សន្តិសុខសង្គម

ពលរដ្ឋចោទជនជាតិចិនមួយក្រុមនៅក្រុមហ៊ុនចម្ការចេកខេត្តក្រចេះ បាញ់សត្វគោក្របីអ្នកស្រុកលេីកដាក់ឡានយ៉ាងអានាធិបតេយ្យ

បានផុស

៣ សប្តាហ៍ មុន

នៅ

ថ្ងៃចន្ទ ៣ មីនា ២០២៥

ដោយ

ប្រជាពលរដ្ឋ នៅភូមិស្រែស្បូវ ឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ សម្ដែងការព្រួយបារម្ភជាខ្លាំងចំពោះក្រុមហ៊ុនចម្ការចេកឈ្មោះ ហ្គ្រីន អាយ លែន ឬ Cambodian Banana Agriculture (CBA) ដែលតែងតែធ្វេីសកម្មភាពបាញ់សត្វគោក្របីរបស់អ្នកស្រុកលេីកដាក់ឡានយ៉ាងអានាធិបតេយ្យ ដេីម្បីកាប់សាច់ចែកគ្នាយកទៅជាធ្វេីម្ហូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីប្រជាពលរដ្ឋបានឲ្យដឹងថា កាលពីចុងខែកុម្ភៈ មានជនជាតិចិនមួយក្រុម ដែលត្រូវបានគេស្គាល់ថាជាអ្នកធ្វើការនៅក្នុងក្រុមហ៊ុនខាងលើ បានធ្វេីសកម្មភាពបេីកឡានគៀងគោក្របីរបស់អ្នកស្រុកចូលក្នុងចំការក្រុមហ៊ុន និងប្រើប្រាស់កាំភ្លើងបាញ់មកលើសត្វគោ ១ ក្បាលបណ្ដាលឱ្យងាប់ និងរបួសជិត ១០ ក្បាល និងប្រើឱ្យសន្តិសុខលេីកដាក់ត្រាក់ទ័រ ដើម្បីយកចូលក្នុងក្រុមហ៊ុន ក្នុងគោលបំណង់កាប់សាច់យកចែកគ្នាស៉ី។

ប្រជាពលរដ្ឋ បានដាក់ចម្ងល់ថា តេីក្រុមហ៊ុនចិនបានកាំភ្លេីងមកពីណា យកប្រេីប្រាស់បាញ់សត្វ គោក្របី ដោយសេរីបែបនេះ។ ករណីនេះ ប្រភពដដែលក៏បានលើកឡើងថា វាមិនមែនជាករណីទីមួយទេ ដែលក្រុមហ៊ុនខាងលើនេះ ប្រើប្រាស់កាំភ្លើងបាញ់សត្វគោប្រជាពលរដ្ឋនៅក្នុងតំបន់នោះ យកកាប់សាច់ចែកគ្នា ជាច្រេីនករណីមកហេីយ តែមិនមានប្រជាពលរដ្ឋណា ហ៊ានដាក់ពាក្យប្ដឹងនោះទេ។

ពាក់ព័ន្ធនឹងករណីខាងលើនេះ អ្នកនាំពាក្យនៃស្នងការដ្ឋាននគរបាលខេត្តក្រចេះបានឲ្យដឹងថា កម្លាំងសមត្ថកិច្ចជំនាញ កំពុងធ្វើការស្រាវជ្រាវ។

ជុំវិញករណីបាញ់សត្វគោអ្នកស្រុកងាប់នេះដែរ លោក ឈា ផល្លី អភិបាលស្រុកអូរគ្រៀងសែនជ័យ បានបញ្ជាក់ឲ្យកម្ពុជាថ្មី ដឹងនៅថ្ងៃទី២ ខែមិនា នេះថា ពិតជាមានករណីបាញ់សត្វគោអ្នកស្រុកងាប់មែន ប៉ុន្តែក្រុមជនបង្កកំពុងរត់គេចខ្លួនបាត់ហើយ ។

ដោយឡែក ខាងតំណាងក្រុមហ៊ុនកម្ពុជាថ្មី មិនអាចទំនាក់ទំនងសុំការបកស្រាយបានឡើយ ជុំវិញករណីបាញ់សត្វគោងាប់នេះ ព្រោះគ្មានលេខទាក់ទង។

ករណីនេះបានកេីតឡេីងការពីរសៀលថ្ងៃ២៨ ខែកុម្ភៈ ឆ្នាំ២០២៥ នៅចំការក្រុមហ៊ុនចេករបស់ចិន ហ្គ្រីន អាយ លែន ឬ Cambodian Banana Agriculture (CBA) ស្ថិននៅក្នុងឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ៕

អត្ថបទ៖ ប្រុញ វិធិន