Update៖ ករណីបាញ់ប្រហារនៅខណ្ឌដង្កោកាល​ពីយប់មិញ មានជនរងគ្រោះម្នាក់ជាមន្ត្រីនគរបាល​ស្លាប់

ជនរងគ្រោះម្នាក់ជាមន្ត្រីនគរបាល ក្នុងចំណោមជនរងគ្រោះពីរនាក់ក្នុងហេតុការណ៍បាញ់ប្រហារនៅខណ្ឌដង្កោកាលពីយប់មិញ បានស្លាប់បន្ទាប់បញ្ជូនដល់បន្ទីរពេទ្យ។ ការបាញ់ប្រហារនេះ គឺធ្វើឡើងបន្ទាប់ពីកើតករណីគ្រោះថ្នាក់ចរាចរណ៍រវាងរថយន្ដម៉ាកMercedes ជាមួយរថយន្ដម៉ាកford ranger រួចភាគីខាងរថយន្ដford ranger ដកកាំភ្លើងបាញ់រះជាច្រើនគ្រាប់ទៅលើភាគីរថយន្ត Mercedesជាច្រើនគ្រាប់។

បើតាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តMercedes ពណ៌ខ្មៅមួយគ្រឿងពាក់ផ្លាកលេខភ្នំពេញ 2BF-8168 បើកបរដោយបុរសម្នាក់ជាជនជាតិខ្មែរ រួមដំណើរជាមួយបុរសជនបរទេស២នាក់ទៀតធ្វើដំណើរក្នុងទិសដៅពីលិចមកកើត។ ពេលមកដល់ចំណុចកើតហេតុស្រាប់តែគេឃើញមានរថយន្តបង្កម៉ាក ford ranger ពណ៌ស ពាក់ផ្លាកលេខ ភ្នំពេញ 2BV-5779 ធ្វើដំណើរក្នុងទិសដៅបញ្រ្ចាស់គ្នាក្នុងល្បឿនលឿនរេចង្កូតមកខាងឆ្វេងដៃទៅបុកចំពីមុខរថយន្តMercedes យ៉ាងពេញទំហឹង រួចបើកទ្វាររថយន្តចុះមកដកកាំភ្លើងវែង និងកាំភ្លើងខ្លីបាញ់ប្រហារជាច្រើនគ្រាប់បណ្តាលឲ្យរងរបួសធ្ងន់ចំនួន២នាក់។ បន្ទាប់ពីមានការបាញ់ប្រហារជាច្រើនគ្រាប់មានរថយន្តមួយគ្រឿងទៀតមិនចាំស្លាកលេខមកដឹករំដោះក្រុមខ្មាន់កាំភ្លើង និងចាប់បុរសម្នាក់ទៀតដាក់ក្នុងរថយន្តរួចគេចចេញពីកន្លែងកើតហេតុបាត់។ នៅក្នុងនោះដែរមានម្នាក់ជាជនជាតិខ្មែរត្រូវបានរថយន្តសាមុយដឹកទៅសង្រ្គោះបន្ទាន់ភ្លាមៗ និងបានស្លាប់ពេលបញ្ជូនទៅដល់មន្ទីរពេទ្យ។

ក្រោយពេលកើតហេតុកម្លាំងសមត្ថកិច្ចនៃអធិការដ្ឋាននគរបាលខណ្ឌដង្កាបាចុះមកដល់កន្លែងកើតហេតុដើម្បីធ្វើការស្រាវជ្រាវនៅទីតាំងកន្លែងកើតហេតុ ចំពោះមូលហេតុកម្លាំងសមត្ថកិច្ចកំពុងធើ្វការស្រាវជ្រាវ៕

អត្ថបទ៖ ម៉េង