កីឡា

លោក Pep Muñoz ប្រាប់ថា កីឡាករបរទេសជាច្រើនសួរលោកដោយចង់មកលេងនៅកម្ពុជា

បានផុស

៥ ខែ មុន

នៅ

ថ្ងៃអង្គារ ១៧ កុម្ភៈ ២០២៦

ដោយ

អតីតគ្រូបង្វឹកព្រះខ័នរាជស្វាយរៀង Pep Muñoz ត្រូវបានកីឡាករបរទេសជាច្រើនបានសួរអំពីបាល់ទាត់កម្ពុជា ហើយពួកគេចង់មកលេងបាល់ទាត់នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិស័យកីឡាបាល់ទាត់កម្ពុជាកំពុងទទួលបានការចាប់អារម្មណ៍ខ្លាំងពីកីឡាករបរទេសទាំងនៅក្នុងតំបន់អាស៊ី និងតំបន់ផ្សេងៗទៀតដូចជានៅអឺរ៉ុបជាដើម បន្ទាប់ពីក្លិបបាល់ទាត់កម្ពុជាកំពុងអភិវឌ្ឍខ្លួនក្លាយជាក្រុមខ្លាំងនៅក្នុងតំបន់។ ភាពខ្លាំងរបស់ក្លិបបាល់ទាត់កម្ពុជានៅឆាកអន្តរជាតិគឺជាគន្លឹះសំខាន់ក្នុងការទាក់ទាញកីឡាករបរទេសឲ្យចាប់អារម្មណ៍កីឡាបាល់ទាត់កម្ពុជា។

លោក Pep Munyoz ដែលបានចាកចេញពីប្រទេសកម្ពុជាជិតមួយរដូវកាលហើយបានប្រាប់ «កម្ពុជាថ្មី» ថា ៖«កីឡាករជាច្រើនបានសួរខ្ញុំអំពីកម្ពុជា និងកីឡាបាល់ទាត់កម្ពុជា ពីព្រោះពួកគេចង់ទៅលេងនៅទីនោះ។ ខ្ញុំបានប្រាប់ពួកគាត់ពីបាល់ទាត់ដ៏ល្អនៅកម្ពុជា។ កម្ពុជាឥឡូវនេះងាយស្រួលក្នុងការចុះកុងត្រាកីឡាករល្អ។ ប្រការនេះពិតជាល្អខ្លាំងណាស់សម្រាប់កម្ពុជា»។

ចាប់តាំងពីចាកចេញពីកម្ពុជាកាលពីចុងរដូវកាល ២០២៤-២៥ មក លោក Pep Muñoz តែងតែផ្សាភ្ជាប់កម្ពុជា ជាមួយនឹងដំណើរជីវិតរបស់លោកនៅក្រៅប្រទេស។ កម្ពុជាត្រូវបានចាត់ទុកជាកន្លែងដែលលោកទទួលបានជោគជ័យបំផុតក្នុងអាជីពជាគ្រូបង្វឹក នៅពេលលោកបានដឹកនាំ ព្រះខ័នរាជស្វាយរៀង ដោយបានឈ្នះជើងឯកលីគកំពូលកម្ពុជា ២ រដូវកាលជាប់គ្នា ឈ្នះជើងឯកពានរង្វាន់សម្តេចតេជោ ហ៊ុន សែន ១ លើក និងឈានដល់វគ្គផ្តាច់ព្រ័ត្រពានរង្វាន់អាស៊ី AFC Challenge League ជាលើកដំបូង ដោយទទួលបានជើងឯករង។

នៅចុងខែកុម្ភៈនេះ លោក Pep Muñoz នឹងធ្វើដំណើរមកកាន់ប្រទេសឥណ្ឌូណេស៊ី ដោយមានការងារផ្ទាល់ខ្លួន។ បន្ទាប់មកនៅដើមខែកុម្ភៈ លោកនឹងធ្វើដំណើរមកកម្ពុជាដើម្បីទស្សនាការប្រកួតរវាង ព្រះខ័នរាជស្វាយរៀង និង ភ្នំពេញក្រោន វគ្គ ៨ ក្រុមចុងក្រោយ ពានរង្វាន់ AFC Challenge League៕