មួយឆ្នាំៗកម្ពុជា​យក​ប្រាក់​មិនតិចជាង ៥ ពាន់​លាន​​ដុល្លារទៅទិញទំនិញពី​ថៃ

សម្តេច​តេជោ ហ៊ុន សែន បាន​អះអាង​ថា ក្នុងមួយឆ្នាំៗ​ពលរដ្ឋ​កម្ពុជា​បាន​យក​ប្រាក់​មិនតិចជាង ៥ ពាន់​លាន​ដុល្លារទៅទិញទំនិញពី​​ប្រទេស​ថៃ។

ការ​លើកឡើង​​របស់​អតីតនាយករដ្ឋមន្រ្តីកម្ពុជា ក្រោយ​ថ្មីៗនេះ​មាន​ជន​ជ្រុលនិយម​ថៃ​បាន​ធ្វើ​ទង្វើ​អសីលធម៌ ដោយយក​​រូបប្រមុខដឹកនាំ​កម្ពុជា​​ទៅ​ធ្វើ​ជា​ហ្គេមបាញ់កម្សាន្ត​យក​រង្វាន់។

ឆ្លើយតបទង្វើ​អសីលធម៌​អន់ជាង​សត្វ​នេះ ​ប្រធានព្រឹទ្ធសភាកម្ពុជា​សម្តេច​តេជោ​ ហ៊ុន សែន បាន​ថ្លែង​ថា ទោះជាប្រទេសកម្ពុជា​តូច ប្រជាជនមានចំនួនតិច សេដ្ឋកិច្ចនៅ​ទន់ខ្សោយ តែក៏​មិន​ខ្សោយ​ខាងសីលធម៌​នោះ​ដែរ។

ស្របពេលដែល​ប្រមុខដឹកនាំកម្ពុជាមើលឃើញ​ថា ​ថ្នាក់ដឹកនាំ​ថៃកំពុង​​វាយក្បាលគេត្រូវក្បាលខ្លួនឯងនោះ​ អតីតនាយករដ្ឋមន្រ្តី​កម្ពុជា​​បាន​អះអាង​ថា កម្ពុជាធ្លាប់យកប្រាក់ក្នុងមួយឆ្នាំៗមិនតិចជាង ៥ ពាន់លានដុល្លារទៅទិញទំនិញពី​ថៃ។ ការ​បង្វិលលុយនេះ​មកទិញទំនិញក្នុងស្រុក នឹង​​ធ្វើឱ្យទំនិញផលិតក្នុងស្រុកមានទីផ្សារដែល​ជាឱកាសពង្រឹងសេដ្ឋកិច្ចកម្ពុជា​។ សម្តេច​តេជោ ហ៊ុន សែន បញ្ជាក់។

«យើងមិនដែលបានទៅសុំទំនិញថៃមកលក់ក្នុងទីផ្សារយើងទេ គឺយកលុយទៅទិញ។ សូមអ្នកដឹកនាំថៃកុំយល់ច្រឡំ និងប្រមាថកម្ពុជាបន្តទៀត។ យើងដឹងថា ពួកអ្នកជាអ្នកមានជាងកម្ពុជា តែអ្នកក៏ត្រូវយល់ថាយើងក៏បានយកលុយទៅទិញទំនិញ​​ថៃ ទើបធ្វើឱ្យប្រជាជនថៃមានទីផ្សាររកប្រាក់ចំណូល»។

សម្តេច​បន្ត​ថា «សូមប្រជាជនថៃដែលធ្លាប់លក់ទំនិញមកកម្ពុជា កុំខឹងកម្ពុជាដែលជាអតិថិជនដ៏ធំត្រូវបាត់បង់ដែលនេះមិនមែនជាកំហុសរបស់កម្ពុជានោះទេ»។

ចាប់​​​តាំងកម្ពុជា​និង​ថៃ​កើតមាន​ជម្លោះព្រំដែន​រហូត​ឈាន​ដល់ការ​ផ្ទុះអាវុធ​ ក្រោយថៃ​បើកការ​ឈ្លាន​ពាន​ចូល​ដណ្តើមទឹកដី​កម្ពុជា ការធ្វើពាណិជ្ជកម្មរវាងប្រទេស​ទាំងពីរបានបង្ហាញសញ្ញាណ​ធ្លាក់ចុះជាបន្តបន្ទាប់។

យោងតាមរបាយការណ៍អគ្គនាយកដ្ឋាននិងរដ្ឋាករកម្ពុជា ក្នុងរយៈពេល ៨ ខែ ឆ្នាំ២០២៥ ការធ្វើពាណិជ្ជកម្មរវាងកម្ពុជា និងថៃមានតម្លៃ ២.៦ ពាន់លានដុល្លារ ថយចុះ ​៦.៤% បើធៀបរយៈពេលដូចគ្នាកាលពីឆ្នាំ ២០២៤ ក្នុងនោះកម្ពុជានាំចេញទៅថៃមានតម្លៃជាង ៥៣៤ លានដុល្លារ ខណៈថៃនាំចូលមកកម្ពុជាមានតម្លៃ ២.១​ ពាន់លានដុល្លារ៕