សន្តិសុខសង្គម

តុលាការរឹបអូសរថយន្តអភិបាលរងខេត្តបន្ទាយមានជ័យ រឿងជំពាក់បំណុល

បានផុស

៣ years មុន

នៅ

ថ្ងៃពុធ ៣១ ឧសភា ២០២៣

ដោយ

យោងតាមដីកាសម្រេចរឹបអូសជាបណ្ដោះអាសន្នរបស់ចៅក្រមសាលាដំបូងរាជធានីភ្នំពេញ បានសម្រេចធ្វើការរឹបអូសជាបណ្ដោះអាសន្ននូវរថយន្តម៉ាក Rang Rover ពណ៌ខ្មៅ ស៊េរីឆ្នាំ ២០១១ ពាក់ស្លាកលេខ ភ្នំពេញ 2v-6161 ដែលជាកម្មសិទ្ធិរបស់កូនបំណុល នៃការអនុវត្តឈ្មោះ គឹង វណ្ណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកំណត់ហេតុស្ដីពីការអនុវត្តដីកាសម្រេចរឹបអូសជាបណ្ដោះអាសន្ននេះ ធ្វើឡើងកាលពីថ្ងៃទី ២៩ ខែឧសភា ឆ្នាំ ២០២៣ វេលាម៉ោង ១៦ និង ០០ នាទីរសៀល ដោយលោក ឡោ សហឺ អាជ្ញាសាលា នៃសាលាដំបូងរាជធានីភ្នំពេញ ដោយមានលោក ហ៊ាង ចាន់ដារ៉ា ជាអ្នកធ្វើកំណត់ហេតុ និងសហការជាមួយលោកអនុសេនីយ៍ឯក អឿន សេងអាន នាយសេនាធិការកងរាជអាវុធហត្ថខណ្ឌសែនសុខ និងលោកអនុសេនីយ៍ទោ អ៊ូ ផានិត ជំនួយការកងរាជអាវុធហត្ថខណ្ឌសែនសុខ។

ការរឹបអូសជាបណ្ដោះអាសន្ននេះ ស្ថិតនៅផ្លូវលេខ ៥៩៨ ភូមិទំបន់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដោយអ្នកកាន់កាប់ និងប្រើប្រាស់រថយន្តឈ្មោះ អេង សុភាព ភេទប្រុស អាយុ ៤៥ ឆ្នាំ ដែលជាកូនចៅរបស់លោក គឹង វណ្ណៈ ខណៈការចុះរឹបអូសជាបណ្ដោះអាសន្ននេះពុំបានជួបកូនបំពុល នៃការអនុវត្តឈ្មោះ គឹង វណ្ណៈ ឡើយ បន្ទាប់ពីការអានដីកា សម្ដេច ខាងលើឲ្យអ្នកដែលចូលរួមស្តាប់ ឃើញថា ឈ្មោះ អេង សុភាព ពុំបានតវ៉ាចំពោះការអនុវត្តនេះឡើយ ហើយបានឯកភាព និងសហការជាមួយអាជ្ញាសាលា នៃសាលាដំបូងរាជធានីភ្នំពេញ។

អាជ្ញាសាលា នៃសាលាដំបូងរាជធានីភ្នំពេញ បានបង្គាប់ឲ្យឈ្មោះ អេង សុភាព ធ្វើការប្រមូល និងរុះរើសម្ភារៈទាំងអស់ចេញពីក្នុងរថយន្តដែលជាកម្មវត្ថុ នៃការអនុវត្ត និងប្រគល់សោរថយន្ត រួមទាំងរថយន្ត មកអាជ្ញាសាលា នៃសាលាដំបូងរាជធានីភ្នំពេញរឹបអូសជាបណ្ដោះអាសន្នតាមនីតិវិធីជាធរមាន។

គួរបញ្ជាក់ផងដែរថា សេចក្ដីសម្រេចអនុវត្តតាមខ្លឹមសារ នៃដីកាសម្រេចរឹបអូសជាបណ្ដោះអាសន្ន លេខ ១៦៨ ក.ដ.រ ចុះថ្ងៃទី ១២ ខែមេសា ឆ្នាំ ២០២៣ របស់សាលាដំបូងរាជធានីភ្នំពេញ ដោយសម្រេចធ្វើការរឹបអូសជាបណ្ដោះអាសន្ននូវរថយន្តម៉ាក Rang Rover ពណ៌ខ្មៅ ស៊េរីឆ្នាំ ២០១១ ពាក់ស្លាកលេខ ភ្នំពេញ 2v-6161 ជាកម្មសិទ្ធិរបស់កូនបំណុល នៃការអនុវត្តឈ្មោះ គឹង វណ្ណៈ អភិបាលរងខេត្តបន្ទាយមានជ័យ៕

អត្ថបទ ៖ មករា