កូនមន្ត្រីសាលាស្រុកអង្គរជ័យ យកកាំភ្លើង​AK​របស់​ឳពុកបាញ់ប្រហារសាច់ញាតិខ្លួនឯង៣នាក់ និងបាញ់ខ្លួនឯង

ក្រោមឥទ្ធិពលគ្រឿងញៀន បុរសម្នាក់បានប្រើកាំភ្លើងAK បាញ់សម្លាប់អ្នកគ្រូបង្រៀនម្នាក់ត្រូវជាបងប្អូនជីដូនមួយ និងបណ្ដាលឱ្យរបួសបងប្អូនខ្លួនឯង២នាក់ទៀត រួចបាញ់ខ្លួនឯងបណ្ដាលឱ្យរបួស។

ករណីនេះបានកើតឡើងនៅជិតផ្សារតានី ភូមិប្រាល ឃុំតានី ស្រុកអង្គរជ័យ ខេត្តកំពត កាលពីវេលាម៉ោង១០ព្រឹក ថ្ងៃទី២៧ ខែមេសា ឆ្នាំ២០២៣នេះ។

សមត្ថកិច្ចមិនទាន់បានផ្តល់ព័ត៌មានលម្អិតណាមួយនៅឡើយទេ ក្នុងហេតុការណ៍បាញ់ប្រហារសម្លាប់ស្ដ្រីជាគ្រូបង្រៀនម្នាក់ត្រូវជាបងជីដូនមួយ និងបណ្ដាលឱ្យបងប្អូនខ្លួនឯង២នាក់របួសទៀតនោះ។

បើតាមការឲ្យដឹងពីអ្នកជិតខាងថា បុរសដែលប្រើអាវុធAKបាញ់ប្រហារសាច់ញាតិខ្លួនឯងនេះ គឺជាមនុស្សញៀនថ្នាំ ឈ្មោះ ចែម ហើយកាំភ្លើងដែលបាញ់ប្រហារនោះ ជារបស់ឪពុកបង្កើតដែលជាមន្ត្រីសាលាស្រុកអង្គរជ័យ។ ក្រោយកើតកម្លាំងអធិការដ្ឋានស្រុកអង្គរជ័យបានចុះទៅដល់កន្លែងកើតហេតុ និងបានឃាត់ខ្លួនជនសង្ស័យមកអធិការដ្ឋានដើម្បីបន្តនីតិវិធីច្បាប់ផងដែរ៕

អត្ថបទ៖ សឹង រ៉ាត់