សន្តិសុខសង្គម

ផ្ទុះអាវុធ៧គ្រាប់ ក្នុងមូលដ្ឋានខណ្ឌមានជ័យ ជនសង្ស័យគេចខ្លួនបាត់ស្រមោល

បានផុស

៥ years មុន

នៅ

ថ្ងៃសៅរ៍ ១៥ មករា ២០២២

ដោយ

ជនសង្ស័យមួយក្រុមមានគ្នាជាច្រើននាក់ បានធ្វើសកម្មភាពបាញ់ឡើងលើចំនួន០៧គ្រាប់ បង្កអោយមានការភ្ញាក់ផ្អើលជាខ្លាំងកាលពីវេលាម៉ោង២៣និង១៥នាទីយប់ ថ្ងៃទី១៤ ខែមករា ឆ្នាំ២០២២ នៅចំណុចច្រកចុះវត្តសន្សំកុសល ស្ថិតក្នុងសង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពព័ត៌មានអោយដឹងថា នៅមុនកើតហេតុ ជនសង្ស័យមួយក្រុមមានគ្នាជាច្រើននាក់ បានជិះរថយន្តមួយគ្រឿងម៉ាកព្រូស មិនចាំផ្លាកលេខ និងម៉ូតូជាច្រើនគ្រឿង ធ្វើដំណើរដល់ចំណុចកើតហេតុ រួចមិនដឹងមានមូលហេតុខឹងសម្បានឹងរឿងអ្វីអោយប្រាកដ ក៏ជនសង្ស័យភាគីខាងជិះម៉ូតូ បានដកកាំភ្លើងខ្លីពីចង្កេះបាញ់ឡើងលើចំនួន៧គ្រាប់រួចបើករថយន្ត និងម៉ូតូចាកចេញពីកន្លែងកើតហេតុបាត់ស្រមោលតែម្តង ។

ភ្លាមៗ បន្ទាប់ពីកើតហេតុ កម្លាំងសមត្ថកិច្ចចម្រុះបានល្បាតពួនស្ទាក់ឃើញរថយន្ត ក្រុមជនសង្ស័យ ក៏បានដេញប្រាប់ចាប់ប្រភីង រហូតដល់ចំណុចវត្តដំបូកខ្ពស់ ក៏បានដានសូន្យតែម្តង។

យ៉ាងណាមិញក្រោយកើតហេតុ សមត្ថកិច្ចមូលដ្ឋានរួមទាំងកម្លាំងនគរបាលនៃអធិការដ្ឋាននគរបាលខណ្ឌមានជ័យ បានចុះអន្តរាគមន៍ដល់ទីតាំងកើតហេតុ ( ចំណុចផ្ទុះអាវុធ ) នឹងបានរើសសម្បកគ្រាប់កាំភ្លើងបានចំនួន០៤គ្រាប់ ក្នុងចំនួន០៧គ្រាប់ ដែលបានបាញ់ ។

សូមបញ្ជាក់ថា ជុំវិញករណីនេះសំណាងណាស់ហើយដែលខ្មាន់កាំភ្លើងបាញ់ឡើងតែទៅលើមេឃ ប្រសិនបើជនល្មើសមានការគុំគួន ឬស្អប់នណារម្នាក់នោះមិនដឹងមានមនុស្សប៉ុន្មាននាក់ ត្រូវរងរបួសនោះទេ ? ហើយនេះ ក៏ជាការស្វាគមន៍ អធិការថ្មី នៃអធិការដ្ឋាននគរបាលខណ្ឌមានជ័យផងដែរ ហើយមហាជននៅរងចាំមើលថាតើ អធិការទើបតែឡើងកាន់តំណែងថ្មីថ្មោង មិនទាន់ដល់១ខែស្រួលបួលផងនោះ អាចមានសមត្ថិភាពក្នុងការស្រាវជ្រាវតាមចាប់ខ្លួនក្រុមជនសង្ស័យ ដែលព្រហើនបាញ់ទាំងកណ្តាលរាជធានីភ្នំពេញ បានដែរ ឬទេ ? ៕

អត្ថបទ៖ លីហេង