រដ្ឋមន្ត្រីអប់រំ ថា «គម្រោងងាយស្រួលរៀន» ជួយពង្រឹងការអប់រំកម្រិតបឋមសិក្សាដល់សិស្សនៅតំបន់ដាច់ស្រយាល

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រីក្រសួងអប់រំ យុវជន និងកីឡា បានលើកឡើងថា តាមរយៈគម្រោងងាយស្រួលរៀន (Easy to Learn) បានចូលរួមចំណែកច្រើនក្នុងការពង្រឹង និងអភិវឌ្ឍន៍ការអប់រំកម្រិតបឋមសិក្សារបស់កុមារនៅតាមតំបន់ដាច់ស្រយាលនៅកម្ពុជា។ នេះបើតាមហ្វេសប៊ុកផេករបស់ក្រសួងអប់រំ។

ការលើកឡើងនេះ ធ្វើឡើងនៅថ្ងៃទី១៥ ខែមករា ឆ្នាំ២០២៥ ក្នុងកិច្ចប្រជុំ ស្តីពីការបង្ហាញលទ្ធផលវាយតម្លៃពាក់កណ្តាលអាណត្តិនៃការអនុវត្តកញ្ចប់សម្ភារៈអំណានថ្នាក់ដំបូងរបស់គម្រោងងាយស្រួលរៀន (Easy to Learn) ជាមួយទីភ្នាក់ងារ KOICA និង Childfund Cambodia។

ក្នុងឱកាសនេះ ឧបនាយករដ្ឋមន្ត្រី រដ្ឋមន្ត្រីក្រសួងអប់រំ បានលើកឡើងថា តាមរយៈគម្រោងងាយស្រួលរៀននេះ ជួយអភិវឌ្ឍគុណភាពអប់រំនៅកម្រិតថ្នាក់បឋមសិក្សាតាមតំបន់ដាច់ស្រយាលនៅកម្ពុជា ដោយក្នុងនោះ បានបំពាក់បច្ចេកវិទ្យាព័ត៌មានទំនើប និងសម្ភារៈឧបទេសជាច្រើន ដូចជាតាប្លេត ឧបករណ៍បង្រៀន សៀវភៅ ការសាងសង់សាលារៀន និងបណ្ណាល័យ ដើម្បីជួយឱ្យកុមារអាចឆាប់ចេះអាន និងសរសេរ ឆ្លើយតបនឹងចក្ខុវិស័យរបស់ក្រសួងអប់រំ ។

បណ្ឌិតសភាចារ្យ បានបន្តថា គម្រោងនេះបានផ្លាស់ប្តូរទម្លាប់បង្រៀនរបស់គ្រូ ការគ្រប់គ្រងសាលារៀនរបស់នាយក/នាយិកា បណ្ណារក្ស ហេដ្ឋារចនាសម្ព័ន្ធ សម្ភាររៀន និងបង្រៀន ការរៀបចំថ្នាក់រៀន ការជួយកុមារពិការ កម្មវិធីប្រឹក្សាកុមារី កម្មវិធីអាហារូបករណ៍ កម្មវិធីបំណិនជីវិត ការកៀរគររកប្រភពថវិកាអភិវឌ្ឍន៍សាលា កិច្ចសហការរវាងគណៈកម្មការគ្រប់គ្រងសាលារៀន និងឪពុកម្តាយសិស្ស ជាពិសេសគម្រោងបានផ្តល់នូវវគ្គបណ្តុះបណ្តាលសមត្ថភាពដល់ក្រុមគោលដៅផងដែរ។

បើតាមក្រសួងអប់រំ គម្រោងងាយស្រួលរៀន រៀបចំឡើងក្នុងគោលបំណង លើកកម្ពស់គុណភាពអប់រំបឋមសិក្សាសម្រាប់កុមារនៅតំបន់ដាច់ស្រយាលក្នុងខេត្តក្រចេះ និងជំរុញលទ្ធផលសិក្សារបស់ពួកគេឱ្យកាន់តែល្អប្រសើរឡើង។ គម្រោងនេះបានបញ្ចប់កាលពីចុងខែវិច្ឆិកា ឆ្នាំ២០២៤ បន្ទាប់ពីបានអនុវត្តសកម្មភាពអស់រយៈ៣ឆ្នាំក្នុងសាលារៀនគោលដៅចំនួន៩ ដែលមានសកម្មភាពសំខាន់ៗដូចជា៖ កែលម្អបរិយាកាសរៀន ការបង្រៀន និងការរៀនស្របតាមគោលនយោបាយសាលាកុមារមេត្រី ពង្រឹងប្រព័ន្ធក្នុងសាលារៀន បណ្តុះបណ្តាលគ្រូ និងអ្នកគ្រប់គ្រងសាលារៀន កៀរគរកុមារដែលគ្រប់អាយុចុះឈ្មោះចូលរៀន បង្កើតបណ្ណាល័យ និងធ្វើផែនការកែលម្អសាលារៀន៕