នាវាកងទ័ពជើងទឹកឥណ្ឌាចូលចតនៅកំពង់ផែកម្ពុជា

នាវាឆ្មាំសមុទ្រឥណ្ឌា២គ្រឿងបានចូលចតនៅកំពង់ផែស្វយ័តក្រុងព្រះសីហនុ នៅម៉ោងប្រមាណ១០ព្រឹក ថ្ងៃទី១៤ ខែកុម្ភៈនេះ ក្នុងឱកាសបំពេញទស្សនៈកិច្ចរឹតចំណងមិត្តភាព និងការទូតជាមួយកម្ពុជា។

ក្នុងឱកាសនៃការចូលចតនេះដែរក៏មានវត្តមាននាយទាហានកងទ័ពជើងទឹកមូលដ្ឋានសមុទ្ររាមបានទៅទទួលស្វាគមន៌និងជូនបាច់ផ្កានៅលើកំពង់ផែប្រកបដោយភាពស្និតស្នាល។

គួរឱ្យដឹងដែរថានាវាល្បាតទាំងពីរនេះមានឈ្មោះ INS SUJATA លេខ P56 ដឹកនាំដោយ​វរនាវីទោ ARJUN SEKHAR និងនាវា ICGS VEERA លេខ 35 ដឹកនាំដោយលោកវរនាវីទោ RAMESH V TALKA។ ក្នុងនាវាទាំងពីរនោះមាននាវិកប្រមាណ ៣៥០នាក់។

មេបញ្ជាការនាវាទាំងពីរនឹងចូលជូបជាមួយមេបញ្ជាការមូលដ្ឋានសមុទ្ររាមលោកឧត្តមនាវីទោ ម៉ី ឌីណា និងអភិបាលខេត្តព្រះសីហនុលោក ម៉ាង ស៊ីណេត នៅរសៀលថ្ងៃនេះ ហើយនៅថ្ងៃស្អែកប្រតិភូឆ្មាំសមុទ្រឥណ្ឌា ក៏នឹងធ្វើទស្សនកិច្ចនៅរាជធានីភ្នំពេញ​ជាទីជួបជាមួយមេបញ្ជាការទ័ពជើងទឹកកម្ពុជា ទៀ វិញ និងទស្សនាព្រះបរមរាជវាំង សារមន្ទីរជាតិ សារៈមន្ទីរប្រល័យពូជសាសន៍ទួលស្លែង។

ក្នុងដំណើរចូលចតនៅកំពង់ផែកម្ពុជាក៏មានការហ្វឹកហ្វឺន​រួមគ្នា​ខ្នាតតូចនៅលើនាវា​ INS SUJATA លេខ​ P56 ជាមួយកម្លាំងកងទ័ពជើងទឹកមូលដ្ឋានសមុទ្ររាម​​ និង​ទីបញ្ជាការជួរមុខ​ ​អគ្គលេខាធិការដ្ឋាន​នៃគណៈកម្មាធិការ​ជាតិ​សន្តិសុខ​លម្ហសមុទ្រ​នៅមុនពេលនាវាចេញពីខេត្តព្រះសីហនុនៅថ្ងៃទី១៧ ខែកុម្ភៈផងដែរ៕

ដោយ ជីង ឡុង