កម្ពុជា និងអាមេរិកពង្រឹងកិច្ចសហប្រតិបត្តិការ​លើការគ្រប់គ្រងអាងទន្លេ

កម្ពុជា និងអាមេរិកបន្តពង្រឹងកិច្ចសហប្រតិបត្តិការលើការគ្រប់គ្រងអាងទន្លេដើម្បីការអភិវឌ្ឍ ប្រកបដោយប្រសិទ្ធភាព និងដោយចីរភាព។

ការពង្រឹងកិច្ចសហប្រតិបត្តិការនេះបានធ្វើឡើងកាលពីពេលថ្មីៗនេះនៅក្នុងជំនួបពិភាក្សាគ្នារវាងលោកបណ្ឌិត អ៊ិត ប្រាំង រដ្ឋលេខាធិការប្រចាំការនៃក្រសួងរ៉ែ និងថាមពល និងលោកស្រីឧត្តមសេនីយ៍ Diana Holland គណៈប្រតិភូគណៈ​កម្មការទន្លេមីស៊ីស៊ីពី នៃសហរដ្ឋអាមេរិក ។

នៅក្នុងជំនួបនោះ លោករដ្ឋលេខាធិការប្រចាំការ បានលើកឡើងអំពីផែនការលម្អិត និងអត្ថប្រយោជន៍នៃគម្រោង​នាពេលអនាគតក្នុងការការពារអាងទន្លេមេគង្គ  និងការគ្រប់គ្រងទឹកក្នុងអាងដើម្បីប្រើប្រាស់បានយូរឆ្នាំ និងសម្រាប់​ជលផលនានា។

បន្ថែមពីនេះ​ លោករដ្ឋលេខាធិការ ក៏បានមានប្រសាសន៍បន្ថែមអំពីសារៈសំខាន់នៃការប្រើប្រាស់វារីអគ្គិសនីនៅកម្ពុជា ដែលជួយដល់អាងទន្លេមគង្គផងដែរ។

ជាការឆ្លើយតប​ លោកស្រីឧត្តមសេនីយ៍ Diana Holland បានសម្ដែងនូវការកោតសរសើរចំពោះសកម្មភាពការងារ​របស់កម្ពុជាដែលបានអនុវត្តក្រោម MoU រវាងគណៈកម្មការទន្លេទាំងពីរ កន្លងមកលើការគ្រប់គ្រងធនធានទឹក ជាពិសេស​អាងទន្លេមគង្គនេះ បានយ៉ាងល្អប្រសើរ៕ សំអឿន