សន្តិសុខសង្គម

ប្តីប្រពន្ធ រួមទាំងកូនអាយុ៣ ឆ្នាំ និងទារកក្នុងផ្ទៃ៧ខែផង បានស្លាប់ដោយទឹកហូរកួចចូលក្នុងទឹកស្ទឹង

បានផុស

៤ years មុន

នៅ

ថ្ងៃព្រហស្បតិ៍ ១៤ កក្កដា ២០២២

ដោយ

ពោធិ៍សាត់ ៖ ភ្លៀងមួយមេធំ បង្កជាជំនន់ទឹកហូរកាត់ផ្លូវកួចយកមនុស្សនិងម៉ូតូធ្លាក់ចូលក្នុងទឹកស្ទឹង បណ្ដាលឲ្យមានមនុស្ស៣នាក់ស្លាប់ ២នាក់ជាមនុស្សស្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះ កើតឡើងនៅថ្ងៃទី១៤ ខែកក្កដា ឆ្នាំ២០២២ វេលាម៉ោងប្រមាណ ១៨និង១៥នាទី នៅចំណុចកំណាត់ផ្លូវជាតិលេខ៥៥ ចន្លោះបង្គោលគីឡូម៉ែត្រលេខ ១៥៥-១៥៦ ត្រង់ស្ទឹងកាច់ ភូមិឯកភាព ឃុំថ្មដា។

បើតាមប្រភពព័ត៌មានបានឲ្យដឹងថា ជនរងគ្រោះមានឈ្មោះទី១ ជា សុខគឿន ភេទប្រុស អាយុ អាយុ៣៩ឆ្នាំ ទីលំនៅបច្ចុប្បន្នភូមិឈើទាល ឃុំត្នោតជុំ ស្រុកក្រគរ ២.ឈ្មោះ ចាន់ ភក្តី ភេទស្រី អាយុ៣៥ឆ្នាំ ទីលំនៅបច្ចុប្បន្នភូមិឈើទាល ឃុំត្នោតជុំ ស្រុកក្រគរ (ត្រូវជាប្រពន្ធ មានផ្ទៃពោះ០៧ ខែ) រកសពមិនទាន់ឃើញ និង៣.ឈ្មោះ លី ចាន់ថា ហៅឆៀងម៉ៃ ភេទស្រី អាយុ៣ឆ្នាំ រស់នៅភូមិ ឈើទាល ឃុំត្នោតជុំ ស្រុកក្រគរ (ត្រូវ ជាកូន)។

ប្រភពដដែលបានឲ្យដឹងថា ជនរងគ្រោះជិះម៉ូតូ ម៉ាក Dream C125 ពណ៌ខ្មៅ ផលិតឆ្នាំ ២០១៨ ពាក់ស្លាកលេខ ពោធិ៍សាត់ 1I-7548។

កម្លាំងសមត្ថកិច្ចបានប្រគល់សពដែលរកឃើញ ទៅក្រុមគ្រួសារសាច់ញាតិយកទៅធ្វើបុណ្យ ហើយកម្លាំងនគរបាលសហការជាមួយកម្លាំងយោធា និងកម្លាំងកងរាជអាវុធហត្ថស្រុក កំពុងបន្តស្វែងរកសពម្នាក់ទៀត៕

អត្ថបទ ៖ លានគ្រន

កែសម្រួលដោយ ៖ នាគព័ន្ធ