លោក កែវ រ៉េមី ស្នើឲ្យអ្នករាយការណ៍ពិសេស UN ធ្វើរបាយការណ៍ឲ្យមានតុល្យភាព

លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានស្នើអ្នករាយការណ៍ពិសេសរបស់អង្គការសហប្រជាជាតិទទួលបន្ទុកបញ្ហាសិទ្ធិនៅកម្ពុជាឲ្យធ្វើរបាយការណ៍ប្រកបដោយតម្លាភាព និងតុល្យភាព។ លោកបានស្នើបែបនេះ នៅខណៈដែលលោកទទួលជួបពិភាក្សាការងារជាមួយលោក វិទិត មុនតាប៊ន (Vitit Muntarbhorn) អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា កាលពីនារសៀលថ្ងៃទី២៤ ខែមីនា ឆ្នាំ២០២២ ម្សិលមិញនេះ តាមប្រព័ន្ធវីដេអូ Zoom។

នៅក្នុងកិច្ចប្រជុំនោះ លោក Vitit Muntarbhorn បានចោទសួរប្រធានគណៈកម្មការធិការសិទ្ធិមនុស្សកម្ពុជាចំនួន៣ ចំណុចដែលរួមមាន ការបង្កើតស្ថាប័នសិទ្ធិមនុស្សជាតិ លំហរប្រជាធិបតេយ្យនៅកម្ពុជា និងការដឹក នាំស្ថាប័នសិទ្ធិមនុស្សអាស៊ានជាដើម។ ក្រៅពីនេះ ក៏មានជជែកពីបញ្ហាសិទ្ធិនៅកម្ពុជានាពេលបច្ចុប្បន្ន រួមទាំងបញ្ហាវិវាទក្នុងក្រុមហ៊ុនណាហ្គាវើលដ៍ផងដែរ។

លោក កែវ រ៉េមី រដ្ឋមន្ត្រីប្រតិភូមិអមនាយករដ្ឋមន្ត្រី និងជាប្រធានគណៈកម្មាធិការសិទ្ធិមនុស្ស បានស្នើឱ្យថ្លឹងថ្លែងពីភាព ស្មើគ្នារវាងរបាយការណ៍រដ្ឋាភិបាល និងក្រុមអង្គការសង្គមស៊ីវិលមួយចំ​នួន ព្រមទាំងគណបក្សប្រឆាំងរដ្ឋាភិបាល ជំវិញរបាយការណ៍ស្តីពីការសិទ្ធិមនុស្ស មុនបញ្ជូនទៅទីក្រុងហ្សឺណែវ។ លោកថា៖ «រឿងរបស់គាត់យកពីខាង NGO ឬគណបក្សមិនមែនរដ្ឋាភិបាល ប្រឆាំងនឹងរដ្ឋាភិបាលក៏ដោយ ខ្ញុំអត់ខ្វល់ ខ្ញុំថា សុំឱ្យគាត់យកទិន្នន័យពីយើង ដើម្បីបង្ហាញឱ្យឃើញពីភាពស្មើគ្នាថា នេះជាការខិតខំប្រឹងប្រែងរបស់រាជរដ្ឋាភិបាល បានប្រឹងប្រែងធ្វើដល់កម្រិតនេះ»។

លោក កែវ រ៉េមី បានប្រាប់កុំឱ្យយល់ច្រឡំពីតួនាទីរបស់អ្នករាយការណ៍ពិសេសទទួលបន្ទុកសិទ្ធិមនុស្សអង្គការសហប្រជាជាតិ។ លោកថា របាយការណ៍បានពីណា លោកអត់ដឹង ប៉ុន្តែត្រូវយករបាយការណ៍របស់រដ្ឋាភិបាលកម្ពុជាទៅដាក់ផង ដើម្បីឱ្យមានតុល្យភាព។ ដូច្នេះ ត្រូវជជែកគ្នាជាមួយភាគីពាក់ព័ន្ធ ដើម្បីឱ្យទទួលបានព័ត៌មានលម្អិត។ បើទោះជាយ៉ាងណា សម្រាប់ក្នុងជំនួបនេះ គឺភាគីទាំងពីរ មានការឯកភាព និងយោគយល់គ្នាច្រើនជុំវិញលំហរប្រជាធិបតេយ្យ និងការគោរពសិទ្ធិមនុស្សនៅកម្ពុជា៕

កោះកែវ