ព័ត៌មានជាតិ

អ្នកនាំពាក្យ ៖ ប.ស.ស បានក្លាយជានិមិត្តរូប នៃសុខភាពក្នុងចិត្តរបស់ប្រជាជន

បានផុស

១ year មុន

នៅ

ថ្ងៃសុក្រ ២ ឧសភា ២០២៥

ដោយ

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា ប.ស.ស បានក្លាយជានិមិត្តរូប នៃសុខភាពក្នុងចិត្តរបស់ប្រជាជន ដោយអាចជួយកាត់បន្ថយបន្ទុកចំណាយ ពង្រឹងស្ថិរភាព និងការព្យាករណ៍បាន នៃចំណូល ព្រមទាំងធ្វើឱ្យប្រសើរឡើងនូវសុខភាពរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងឱកាសពិធីអបអរសាទរទិវាពលកម្មអន្តរជាតិ ០១ ឧសភា ខួបលើកទី ១៣៩ ក្រោមប្រធានបទ “ចូលរួមសហជីព សមាគម ដើម្បីលើកកម្ពស់ជីវភាព និងប្រព័ន្ធគាំពារសង្គម” នៅក្នុងបរិវេណសួនច្បារកោះនរាហ៍ សង្កាត់និរោធ ខណ្ឌច្បារអំពៅ រាជធានីភ្នំពេញ កាលពីថ្ងៃទី ១ ឧសភា លោកបណ្ឌិត បានថ្លែងថា ប.ស.ស បានក្លាយជានិមិត្តរូប នៃសុខភាពក្នុងចិត្តរបស់ប្រជាជន ដោយអាចជួយកាត់បន្ថយបន្ទុកចំណាយ ពង្រឹងស្ថិរភាព និងការព្យាករណ៍បាន នៃចំណូល ព្រមទាំងធ្វើឱ្យប្រសើរឡើងនូវសុខភាពរបស់ខ្លួន។

លោកបណ្ឌិត បានបន្តថា រាជរដ្ឋាភិបាលកម្ពុជា ដែលមានក្រសួងការងារ និងបណ្ដុះបណ្ដាលវិជ្ជាជីវៈ ជាសេនាធិការ មានបេសកកម្មការពារសិទ្ធិ និងផលប្រយោជន៍កម្មករ-និយោជិត ព្រមទាំងបង្កនូវបរិយាកាសកាន់តែប្រសើរឡើងក្នុងការលើកកម្ពស់សុខដុមនីយកម្មក្នុងទំនាក់ទំនងវិជ្ជាជីវៈ , បង្កើតនូវវប្បធម៌អនុលោមភាពតាមច្បាប់ , ពង្រឹងប្រសិទ្ធភាព នៃយន្តការដោះស្រាយវិវាទការងារក្រៅប្រព័ន្ធតុលាការ , ពង្រឹងការអនុវត្តរបបសន្តិសុខសង្គម និងបង្កើនផលិតភាពការងារ។

លោកបណ្ឌិត បានកោតសរសើរ និងវាយតម្លៃខ្ពស់ចំពោះសហភាពការងារកម្ពុជា សហព័ន្ធ សហជីព សមាគម អង្គការសង្គមស៊ីវិល និងកម្មក-និយោជិតទាំងអស់ សម្រាប់កិច្ចសហការនៅក្នុងការរៀបចំកម្មវិធីនេះឡើង ហើយក៏ជាចលករដ៏សំខាន់ នៃការលើកស្ទួយសេដ្ឋកិច្ចជាតិ ក្នុងវិស័យសំខាន់ៗ ដូចជា វិស័យឧស្សាហកម្មកាត់ដេរ ទេសចរណ៍ សេវាកម្ម កសិកម្ម សំណង់ និងសេដ្ឋកិច្ចក្រៅប្រព័ន្ធផងដែរ។

បើតាមលោកបណ្ឌិត គិតមកត្រឹមសប្ដាហ៍ទី ៣ ខែមេសា ឆ្នាំ ២០២៥ នេះ សមាជិក ប.ស.ស បានកើនឡើងដល់ ៣ ០៥៥ ៣៤៨ នាក់ ស្រី ១ ៦៨៥ ៤៥៦ នាក់ ក្នុងនោះ បុគ្គលស្ថិតក្នុងវិស័យសាធារណៈចំនួន ៥០៦ ០៦៥ នាក់ ស្រី ១៤៩ ៤១៥ នាក់ បុគ្គលស្ថិតក្នុងវិស័យឯកជនចំនួន ១ ៨៦៦ ០៦៥ នាក់ ស្រី ១ ១២៦ ១៨៩ នាក់ បុគ្គលស្វ័យនិយោជន៍ចំនួន ៤៩៩ ៥៩៣ នាក់ ស្រី ៣០៤ ០៨២ នាក់ និងអ្នកក្នុងបន្ទុក ១៨៣ ៦២៥ នាក់ ស្រី ១០៥ ៧៧០ នាក់៕

អត្ថបទ ៖ សំអឿន