កីឡា

កីឡាករឆ្នើមក្នុងវិស័យចំបាប់ លោក ហេង វុទ្ធី មុនដំបូងជាអ្នកលេងបាល់ទះ និង ចោលដុំដែកនោះទេ

បានផុស

៤ ខែ មុន

នៅ

ថ្ងៃព្រហស្បតិ៍ ២៦ មីនា ២០២៦

ដោយ

កីឡាករឆ្នើម និងជាម្ចាស់មេដាយមាសស៊ីហ្គេម ឆ្នាំ២០២៣ លោក ហេង វុទ្ធី ថាជីវិតកីឡារបស់លោកដំបូងឡើយគឺលេងបាល់ទះ បន្ទាប់មកលេងវិញ្ញាសាចោលដុំដែក និងចុងក្រោយនេះជាកីឡាករជម្រើសជាតិផ្នែកចំបាប់រហូតមកដល់ពេលនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ហេង វុទ្ធី ប្រកួតកន្លងទៅ

នេះបើតាមការឲ្យដឹងពីលោក ហេង វុទ្ធី ថាលោកចូលចិត្តវិស័យកីឡាតាំងតែពីវ័យក្មេងមកម្ល៉េះ និងអាចជាមូលហេតុនៅឯខេត្តពោធិ៍សាត់នោះបណ្ដុំដោយកីឡាផងដែរ។ អំឡុងពេលរៀននៅឯវិទ្យាល័យហ៊ុនសែនទន្លេអុំ អំឡុងឆ្នាំ ២០០៨ រហូតដល់ឆ្នាំ២០១១ រូបគេមានឈ្មោះល្បីខាងផ្នែកកីឡាប្រចាំសាលាដោយរកមេដាយបានច្រើន។

កីឡាករ ហេង វុទ្ធី ប្រកួតកន្លងទៅ

លោក ហេង វុទ្ធី បន្ថែមទៀតថា កាលនៅរៀនវិទ្យាល័យនោះដំបូងគេលេងបាល់ទះនោះទេ ដោយសារកាយសម្បទាអំណោយផលល្អគ្រូក៏ទាញឲ្យទៅវិញ្ញាសាចោលដុំដែកវិញទៅ។ ការប្រកួតលើវិញ្ញាសាចោលដុំដែកនេះរូបគេល្បីឈ្មោះ និងឈ្នះមេដាយគ្រប់កម្មវិធីមិនថាក្នុងខេត្ត ឬចេញក្រៅខេត្តនោះឡើយ។ បន្ទាប់ពីប្រកួតចោលដុំដែករួចមកខ្លួនក៏ឆ្លៀតទៅប្រកួតកីឡាចំបាប់ថែមទៀត និងទទួលបានមេដាយបន្តទៀតរហូតគ្រូៗមើលឃើញពីសមត្ថភាពក៏កោះហៅឲ្យជាប់ជម្រើសជាតិកីឡាអត្តពលកម្មដោយហ្វឹកហាត់លើវិញ្ញាសាចោលដុំដែក។ ស្របពេលខាងចំបាប់ក៏ហៅមកចូលជំរុំហ្វឹកហាត់ដូចគ្នាអំឡុងពេលនោះ ប៉ុន្តែរូបគេបានសម្រេចចិត្តចូលខាងអត្តពលកម្ម។

ក្រោយជាប់ជម្រើសជាតិខាងអត្តពលកម្មបានមួយឆ្នាំ និងយល់ច្បាស់ពីកីឡា រួមផ្សំការដឹងពីសមត្ថភាពមិនអាចទៅរួចលើវិញ្ញាសាចោលដុំដែកបាន ម្ចាស់មេដាយមាសស៊ីហ្គេម ឆ្នាំ២០២៣ រូបនេះបានសុំគ្រូផ្លាស់ប្ដូរមកហ្វឹកហាត់កីឡាចំបាប់រហូតមកដល់ពេលនេះមានស្នាដៃជូនជាតិជាច្រើនដូចបានឃើញស្រាប់។

កីឡាករ ហេង វុទ្ធី និងលោក ខេស៊ី

បញ្ជាក់ដែរថា កីឡាករ ហេង វុទ្ធី ជាអ្នកខេត្តពោធិ៍សាត់ និងបានជាប់ជម្រើសជាតិកីឡាចំបាប់តាំងពីអំឡុងឆ្នាំ២០១៣-២០១៤។ រូបគេហ្វឹកហាត់កីឡាចំបាប់នេះរយៈពេលជាង ១០ឆ្នាំមកហើយ និងធ្លាប់ឈ្នះមេដាយមាសជើងឯកអាស៊ីអាគ្នេយ៍ ឈ្នះមេដាយមាស មេដាយសំរឹទ្ធ ស៊ីហ្គេម ឈ្នះមេដាយប្រាក់ ២គ្រឿង World Police នៅសហរដ្ឋអាមេរិក និងមេដាយអន្តរជាតិមួយចំនួនទៀត៕