រដ្ឋបាលខេត្តកំពង់ចាមប្រកាសរកឃើញករណីវិជ្ជមានកូវីដ១៩ថ្មី២នាក់បន្ថែមទៀត

យោងតាម​សេចក្ដីប្រកាសព័ត៌មាន​របស់រដ្ឋបាលខេត្តកំពង់ចាម ចុះថ្ងៃទី៣០​ ខែមីនា ឆ្នាំ២០២១នេះ បានឲ្យដឹងថា រកឃើញករណីវិជ្ជមានកូវីដ១៩ថ្មី ចំនួនពីរនាក់ ដែលជាអ្នកកំដរ និងអ្នកប៉ះពាល់​ផ្ទាល់​ជាមួយអ្នកជំងឺកូវីដ១៩ ឈ្មោះ អាង សុខា ភេទស្រី អាយុ ៧៤ឆ្នាំ ដែលសម្រាកព្យាបាល​នៅ​មន្ទីរ​ពេទ្យកាលម៉ែត្រ។

ក្នុងសេចក្ដីប្រកាសនោះ​បានបញ្ជាក់ថា អ្នកវិជ្ជមានទាំងពីរនាក់រួមមាន ឈ្មោះ ស្រ៊ី សុខលាង ភេទ​ស្រី​អាយុ​៥៥ឆ្នាំ រស់នៅភូមិអូររុន ឃុំខ្ពបតាងួន ស្រុកស្ទឹងត្រង់ ។ ឈ្មោះ ស៊ន ហេង ភេទស្រី អាយុ​៧៥ឆ្នាំ នៅភូមិអូររុន ឃុំខ្ពបតាងួន ស្រុកស្ទឹងត្រង់។

អ្នកជំងឺទាំងពីរ​នាក់​ត្រូវបានមន្ត្រីសុខា​ភិបាលយក​សំណាក និងបញ្ជូនមកធ្វើចត្តាឡីស័ក នៅមជ្ឍ​មណ្ឌលគរុកោសល្យភូមិភាគខេត្តកំពង់ចាម កាលពីថ្ងៃទី២៧ ខែមីនា និងបញ្ជូនបន្តមកមន្ទីរ​ពេទ្យ​ខេត្តកំពង់​ចាម បន្ទាប់ពីទទួលលទ្ធផលវិជ្ជមានកូវីដ១៩ នៅថ្ងៃទី២៩ ខែ​មីនា នេះ។

ក្រុមការងារមន្ត្រីសុខាភិបាល កំពុងធ្វើការស្រាវជ្រាវរកអ្នកប៉ះពាល់ដោយផ្ទាល់ និងដោយ​ប្រយោល​ជាមួយអ្នកជំងឺបន្តទៀត។

គួរបញ្ជាក់ថា អ្នកជំងឺឈ្មោះ អាង សុខា ភេទស្រី អាយុ៧៤ ត្រូវបាន​ក្រុមគ្រូពេទ្យរកឃើញវិជ្ជមាន​កូវីដ១៩ កាលពីថ្ងៃទី២៧ ខែមីនា ឆ្នាំ២០២១ នៅមន្ទីរពេទ្យកាល់ម៉ែត៕

អត្ថបទ ៖ សុខុម