ត្រូវប្រុងប្រយ័ត្ន! បីយ៉ាងបណ្តាលឱ្យធ្លាក់សម្ភាសន៍ការងារភ្លាមៗ

ការធ្វើសម្ភាសន៍ មិនមែនជារឿងងាយស្រួលទេ​ ទោះបីជាយើងមានស្លាកស្នាមពូកែ មាន​បទពិសោធន៍ក្រាស់ក្រែលយ៉ាងណាកុំប្រហែសឱ្យសោះ​ត្បិតអីបើវាមិនសំខាន់គេមិន​ធ្វើសម្ភាសន៍ឡើយ។ ជាទូទៅប្រសិន​សម្គាល់ឃើញ​យើងមាន​ជំនាញល្អ​ហើយ​ពេញចិត្ត គេអាចនឹង​ជួបសម្ភាសន៍ផ្ទាល់មាត់​ដើម្បីពិនិត្យ​មើលអកប្បកិរិយា​ អត្តចរិត​និងលទ្ធភាពទំនាក់ទំនង ឬសមត្ថភាពធ្វើការជាក្រុម​ ក្នុងខ្លួនយើង​ដែលជាជំនាញដ៏កំពូលនាពេលបច្ចុប្បន្ន​ហៅកាត់ថា «Soft Skill»។

ប្រសិនអ្នកធ្វើរឿងបីយ៉ាងនេះ​ដោយដឹងឬមិនដឹងខ្លួនក្តីងាយនឹងត្រូវ​គេទម្លាក់ចោល​ភ្លាម​បាន៖

១- ចម្លើយមិនចំសំណួរ

ឆ្លើយខុសប្រធានបទ ឱ្យតែបានឆ្លើយ គឺកំណត់នូវសមត្ថភាពផ្តោត (Focus) របស់យើង​ចេញមកច្បាស់ដូចថ្ងៃ។​ នៅពេលចូលរួមការងារ​ អ្នកចាកប្រធាន​ច្រើនបង្កឱ្យលំបាក​ខាតពេល និងជូនកាលអាចនាំទំនាស់ក្នុងអង្គប្រជុំ ឈឺក្បាលវិលមមុខ​ដូចពាក្យ​ថា «​ភ្លាវ» ពិបាកធ្វើការ​ជាមួយគេឯង។ ចូរបង្វឹកការស្តាប់សំណួរ​ឱ្យបានច្បាស់លាស់ ហើយ​អាចសួរបញ្ជាក់ឡើងវិញក្នុងករណីស្តាប់មិនយល់ កុំប្រថុយឆ្លើយឲ្យតែបាន ឬឆ្លើយទាំងមិនច្បាស់​កំពុងនិយាយអំពីអ្វី។ ការឆ្លើយចំសំណួរត្រូវ​ឆ្លើយចំពាក្យគន្លឹះក្នុងសំណួរនោះ ឧទាហរណ៍គេសួរថា ហេតុអ្វីបាន​មាសឡើងថ្លៃលឿនជាងផ្ទះ? ពាក្យគន្លឹះគឺមាន​បី ផ្ទះ មាស និងឡើងថ្លៃ ។​ ការឆ្លើយតប មិនអាចនិយាយផ្តើម​ចេញពីពាក្យផ្សេង​ក្រៅពីពាក្យគន្លឹះទាំងបីនេះទេ គួរចាប់ផ្តើម​ឆ្លើយថា «ព្រោះមាស ឬ​ព្រោះផ្ទះ ឬការឡើងថ្លៃ»។

២- និយាយ​បូរបាច់​ការងារ​ក្រៅពី​តួនាទី​ដែលខ្លួនកំពុងសម្ភាសន៍

ប្រសិនយើងចេះគូរប្លង់​ហើយកំពុង​ដាក់ពាក្យ​ជាលេខាធិការ ឬគណេនេយ្យ រឿងគូរប្លង់នឹង​ក្លាយជាអសារឥតការហើយ។ មិនថាយើងពូកែប៉ុនណា ឱ្យតែមិនទាក់ទងនឹង​មុខងារដែលយើងកំពុងសម្ភាសន៍ មិនបាច់យកមកនិយាយទេ ព្រោះមិនអាចបន្ថែមពិន្ទុ ថែមទាំង​នាំឱ្យគេឆ្ងល់ថា ហេតុអ្វី​ធ្វើការ​ខុសជំនាញទៀត?

៣- និយាយរអ៊ូពេលឃើញបទបរិយាយការងារ

មនុស្ស​ដែលឃើញJob descriptions ស្រែកថាច្រើន ឬ​បង្ហាញ​អាកប្បកិរិយាខ្លាចនឿយហត់ ធ្វើម្តេចនឹង​មាន​គេផ្សងព្រេង​ទទួលយកមកជាបុគ្គលិក? ប្រសិន​សូម្បីមិនទាន់ប្រលូកផង ក៏រអ៊ូទៅហើយ​ តើអ្នកណា​ចង់ខាតពេល​សាកល្បងជាមួយ​យើង។ ​ម្យ៉ាងវិញទៀត បុគ្គលិក​សម្បូរ​ពាក្យបណ្តឹងមិនសុខចិត្ត និងមានរឿងច្រើន​មិនសមហេតុផល ជាអ្វីដែលអ្នកគ្រប់គ្រងខ្លាចរអាជាងគេ។​ ក្នុងការប្តឹងតវ៉ាការងារ​ ប្រសិនបើកើតឡើងដើម្បីប្រយោជន៍រួមនោះ នឹងមាន​ការរីកចម្រើន​ តែបើជា​អាកប្បកិរិយាផ្ទាល់ខ្លួនរបស់បុគ្គលិកដែលកង្វះសកម្មភាពធ្វើការជារួម នឹងនាំឱ្យខាតពេល ខាតចិត្ត​ខាតធនធាន​ច្រើន៕

ប្រែសម្រួល៖ សុភា

ចុចអាន៖ ជំនាញបច្ចេកទេសទាំង ៨ ជាតម្រូវការដ៏ធំនាពេលអនាគត មិនអាចខ្វះបាន

ចុចអាន៖ ៣ ចំណុចត្រៀមឱ្យរួចរាល់ សម្រាប់អ្នកសម្ភាសន៍ការងារលើកដំបូង