ព័ត៌មានបន្ថែម៖ សមត្ថកិច្ច២រូបដែលស្លាប់ក្នុងប្រតិបត្តិការបង្ក្រាបគ្រឿងញៀនមានតួនាទីជានាយប៉ុស្ដិ៍ម្នាក់ និងមន្ត្រីផ្នែកម្នាក់

កម្លាំងសមត្ថកិច្ច២រូបដែលស្លាប់ក្នុងប្រតិបត្តិការបង្ក្រាបគ្រឿងញៀនត្រូវជនសង្ស័យបាញ់ស្រោចបណ្ដាលឲ្យស្លាប់នោះ គឺមានតួនាទីជានាយប៉ុស្ដិ៍ទួលព្រិចម្នាក់ និងម្នាក់ទៀតមានតួនាទីជាមន្ត្រីផ្នែក ជាមន្រ្តីផ្នែកប្រឆាំងគ្រឿងញៀននៃអធិការស្រុកអង្គស្នួល។ ចំណែកជនសង្ស័យត្រូវបានកម្លាំងឡោមព័ទ្ធចាប់បានហើយក៏រងរបួសផងដែរ។

បើតាមសមត្ថកិច្ចបានបញ្ជាក់ថា ជនដៃដល់ជាមុខសញ្ញាចាស់ជួញដូរគ្រឿងញៀន និងធ្លាប់គេចខ្លួន ហើយក៏មានដីការចាប់ខ្លួនពិតុលាការផងដែរ ហើយនៅថ្ងៃកើតហេតុ សមត្ថកិច្ចបានទទួលព័ត៌មានពីប្រជាពលរដ្ឋរាយការណ៍ថា ជនល្មើសកំពុងស្នាក់នៅទីនោះ ហើយទំនងជាជនសងសង្ស័យដឹងខ្លួន ក៏បាញ់ស្រោចមកលើសមត្ថកិច្ចតែម្ដងបណ្ដាលឲ្យស្លាប់លោកនាយប៉ុស្ដិ៍ម្នាក់ និងមន្ត្រីផ្នែកម្នាក់។

សមត្ថកិច្ចបានបញ្ជាក់ថា ជនរងគ្រោះមានឈ្មោះ ជុច សុភា ជានាយប៉ុស្តិ៍ទួលព្រិច និងឈ្មោះ រីម សុផាន់ណា មន្ត្រីផ្នែកគ្រឿងញៀន នៃអធិការដ្ឋាននគរបាលស្រុកអង្គស្នួល ។ ចំណែកជនដៃដល់បានរងរបួសធ្ងន់ ត្រូវបានឃាត់ខ្លូន។

សូមបញ្ជាក់ថា កាលពីរសៀលថ្ងៃទី២១ ខែមេសា ឆ្នាំ២០២២នេះ មានករណីផ្ទុះអាវុធមួយបានកើតឡើងក្នុងប្រតិបត្តិការចុះបង្ក្រាបគ្រឿងញៀន នៅចំណុចភូមិចន្ទ្រាថ្មី ឃុំទួលព្រិច ស្រុកអង្គស្នួល ខេត្តកណ្ដាល៕

អត្ថបទ៖ សុខុម