សន្តិសុខសង្គម

ផ្ទះពលរដ្ឋ ៣ ខ្នង នៅខណ្ឌមានជ័យ ត្រូវអគ្គិភ័យលេបត្របាក់យកអស់ទាំងស្រុង

បានផុស

៦ ខែ មុន

នៅ

ថ្ងៃសុក្រ ៩ មករា ២០២៦

ដោយ

អ៊ិន ពិសី

អគ្គិភ័យឆេះផ្ទះចំនួន ៣ ខ្នង បង្កការខូចខាតអស់ទាំងស្រុង នៅក្នុងមូលដ្ឋានខណ្ឌមានជ័យ ទាំងកណ្ដាលអធ្រាត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១ និង ៤៥ នាទី រំលងអធ្រាត្រ ឈានចូលថ្ងៃទី ៩ ខែមករា ឆ្នាំ ២០២៦ ស្ថិតនៅផ្លូវកែងបេតុង ១ កន្លែង ក្បែរប្រឡាយលូស្ទឹងមានជ័យ ក្នុងមូលដ្ឋានសង្កាត់ស្ទឹងមានជ័យទី ១ ខណ្ឌមានជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឮសំឡេងផ្ទុះតូចៗ បន្ទាប់មកក៏មានផ្សែង និងអណ្ដាតភ្លើងចេញពីផ្ទះកើតហេតុ។ ភ្លាមៗ នោះ អ្នកភូមិនាំគ្នាស្រែកថាមានភ្លើងឆេះ និងនាំគ្នាជួយយកទឹកបាញ់ពន្លត់ ប៉ុន្តែដោយសារអណ្ដាតភ្លើងកាន់តែឆេះខ្លាំងឡើងៗ ទើបអ្នកភូមិនាំគ្នារាយការណ៍ជូនសមត្ថកិច្ចមូលដ្ឋាន ដើម្បីសុំជំនួយពីរថយន្តពន្លត់អគ្គិភ័យ។

បន្ទាប់ពីទទួលបានដំណឹងនេះ ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានបញ្ជូនរថយន្តពន្លត់អគ្គិភ័យដែលនៅជិតគោលដៅបំផុត ចេញអន្តរាគមន៍ភ្លាមៗ។

អគ្គិភ័យខាងលើនេះដែរ បានលេបយកផ្ទះប្រជាពលរដ្ឋចំនួន ៣ ខ្នង រួមនឹងសម្ភារៈអស់ទាំងស្រុង និងប្រើប្រាស់រថយន្តពន្លត់របស់ស្នងការដ្ឋាននគរបាលរាជធានីភ្នំពេញជាច្រើនគ្រឿង បាញ់ឲ្យរលត់ជាស្ថាពរ។ មន្ត្រីជំនាញ មិនទាន់អាចបញ្ជាក់អំពីមូលហេតុ នៃការឆាបឆេះនៅឡើយនោះទេ ដោយស្ថិតនៅក្រោមការស្រាវជ្រាវជាបឋមសិន៕

អត្ថបទ ៖ រដ្ឋា