សម្ដេចធិបតី អបអរលោក Lawrence Wong នាយករដ្ឋមន្ត្រីសិង្ហបុរី ដែលឈ្នះឆ្នោតបន្តកាន់តំណែង

សម្ដេចធិបតី ហ៊ុន​ ម៉ាណែត នាយករដ្ឋមន្ត្រីកម្ពុជា តេទូរសព្ទទៅលោក Lawrence Wong នាយករដ្ឋមន្ត្រីសិង្ហបុរី ដើម្បីអបអរសាទរជាមួយនឹងជោគជ័យរបស់គណបក្សសកម្មភាពប្រជាជន (People’s Action Party) របស់លោក ក្នុងការបោះឆ្នោតសហព័ន្ធ កាលពីថ្ងៃសៅរ៍ទី ៣ ខែឧសភា ឆ្នាំ២០២៥ កន្លងទៅនេះ។

តាមរយៈគណនីហ្វេសប៊ុកផ្លូវការ សម្ដេចធិបតី ហ៊ុន ម៉ាណែត វាយតម្លៃថា កំណើននៃចំនួនអាសនៈក្នុងសភា ក៏ដូចជាសំឡេងឆ្នោតគាំទ្រគណបក្ស PAP ដែលជាគណបក្សកាន់អំណាច បង្ហាញឲ្យឃើញច្បាស់នូវទំនុកចិត្តខ្ពស់របស់ប្រជាពលរដ្ឋសង្ហបុរី ចំពោះការដឹកនាំរបស់ឯកឧត្តមនាយករដ្ឋមន្ត្រី។

សម្ដេច ហ៊ុន ម៉ាណែត រម្លឹកថា ក្នុងអំឡុងពេលនៃទស្សនកិច្ចផ្លូវការទៅកាន់ប្រទេសសិង្ហបុរីកាលពីខែមិថុនា ឆ្នាំ២០២៤ កន្លងទៅ បន្ទាប់ពី លោកLawrence Wong ទទួលបានដំណែងជានាយករដ្ឋមន្ត្រី សម្ដេច និងលោក Lawrence Wong ទាំងពីរបានពិភាក្សាគ្នាជាច្រើន ក្នុងគោលដៅពង្រឹងទំនាក់ទំនងទ្វេភាគីរវាងប្រទេស និងប្រជាជនទាំងពីរ។

ស្របពេលឆ្នាំនេះគឺជាខួបទី ៦០ឆ្នាំ នៃទំនាក់ទំនងការទូតរវាងប្រទេសកម្ពុជានិងសិង្ហបុរី សម្ដេច ហ៊ុន ម៉ាណែត ជឿជាក់យ៉ាងមុតមាំថា ក្រោមការដឹកនាំរបស់លោក Lawrence Wong,   កម្ពុជា និងសិង្ហបុរី នឹងមានឱកាសធ្វើការរួមគ្នាដើម្បីបន្តលើកកម្ពស់កិច្ចសហប្រតិបត្តិការលើគ្រប់វិស័យឱ្យកាន់តែល្អប្រសើរបន្ថែមទៀត ដែលនឹងផ្តល់ ផលប្រយោជន៍រួមជូនប្រទេសនិងប្រជាជនទាំងពីរ។

សម្ដេច ហ៊ុន ម៉ានែត អះអាងថា នឹងរង់ចាំស្វាគមន៍ លោក Lawrence Wong នាយករដ្ឋមន្ត្រីសិង្ហបុរី មកធ្វើទស្សនកិច្ចជាផ្លូវការនៅកម្ពុជា នាពេលអនាគត។

ជាការកត់សម្គាល់ នៅសប្ដាហ៍ទី១ នៃខែឧសភា នេះ សម្ដេចធិបតី ហ៊ុន ម៉ាណែត​ នាយករដ្ឋមន្ត្រីកម្ពុជា បានទូរសព្ទទៅអបអរសាទរនាយករដ្ឋមន្ត្រីប្រទេសចំនួន២ ដែលជាប់ឆ្នោត ទទួលបានឱកាសកាន់តំណែងជានាយករដ្ឋមន្ត្រីបន្តទៀត។ នាយករដ្ឋមន្ត្រីទាំងពីរនោះ គឺលោក Anthony Albenese  នាយករដ្ឋមន្ត្រីអូស្រ្តាលី ដែលសម្ដេចទូរសព្ទទៅកាលពីថ្ងៃម្សិលមិញ ទី០៦ និងលោក Lawrence Wong នាយករដ្ឋមន្ត្រីសិង្ហបុរី នាថ្ងៃទី០៧ ខែឧសភា នេះ។

ក្រៅពីនេះ គឺកាលពីចុងខែមេសា គឺនៅថ្ងៃទី២៩ សម្ដេច ហ៊ុន ម៉ាណែត នាយករដ្ឋមន្ត្រីកម្ពុជា​ បានទូរសព្ទទៅលោក Anwar Ibrahim នាយករដ្ឋមន្ត្រីម៉ាឡេស៊ី និងជាប្រធានប្ដូរវេនអាស៊ានសម្រាប់ឆ្នាំ២០២៥ ដើម្បីជជែកអំពីបញ្ហាពាក់ព័ន្ធនឹងតួនាទីរបស់អាស៊ានក្នុងការជួយរកដំណោះស្រាយវិបត្តិនៅប្រទេសមីយ៉ាន់ម៉ា, វិធានការពន្ធរបស់សហរដ្ឋអាមេរិក និងការចូលជាសមាជិកពេញសិទ្ធិរបស់ប្រទេសទីម៉័រខាងកើតក្នុងសហគមន៍អាស៊ាន។

នាយករដ្ឋមន្ត្រីទាំង៣ ខាងលើ ដែលសម្ដេចធិបតី ទូរសព្ទទៅដោយផ្ទាល់ គឺសុទ្ធតែជានាយករដ្ឋមន្ត្រីដែលសម្ដេច បានជួបដោយផ្ទាល់នាពេលកន្លងមក ក្នុងក្របខណ្ឌទស្សនកិច្ចផ្លូវការ និងក្របខណ្ឌទស្សនកិច្ចការងារ ក្នុងឆ្នាំ២០២៤ កន្លងទៅ។ សម្ដេចធិបតី ហ៊ុន ម៉ាណែត បានជួបលោក Anwar Ibrahim នាយករដ្ឋមន្ត្រីម៉ាឡេស៊ីដោយផ្ទាល់ ក្នុងពេលបំពេញទស្សនកិច្ចផ្លូវការនៅម៉ាឡេស៊ីកាលពីថ្ងៃទី២៧ ខែកុម្ភៈ។ ចំណែកលោក Anthony Albenese  នាយករដ្ឋមន្ត្រីអូស្រ្តាលី, សម្ដេចធិបតី ហ៊ុន ម៉ាណែត បានជួបដោយផ្ទាល់ក្នុងជំនួបទ្វេភាគី កាលពីថ្ងៃទី០៥ ខែមីនា ឆ្នាំ២០២៤ កន្លងទៅ នៅក្រៅកិច្ចប្រជុំពិសេសអាស៊ាន-អូស្ត្រាលី គម្រប់ខួប៥០ឆ្នាំ។ សម្ដេចធិបតី ហ៊ុន ម៉ាណែត ក៏បានជួប លោក Lawrence Wong នាយករដ្ឋមន្ត្រីសិង្ហបុរីដោយផ្ទាល់នៅក្នុងដំណើរទស្សនកិច្ចផ្លូវការនៅសិង្ហបុរី កាលពីថ្ងៃទី១៨ ខែមិថុនា​ ឆ្នាំ២០២៤ ផងដែរ៕

ដោយ៖ ង៉ិល ណារ៉ាត់