចកកម្ពុជាសំដៅឱ្យយុវជនកម្ពុជាក្លាយជាទំពាំងស្នងឫស្សីសម្រាប់ចូលរួមអភិវឌ្ឍន៍ប្រទេសនាពេលអនាគត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត លើកឡើងបែបនេះ នៅក្នុងពិធីប្រគល់វិញ្ញាបនបត្របណ្តោះអាសន្នមធ្យមសិក្សាបឋមភូមិនិងមធ្យមសិក្សាទុតិយភូមិ ជូនដល់សិស្សានុសិស្សជ័យលាភី សម្រាប់ឆ្នាំសិក្សា២០២៣-២០២៤ ព្រមទាំង ផ្តល់ប័ណ្ណសរសើរ និងរង្វាន់លើកទឹកចិត្តជូនសិស្សានុសិស្សរៀនពូកែ និងលោកគ្រូ អ្នកគ្រូដែលមាន ស្នាដៃឆ្នើមនៃសាលាអន្តរជាតិភ្យូឆឺរប្រាយខេត្តសៀមរាបនាព្រឹកថ្ងៃទី២១ ខែធ្នូ ឆ្នាំ២០២៤។

រដ្ឋលេខាធិការនៃរដ្ឋលេខាធិការដ្ឋានកិច្ចការព្រំដែន បន្តថា ដើម្បីចូលរួមអភិវឌ្ឍន៍ធនធានមនុស្សនៅក្នុងគ្រួសារឲ្យស្របតាមគោលនយោបាយរបស់ រាជរដ្ឋាភិបាលកម្ពុជា សូមមាតា បិតា ឬ អ្នកអាណាព្យាបាលសិស្សទាំងអស់ ត្រូវអប់រំកូន ប្អូន និងចៅនៅផ្ទះរៀងៗខ្លួន ឱ្យពួកគាត់ស្រលាញ់ការសិក្សាពេញមួយជីវិត និងយកចិត្តទុកដាក់ខ្ពស់ លើការសិក្សា ដើម្បីទទួលចំណេះដឹង ជំនាញ និងបំណិនសម្រាប់បន្តការសិក្សានៅសាកលវិទ្យាល័យក្នុង និងក្រៅបរទេសប្រកបដោយជោគជ័យ សំដៅអភិវឌ្ឍជីវិតខ្លួនឯង គ្រួសារ និងចូលរួមអភិវឌ្ឍប្រទេសជាតិ។

លោកបណ្ឌិត សៀន សុវណ្ណា វាយតម្លៃខ្ពស់ និងកោតសរសើរដ៏ស្មោះចំពោះគណៈគ្រប់គ្រង បុគ្គលិក និងលោកគ្រូ អ្នកគ្រូ នៃសាលា អន្តរជាតិភ្យូឆឺរប្រាយទាំងអស់ ដែលបានខិតខំប្រឹងប្រែងអស់ពីកម្លាំង កាយចិត្ត និងប្រាជ្ញា មានឆន្ទៈមោះមុត មានការប្តេជ្ញាចិត្តខ្ពស់ និងមានគំនិតច្នៃប្រឌិត ក្នុងការដឹកនាំគ្រប់គ្រង បង្ហាត់បង្រៀន និងអប់រំណែនាំ សិស្សានុសិស្សស្របតាមគោលនយោបាយបាយ បទដ្ឋានគតិយុត្ត ផែនការយុទ្ធសាស្ត្រ ផែនការបណ្តុះបណ្តាល និងផែនការសកម្មភាពរបស់សាលា។ លោកក៏បាន ជំរុញលើកទឹកចិត្តដល់សិស្សានុសិស្ស ឱ្យខិតខំរៀនសូត្រលើមុខវិជ្ជាផ្សេងៗ បន្ថែមទៀតដើម្បីបង្កើនសមត្ថភាព ចំណេះដឹង ចំណេះធ្វើ និងបច្ចេកវិទ្យា ឈានឱ្យទាន់សភាពការសង្គមជាតិនិងសកលលោក និងត្រូវប្រកាន់ខ្ជាប់នូវវិន័យ សេចក្តីថ្លៃថ្នូរ និងរក្សាសាមគ្គីភាពនៅក្នុងគ្រប់មជ្ឈដ្ឋាន ពិសេសគឺត្រូវមានសីលធម៌ សុជីវធម៌ គុណធម៌ ដែលជាលក្ខណៈសម្បត្តិចាំបាច់មិនអាចខ្វះបានដើម្បីក្លាយខ្លួនជាពលរដ្ឋល្អមានប្រយោជន៍សម្រាប់សង្គមជាតិ៕

ដោយ៖ គឿនវេត