ព័ត៌មានជាតិ

មន្ត្រីជាន់ខ្ពស់ ប.ស.ស ស្នើសហគ្រាស-គ្រឹះស្ថាន ជួយផ្សព្វផ្សាយអត្ថប្រយោជន៍ របបសន្តិសុខសង្គមបន្ថែមដល់កម្មករ-និយោជិត

បានផុស

២ ខែ មុន

នៅ

ថ្ងៃពុធ ២៦ មីនា ២០២៥

ដោយ

មន្ត្រីជាន់ខ្ពស់ ប.ស.ស បានស្នើសហគ្រាស គ្រឹះស្ថាន ជួយផ្សព្វផ្សាយស្តីពី“គោលការណ៍ បទប្បញ្ញត្តិច្បាប់ អត្ថប្រយោជន៍របបសន្តិសុខសង្គមបន្ថែមដល់កម្មករ-និយោជិត ដើម្បីឱ្យពួកគាត់ទទួលបានអត្ថប្រយោជន៍របបសន្តិសុខសង្គមស្របតាមបទប្បញ្ញត្តិជាធរមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំផ្សព្វផ្សាយស្តីពី “គោលការណ៍ បទប្បញ្ញត្តិច្បាប់ និងអត្ថប្រយោជន៍របបសន្តិសុខសង្គម” ជូនដល់លោក លោកស្រី ម្ចាស់សហគ្រាស គ្រឹះស្ថាន និងតំណាង សរុបចំនួន ៥០ រូប មកពី៤២ សហគ្រាស គ្រឹះស្ថាន នៅសាខា ប.ស.ស ខេត្តកំពង់ចាម កាលពីថ្ងៃទី ២៥ មីនា លោក សាយ សុធន ប្រធានសាខា ប.ស.ស ខេត្តកំពង់ចាម បានពន្យល់បកស្រាយយ៉ាងលម្អិតដល់ម្ចាស់សហគ្រាស គ្រឹះស្ថាន ពីកាតព្វកិច្ច និងអត្ថប្រយោជន៍ ដែលមានចែងក្នុងបទប្បញ្ញត្តិ នៃច្បាប់ស្តីពីរបបសន្តិសុខសង្គម ដើម្បីចៀសវាងការផាកពិន័យណាមួយដែលអនុវត្តផ្ទុយពីច្បាប់ស្ដីពីរបបសន្តិសុខសង្គម។

ជាមួយគ្នានោះ លោកប្រធានសាខា ប.ស.ស ខេត្តកំពង់ចាម ក៏បានស្នើដល់តំណាងសហគ្រាស គ្រឹះស្ថានដែលមកចូលរួមទាំងអស់ សូមជួយផ្សព្វផ្សាយបន្តដល់កម្មករ-និយោជិតបន្ថែមទៀត ដោយក្នុងនោះប្រសិនបើសមាជិក ប.ស.ស មានប្ដី ឬ ប្រពន្ធ ឬកូននៅក្នុងបន្ទុក អាចមកចុះឈ្មោះជាសមាជិក ប.ស.ស នៅគ្រប់សាខា ប.ស.ស ដែលនៅជិតបំផុត ដើម្បីទទួលបានអត្ថប្រយោជន៍របបសន្តិសុខសង្គមស្របតាមបទប្បញ្ញត្តិជាធរមាន។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា គិតត្រឹមសប្ដាហ៍ទី ៤ ខែមករា ឆ្នាំ ២០២៥ នេះ ប.ស.ស មានសមាជិកកើនឡើងដល់ ២ ៧៨៥ ៥២៦ នាក់ ស្រី ១ ៥៤៤ ២២៣ នាក់ ក្នុងនោះ បុគ្គលស្ថិតក្នុងវិស័យសាធារណៈចំនួន ៤៩៥ ៥៩៣ នាក់ , បុគ្គលក្រោមបទប្បញ្ញត្តិច្បាប់ស្តីពីការងារចំនួន ១ ៦០៣ ៤៨២ នាក់ , បុគ្គលស្វ័យនិយោជន៍ ចំនួន ៥២៣ ០១៣ នាក់ និងអ្នកក្នុងបន្ទុកសមាជិក ប.ស.ស ចំនួន ១៦៣ ៤៣៨ នាក់។

លោក កត្តា អ៊ន បានបន្តទៀតថា ការកើនឡើង នៃចំនួនសមាជិក ប.ស.ស ជាបន្តបន្ទាប់នេះ ដោយសារប្រជាពលរដ្ឋមានជំនឿទុកចិត្តមកលើសេវា ប.ស.ស និងយល់ដឹងពីអត្ថប្រយោជន៍ផ្សេងៗ ព្រោះថាមានប័ណ្ណ ប.ស.ស ជួយសម្រាលបន្ទុកក្នុងគ្រួសារបានយ៉ាងច្រើននៅពេលទៅពិគ្រោះ និងព្យាបាលជំងឺផ្សេងៗ តាមមូលដ្ឋានសុខាភិបាលជាដៃគូជាមួយ ប.ស.ស ដោយសារការចំណាយគឺជាបន្ទុករបស់ ប.ស.ស។ ដូចនេះ សមាជិក ប.ស.ស ទាំងអស់ អាចទៅទទួលសេវាពិនិត្យ និងព្យាបាលជំងឺនៅតាមមូលដ្ឋានសុខាភិបាលដែលជាដៃគូជាមួយ ប.ស.ស សរុបចំនួន ១ ៥៩៥ មូលដ្ឋាន ក្នុងនោះ មូលដ្ឋានសុខាភិបាលឯកជន ចំនួន ១៦៣ មូលដ្ឋាន៕

អត្ថបទ ៖ សំអឿន