ឆ្លងចរន្តអគ្គិសនីបំផ្លាញផ្ទះ៣ខ្នងទាំងព្រឹកនៅភូមិដើមចាន់

លំនៅដ្ឋានប្រជាពលរដ្ឋចំនួន៣ខ្នងបានរងការបំផ្លាញដោយអគ្គិភ័យ ខណៈម្ចាស់ផ្ទះបានអះអាងថា បណ្ដាលមកពីឆ្លងចរន្តអគ្គិសនី។

ហេតុការណ៍នេះបានកើតឡើងនៅផ្ទះលេខ៤៩៥ ម្ចាស់ផ្ទះឈ្មោះ ថោង សុផល ភេទប្រុសអាយុ៤៩ឆ្នាំ មុខរបរជាងភ្លើងស្ថិតក្នុងភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ នាវេលាម៉ោង៧និង០០នាទីព្រឹក ថ្ងៃទី៤ ខែកក្កដា ឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅ បានឲ្យដឹងថា ក្នុងករណីអគ្គិភ័យនេះ បានផ្តើមចេញពីផ្ទះលោក ថោង សុផល ហើយភ្លាមៗនោះក៏មានរថយន្តពន្លត់អគ្គិភ័យចំនួន៥គ្រឿងចុះទៅដល់ទីតាំងកើតហេតុទើបអគ្គិភ័យបានរលត់ទៅវិញនាម៉ោង៧និង៥៥នាទី និងបង្កឲ្យលំនៅដ្ឋានប្រជាពលរដ្ឋរងការបំផ្លាញអស់៣ខ្នង និងប៉ះពាល់អស់៦ខ្នងផ្ទះ។

គួររំលឹកថា កាលពីថ្ងៃទី២០ ខែមិថុនា កន្លងទៅក៏មានអគ្គិភ័យបំផ្លាញផ្ទះពលរដ្ឋអស់៣៧ខ្នង ដែលកាលណោះ គឺបង្កដោយជនសង្ស័យឈ្មោះ លឹម ភារុណ ភេទប្រុសអាយុ៤២ឆ្នាំ បានដុតផ្ទះខ្លួនឯងចោលហើយឆេះរាលដាលដល់ផ្ទះប្រជាពលរដ្ឋក្បែខាងរហូតដល់៣៧ខ្នង។ ចំណែកជនបង្កត្រូវបានចាប់ខ្លួននិងត្រូវបានសាលាដំបូងរាជធានីភ្នំពេញសម្រេចចេញដីការឃុំខ្លួនក្នុងពន្ធនាគារព្រៃសរហើយ៕

អត្ថបទ៖ នរា