ព័ត៌មានជាតិ

អភិបាលរាជធានីភ្នំពេញ ណែនាំអភិបាលទាំង ១៤ ខណ្ឌ បន្តចុះបាញ់ថ្នាំសម្លាប់សត្វមូស បង្ការជំងឺគ្រុនឈាមជូនពលរដ្ឋ

បានផុស

១ year មុន

នៅ

ថ្ងៃចន្ទ ១៣ មករា ២០២៥

ដោយ

ដោយមានការយកចិត្តទុកដាក់ និងណែនាំពី លោក ឃួង ស្រេង អភិបាល នៃគណៈអភិបាលរាជធានីភ្នំពេញ ដែលបានគិតគូរពីបញ្ហាសុខភាពសាធារណៈរបស់ប្រជាពលរដ្ឋរស់នៅក្នុងមូលដ្ឋាន អាជ្ញាធរទាំង ១៤ សហការជាមួយក្រុមការងារមន្ទីរសុខាភិបាលរាជធានីភ្នំពេញ បានបើកយុទ្ធនាការចុះបាញ់ថ្នាំសម្លាប់សត្វមូសនៅមូលដ្ឋានរបស់ខ្លួនជាបន្តបន្ទាប់ ដើម្បីបង្ការ និងទប់ស្កាត់ជំងឺគ្រុនឈាម។

ជាក់ស្ដែងអាជ្ញាធរតាមមូលដ្ឋានទាំង ១៤ ខណ្ឌ ដោយមានការណែនាំពីសំណាក់លោកអភិបាលខណ្ឌនីមួយៗ បានឲ្យកម្លាំងសណ្ដាប់ធ្នាប់បន្តចុះបាញ់ថ្នាំសម្លាប់សត្វមូសតាមតំបន់ដែលមានភាពស្មុគស្មាញ មានប្រភពទឹកអាចបង្កបង្កើនសត្វមូសបានក្នុងមូលដ្ឋាន ដើម្បីគិតគូរពីសុខភាពរបស់ប្រជាពលរដ្ឋ និងបង្ការទប់ស្កាត់ជំងឺគ្រុនឈាម។

ប្រជាពលរដ្ឋរស់នៅតាមមូលដ្ឋាន បានសម្តែងនូវទឹកចិត្តរីករាយយ៉ាងក្រៃលែងជាខ្លាំង និង ថ្លែងអំណរគុណយ៉ាងជ្រាលជ្រៅចំពោះ លោក ឃួង ស្រេង អភិបាលរាជធានីភ្នំពេញ ដែលបានយកចិត្តទុកដាក់គិតគូរពីបញ្ហាសុខភាពសាធារណៈរបស់ពួកគាត់។

ជាមួយគ្នានេះដែរ លោកវេជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញ បានឲ្យដឹងថា នៅដើមខែមករានេះ ចាប់ពីល្ងាចថ្ងៃទី ២ ខែមករា ឆ្នាំ ២០២៥ កម្មវិធីគ្រុនឈាមមន្ទីរសុខាភិបាលរាជធានីភ្នំពេញ មានការចូលរួមពី ការិយាល័យសុខាភិបាលមេគង្គ សហការជាមួយមណ្ឌលសុខភាព និងមន្ទីរបង្អែកនានា ក្នុងមូលដ្ឋានខណ្ឌនីមួយៗ ទាំង ១៤ ក្នុងភូមិសាស្ត្ររាជធានីភ្នំពេញ បន្តចុះបាញ់ថ្នាំសម្លាប់សត្វមូលដ្ឋានតាមកម្មវិធីជារៀងរាល់ថ្ងៃ ដើម្បីបង្ការទប់ស្កាត់ជំងឺគ្រុនឈាម៕

អត្ថបទ ៖ សុភា