ឯកឧត្តម ហ៊ុន ម៉ានី៖ ការចូលរួមបរិច្ចាគឈាម បង្ហាញពីសាមគ្គីភាព និងការជួយគ្នាទៅវិញទៅមក

ឯកឧត្តមឧបនាយករដ្ឋមន្ត្រី ហ៊ុន ម៉ានី​ រដ្ឋមន្ត្រីក្រសួងមុខងារសាធារណៈ បានលើកឡើងថា ការការចូលរួមបរិច្ចាកឈាមរបស់សប្បុរសជន បង្ហាញពីសាមគ្គីភាព និងការជួយគ្នាទៅវិញទៅមក។ ការលើកឡើងនេះ ក្នុងឱកាសដែលឯកឧត្តម អញ្ជើញជាអធិបតីដ៏ខ្ពង់ខ្ពស់ «កម្មវិធីបរិច្ចាគឈាមដើម្បីសង្គ្រោះជីវិត» ដែលរៀបចំឡើងដោយសាលាភូមិន្ទរដ្ឋបាល សហការជាមួយ ស.ស.យ.ក. វិស័យមុខងារសាធារណៈ និងមជ្ឈមណ្ឌលជាតិផ្តល់ឈាម។

ថ្លែងនាឱកាសនោះ ឯកឧត្តមឧបនាយករដ្ឋមន្ត្រី បានមានប្រសាសន៍ថា ការចែករំលែកឈាម មានអត្ថន័យស្មើនឹងការចែករំលែកការយកចិត្តទុកដាក់ ការឈឺឆ្អាល ក្តីស្រលាញ់ និងការរួមសុខរួមទុក្ខជាមួយអ្នកត្រូវការឈាមជាចំបាច់ដើម្បីសង្គ្រោះជីវិត ដែលបានសបញ្ជាក់អំពីភាពជាគម្រូរបស់ប្រជាពលរដ្ឋដែលជាកោសិការនៃសង្គមជាតិ ដែលគ្រប់សកម្មភាពទាំងអស់ដែលផ្តល់ផលវិជ្ជមាន ចំពោះសង្គម សុទ្ធតែមានតម្លៃដ៏ធំធេង ទោះបីជាសកម្មភាពនោះតូចឬធំក៏ដោយ អ្វីដែលចំបាច់បំផុតគឺឆន្ទៈ ក្នុងការជួយសង្គ្រោះអាយុជីវិតមនុស្សដែលត្រូវការឈាម ដែលអ្នកបរិច្ចាគឈាមអាចធ្វើទៅបាន។

ក្នុងស្មារតីរួបរួមសាមគ្គីនេះ ឯកឧត្តមថា ការចូលរួមរបស់សប្បុរសជននាពេលនេះ បានបង្ហាញនូវរូបភាពថ្មីមួយនៃវីរជន ដែលបានលៈបង់ឈាមស្រស់ ទោះមិនមែនក្នុងរូបភាពនៃការស្វែងរកសុខសន្តិភាព ទោះមិនពាក់ព័ន្ធទៅលើការរក្សាស្ថេរភាព ឬការចូលរួមសមរភូមិសង្គ្រាម តែជាសកម្មភាពចេះជួយគ្នាទៅវិញទៅមក ភាតរភាពនៃការជួយគ្នា សាមគ្គីភាព ជាពិសេសការផ្សារភ្ជាប់រវាងមន្ត្រីរាជការ ជាមួយនឹងប្រជាពលរដ្ឋទូទៅ។

ជាមួយគ្នានេះ ឯកត្តម ហ៊ុន ម៉ានី​ ក៏បានធ្វើការកោតសរសើរ និងវាយតម្លៃដល់សាលាភូមិន្ទរដ្ឋបាល ស.ស.យ.ក. វិស័យមុខងារសាធារណៈ​ និងមជ្ឈមណ្ឌលជាតិផ្តល់ឈាមដែលបានខិតខំរៀបចំកម្មវិធីនាពេលនេះឡើង ដែលជាកាយវិការដ៏ប្រពៃ និងជាគម្រូល្អក្នុងសង្គមជាតិ ក្នុងនាមជាមន្ត្រីរាជការផងដែរ។ ឯកឧត្តមសង្ឃឹមថា តាមរយៈកម្មវិធីនេះ នឹងអាចជំរុញសកម្មភាពមនុស្សធម៌ឱ្យកាន់តែផុលផុស និងមានការចូលរួមពីសំណាក់ក្រសួង ស្ថាប័ន គ្រឹះស្ថានបណ្តុះបណ្តាលដទៃបន្ថែមទៀត។

តាមរបាយការណ៍ លោក យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល បានឱ្យដឹងថា កន្លងមក សាលាភូមិន្ទរដ្ឋបាល ធ្លាប់បានសហការជាមួយមជ្ឈមណ្ឌលជាតិផ្តល់ឈាម រៀបចំ«កម្មវិធីបរិច្ចាគឈាមដើម្បីសង្គ្រោះជីវិត» ចំនួន ៦លើក រួចមកហើយ ដែលមានអ្នកចូលរួមផ្តល់ឈាមសរុប ៦៥៩អង្គ/នាក់។ សម្រាប់លើកទី៧ នេះ ប្រព្រឹត្តទៅរយៈពេលពេញ ១ថ្ងៃពេញ ដោយមានការចូលរួមស្ម័គ្រចិត្តបរិច្ចាគយ៉ាងសស្រាក់សស្រាំពីសំណាក់ លោក លោកស្រី ជាថ្នាក់ដឹកនាំ មន្ត្រីរាជការនៃក្រសួងមុខងារសាធារណៈ ស.ស.យ.ក. វិស័យមុខងារសាធារណៈ សាស្ត្រាចារ្យ បុគ្គលិក គណៈគ្រប់គ្រងសាលាភូមិន្ទរដ្ឋបាល ព្រមទាំងព្រះសង្ឃ និងសិស្ស-និស្សិត ជាកម្មសិក្សាការី សិស្សមន្ត្រីជាន់ខ្ពស់ និងសប្បុរសជនផ្សេងទៀត សរុប ២២២អង្គ/នាក់។

ជាមួយគ្នានោះ លោកវេជ្ជបណ្ឌិត សុខ ប៉ូល ប្រធានមជ្ឈមណ្ឌលជាតិផ្តល់ឈាម បានសម្តែងការស្វាគមន៍ដោយមោទនភាព ដល់សប្បុរសជនទាំងអស់ដែលបានធ្វើអំណោយទាន និងសកម្មភាពគ្រប់បែបយ៉ាងក្នុងការជំរុញការបរិច្ចាគឈាមដោយពេញចិត្ត និងមិនទទួលកម្រៃ ក្នុងការចូលរួមចំណែកជួយសង្គ្រោះជនរងគ្រោះ។ លោកប្រធានមជ្ឈមណ្ឌល បានលើកឡើងថា យុទ្ធនាការនាថ្ងៃនេះ ជាប្រធានបទដ៏មានអត្ថន័យសម្រាប់យើងទាំងអស់គ្នា និងមានគោលបំណងសំខាន់២គឺ៖ ១).បង្កើតទម្លាប់ និងវប្បធម៌នៃការបរិច្ចាគឈាមដោយស្ម័គ្រចិត្ត និងជំរុញការលើកកម្ពស់ប្រជាជនទូទៅចូលរួមធ្វើសកម្មភាព ជាមួយនឹងសេវាកម្មជាតិផ្តល់ឈាមនៅទូទាំងប្រទេស ដើម្បីធានាឱ្យបាននូវការផ្តល់ជូនឈាមគ្រប់គ្រាន់សម្រាប់អ្នកជំងឺដែលកំពុងត្រូវការឈាម និងគ្រប់មន្ទីរពេទ្យទាំងអស់ដោយមិនមានការរើសអើងជាតិសាសន៍ សាសនា ឬនិន្នាការនយោបាយ។ ២).ផ្សារភ្ជាប់សកម្មភាពបរិច្ចាគឈាមដោយស្ម័គ្រចិត្ត។

លោកប្រធានមជ្ឈមណ្ឌល បានបញ្ជាក់ថា ការបរិច្ចាគឈាមមិនប៉ះពាល់សុខភាពទេ ហើយឈាមមានប្រភពតែមួយគត់ គឺពីមនុស្ស មិនមានរោងចក្រណាអាចផលិតឈាមបានទេ។ ការបរិច្ចាគឈាមមិនត្រឹមតែមិនមានផលប៉ះពាល់សុខភាពទេ ថែមទាំងមានអត្ថប្រយោជន៍សម្រាប់បុគ្គលផ្ទាល់ខ្លួន សង្គមជាតិ និងបរមជាតិខាងមុខ៕