របរចិញ្ចឹមសត្វកណ្ដូប ការងារ​ក្រោម​តែ​ម្លប់​ អាច​ឲ្យកសិករ​រក​ចំណូល​រស់នៅ​យ៉ាង​ស្រួល

ការចិញ្ចឹមសត្វកណ្ដូប ជារបបមួយដែលអាចរកប្រាក់ចំណូល និងចំណាយពេលវេលាតិច ក្នុងការចិញ្ចឹម ប៉ុន្តែក៏ប្រឈមនឹងបញ្ហាងាយងាប់ផងដែរនៅ​រដូវវស្សា។ នេះតាមការឲ្យដឹងពីអ្នក​ស្រី ហេង ពៅ រស់នៅភូមិវត្ត ឃុំកោះច្រែង ស្រុកចិត្របុរី ខេត្តក្រចេះ។

កាលពីដើមឡើយអ្នកស្រី ហេង ពៅ និងស្វាមី បានជិះម៉ូតូរកស៊ីទៅដល់ខេត្តបាត់ដំបង ក៏ប្រទះឃើញគេចិញ្ចឹមសត្វកណ្ដូប ក៏បានជជែកសួរនាំគ្នា ហើយអ្នកចិញ្ចឹមកណ្ដូបក៏បានប្រាប់ថា៖ “បើសិនបងឯងអត់ថវិកា មិនដឹងរកស៊ីអ្វី បងឯងអាចយកកណ្ដូបនេះទៅចិញ្ចឹមបាន។ ខ្ញុំអាណិតបងឯង ព្រោះឃើញបងឯងអត់ បងឯងទិញពងយកទៅតែមួយគីឡូទៅ ចិញ្ចឹមរស់ហើយ ព្រោះបងឯងអត់ កាលពីដំបូងខ្ញុំក៏អញ្ចឹងដែរ”។

ដោយមើលឃើញថា របរនេះអាចធ្វើបាននិងមើលឃើញពីភាពជោគជ័យរបស់ម្ចាស់កសិដ្ឋានចិញ្ចឹមសត្វកណ្ដូបនៅខេត្តបាត់ដំបង អ្នកស្រី ហេង ពៅ ក៏សម្រេចចិត្តប្រកបរបរចិញ្ចឹមសត្វកណ្ដុបនេះតែម្តង។ ការប្រកបរបរនេះ ហត់បន្តិចមែនតែនៅក្នុងម្លប់ រាល់ថ្ងៃអ្នកស្រី ហេង ពៅ តែងតែរកស្មៅ ក៏ដូចជា ស្លឹកចេក ដើម្បីឲ្យសត្វកណ្ដូបស៊ីជាចំណី ដោយមិនត្រូវបានប្រើដើមទុនច្រើនឡើយ។

នៅក្នុងការចិញ្ចឹមសត្វកណ្តូប អ្នកស្រី ហេង ពៅ ទិញយកពងសត្វកណ្ដូបតែត្រឹមតែ ១ គីឡូក្រាម អាចចិញ្ចឹមបានកណ្ដូប​សាច់ស្មើនឹង ១០ គីឡូក្រាម។ ដោយកាលនោះ អ្នក​ស្រីបានចំណាយថវិកា ៦០ ម៉ឺនរៀល ដើម្បីទិញពងសត្វកណ្ដូបចំនួន ១ គីឡូក្រាម ចាប់តាំងពីពេលភ្ញាស់ពងរហូតដល់ពេលទទួលបានផល គឺត្រូវប្រើរយៈពេល ៤៥ ថ្ងៃ។ ហើយប្រសិនបើពេញលក់តែម្ដងនោះ គឺត្រូវចំណាយពេល ៥០ ថ្ងៃ ហើយរយៈពេល ៥០ ថ្ងៃនេះ ក៏ជាពេលអាចប្រមូល​ផល​ពងសត្វកណ្តូបវិញបានដែរ។ ដោយក្នុងមួយឆ្នាំ អាចប្រមូលផលពីសត្វកណ្ដូបលក់បានចំនួន ៤ ដង ឯណោះ។

បើតាម​ស្រី ហេង ពៅ នារដូវវស្សានេះ មាន​បញ្ហាប្រឈមក្នុងការចិញ្ចឹមសត្វកណ្តូប ពីព្រោះមានភ្លៀងធ្លាក់ច្រើន ដែលបណ្ដាលឲ្យសត្វកណ្ដូបងាប់ច្រើន។ ចំពោះទីផ្សារនិងការលក់ដូរវិញឲ្យតែមាន គឺអ្នកទិញមកទិញដល់កន្លែងតែម្ដង។

អ្នកស្រី ហេង ពៅ មានគម្រោងពង្រីកមុខរបរនេះបន្ថែមទៀត រហូតទៅដល់ ១០ ទ្រុងឯណោះ ដោយក្នុងមួយទ្រុង មានទំហំ ២ គុណនឹង ៨ ម៉ែត្រ ដែលជាទំហំធំ ចំពោះតម្លៃលក់នៅតាមភូមិ គឺក្នុង ១ គីឡូ ៣ ម៉ឺនរៀល ទោះបីជាតម្លៃសត្វកណ្ដូបនោះ ឡើង ឬធ្លាក់ចុះក្តី ក៏លក់តម្លៃ ៣ ម៉ឺនរៀលដែរ ចំពោះតាមភូមិ ហើ​យ​បើ​តាម​កសិករ​​រូប​នេះ​អះអាង​ថា សត្វកណ្ដូបគឺជាពូជល្អ ហូបហើយចង់ហូបទៀត។

អ្នកស្រី ហេង ពៅ ក៏បានណែនាំដល់បងប្អូនប្រជាពលរដ្ឋ ប្រសិនបើអត់ទាន់មានមុខរបរ អត់មានលុយ មិនដឹងធ្វើអ្វីមានដីទំនេរ អាចទិញពងសត្វកណ្ដូបត្រឹមតែ ៥០ក្រាម ទៅចិញ្ចឹមក៏បាន ហើយអាចទទួលបានផលចន្លោះពី ៣ គីឡូទៅ ៤ គីឡូឯណោះ។ ចំពោះបច្ចេកទេសក្នុង​ការ​ចិញ្ចឹម ប្រសិនបើទិញពូជពីលោកស្រី លោកស្រីនឹងទៅបង្រៀនផ្ទាល់រហូតដល់ពងញ៉ោះណែនទ្រូង៕

អត្ថបទ៖ ប្រុញ វិធិន