ព័ត៌មានជាតិ

ប.ស.ស ធ្វើបច្ចុប្បន្នភាពការផ្ដល់សេវាតាមប្រព័ន្ធអនឡាញ ស្របតាមការរីកចម្រើន នៃបច្ចេកវិទ្យាថ្មីៗ

បានផុស

១ year មុន

នៅ

ថ្ងៃពុធ ២ មេសា ២០២៥

ដោយ

ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ បានធ្វើបច្ចុប្បន្នភាពអនុវត្តការផ្ដល់សេវាតាមប្រព័ន្ធអនឡាញ ស្របតាមការរីកចម្រើន នៃបច្ចេកវិទ្យាថ្មីៗ ដើម្បីផ្ដល់ភាពងាយស្រួលក្នុងការបម្រើសេវាសាធារណៈឱ្យកាន់តែល្អប្រសើរ។

ក្នុងពិធីបើកវគ្គបណ្ដុះបណ្ដាលស្ដីពីបច្ចុប្បន្នភាពការងារជំនាញផ្ទៃក្នុង ប.ស.ស កាលពីថ្ងៃទី ១ មេសា លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងថា បច្ចុប្បន្ន ប.ស.ស បានធ្វើការយ៉ាងសកម្មក្នុងដំណើរការ នៃបរិវត្តកម្មបច្ចេកវិទ្យា សំដៅដល់ការផ្ដល់សេវាគាំទ្រតាមរយៈប្រព័ន្ធអនឡាញ ដើម្បីផ្ដល់ភាពងាយស្រួលក្នុងការបម្រើសេវាសាធារណៈឱ្យកាន់តែល្អប្រសើរ និងឆាប់រហ័សជូនសមាជិករបស់ខ្លួន។

លោកបណ្ឌិត អគ្គនាយករង ប.ស.ស បានបន្ថែមថា គិតត្រឹមបំណាច់ខែមីនា ឆ្នាំ ២០២៥ នេះ ប.ស.ស បានធ្វើបរិវត្តកម្មបច្ចេកវិទ្យាដែលរួមមាន ៖ បញ្ជរសេវាសាធារណៈចល័ត ដើម្បីចុះបញ្ជិកា បង្កើតកម្មវិធីវេបផតថលក្នុងការចុះបញ្ជីសហគ្រាស/គ្រឹះស្ថាន និងបង់ភាគទានតាម online បង្កើតកម្មវិធីទូរស័ព្ទដៃសម្រាប់សមាជិក ប.ស.ស ដើម្បីសមាជិក ប.ស.ស អាចចុះឈ្មោះជាបុគ្គលស្វ័យនិយោជន៍ និងចុះបញ្ជីអ្នកក្នុងបន្ទុករបស់ខ្លួន បង្កើតប្រព័ន្ធតាមដាន (Tracking System) លើការចុះកិច្ចព្រមព្រៀងរវាង ប.ស.ស និងមូលដ្ឋានសុខាភិបាល ការទូទាត់ជូនមូលដ្ឋានសុខាភិបាលដៃគូ ប.ស.ស ប្រព័ន្ធទាមទារតាវកាលិក និងមានប្រព័ន្ធបណ្តឹងអនាមិកផងដែរ។

លោកបណ្ឌិត អគ្គនាយករង ប.ស.ស ក៏បានរំលេចបន្ថែមថា ប.ស.ស នឹងអភិវឌ្ឍន៍សមត្ថភាពការងាររបស់ខ្លួនជាបន្តបន្ទាប់ និងរៀបចំប្រតិបត្តិការការងារទៅជាប្រព័ន្ធទាំងអស់។ ទន្ទឹមនឹងការវិវត្តន៍ខ្លួនឈានទៅរកប្រព័ន្ធបច្ចេកវិទ្យានេះ ទាមទារឱ្យថ្នាក់ដឹកនាំគ្រប់លំដាប់ថ្នាក់ និងគ្រប់សាខាខេត្ត-ខណ្ឌទាំងអស់ ត្រូវចូលរួមស្វែងយល់បន្ថែម តាមរយៈវគ្គបណ្ដុះបណ្ដាលនាឱកាសនេះ ដើម្បីពង្រឹង និងពង្រីកសមត្ថភាពបន្ថែមដែលអាចអនុវត្តការងារតាមបរិបទថ្មី ប្រកបដោយជោគជ័យ និងបង្កើនទំនុកចិត្តកាន់តែខ្លាំងពីសមាជិកគ្រប់រូប៕

អត្ថបទ ៖ សំអឿន