កីឡា

កក្រើកថ្ងៃទី ២៥ កុម្ភៈនេះ ការប្រកួតដណ្តើមខ្សែក្រវាត់ពិភពលោក ៣ គូ

បានផុស

៤ ខែ មុន

នៅ

ថ្ងៃព្រហស្បតិ៍ ១៧ កុម្ភៈ ២០២២

ដោយ

សង្វៀន ONE Championship នឹងនាំព្រឹត្តិការណ៍ប្រកួតផ្សាយផ្ទាល់លើកទី ៤ ប្រចាំឆ្នាំ ២០២២ នេះជាមួយនឹងការប្រកួតជាច្រើនគូ ដែលមានការប្រកួតដណ្តើមខ្សែក្រវាត់ពិភពលោកដល់ទៅ៣គូក្នុងមួយរាត្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Reinier De Ridder vs Kiamrian Abbaso

ប្រសិទ្ធនាមថា សមរភូមិប្រយុទ្ធ«ONE: FULL CIRCLE»នារាត្រីថ្ងៃសុក្រ ទី២៥ ខែកុម្ភៈនេះ គូឯកប្រចាំព្រឹត្តិការណ៍ ជើងខ្លាំងហុល្លង់ Reinier De Ridder ឡើងការពារខ្សែក្រវាត់ពិភពលោកទម្ងន់ Middleweight របស់ខ្លួនលើកដំបូងទល់នឹងកីឡាករ Kiamrian Abbaso មកពីប្រទេសគៀរហ្គីស្ថាន។

Reinier De Ridder៖ ទើបប្រកួតនៅសង្វៀន ONE បាន៥ដងប៉ុណ្ណោះ ប៉ុន្តែឈ្នះខ្សែក្រវាត់ទម្ងន់ធ្ងន់ពីរគ្រឿងហើយ បន្ទាប់ពីដណ្តើមបានពីកីឡាករមីយ៉ាន់ម៉ា Aung La Nsang ទាំងពីរ។ ប៉ុន្តែបើនិយាយពីប្រវត្តិប្រកួតក្នុងអាជីពសរុប១០លើកគឺឈ្នះទាំងអស់ដោយមិនទាន់ស្គាល់ពាក្យចាញ់ឡើយ។

Kiamrian Abbaso៖ មានប្រវត្តិប្រកួតរហូតដល់២៧ដង ក្នុងនោះឈ្នះ២៣ដង និងចាញ់៤ដង។ រូបគេសក្តិសមឡើងមកប្រកួតដណ្តើមខ្សែក្រវាត់នេះណាស់ ដោយសារប្រកួត៥លើកនៅសង្វៀន ONE គឺឈ្នះ៤ដង និងចាញ់តែមួយដងប៉ុណ្ណោះ។ អ្វីដែលចាប់អារម្មណ៍គឺប្រកួតលើកដំបូងចាញ់ ប៉ុន្តែ៤លើកចុងក្រោយឈ្នះទាំងអស់។

Roman Kryklia vs Murat Aygun

ចំណែកកីឡាករអ៊ុយក្រែន Roman Kryklia ត្រូវឡើងការពារខ្សែក្រវាត់ឃីកបុកសីងទម្ងន់ធ្ងន់ Light Heavyweight របស់ខ្លួនជាមួយកីឡាករហុល្លង់កាត់តួកគី Murat Aygun បន្ទាប់ពីពន្យារពេលដោយសារកូវីដ-១៩។

Roman Kryklia៖ បានឈ្នះខ្សែក្រវាត់ឃីកបុកសីងពិភពលោក ONE Light Heavyweight បន្ទាប់ពីឈ្នះកីឡាករ Tarik Khbabez កាលពី២០១៩។ ស្ថិតប្រកួតនៅលើសង្វៀន៨៨ដង ក្នុងនោះឈ្នះ៤៥ដង និងចាញ់៤២ដង។

Murat Aygun៖ មានបទពិសោធលើសង្វៀនអាជីពឃីកបុកសីងមិនច្រើនទេពោលគឺទើបតែបាន១៨ដងប៉ុណ្ណោះ ប៉ុន្តែឈ្នះ១៧ដង និងចាញ់តែ១ដងប៉ុណ្ណោះ។

Petchmorakot vs Jamal Yusupov

អ្នកលេងមួយថៃ Petchmorakot វិលមកកាន់សង្វៀនការពារខ្សែក្រវាត់ពិភពលោក ONE Featherweight ជាថ្មីជាមួយកីឡាកររុស្ស៊ី Jamal Yusupov បន្ទាប់ពីបាត់មុខច្រើនខែ។

Petchmorakot៖ នេះជាលើកទី៣ដែលរូបគេឡើងការពារខ្សែក្រវាត់របស់ ONE Featherweight បន្ទាប់ពីលើកទី១ឈ្នះមិត្តរួមជាតិ Pongsiri និងលើកទី២ឈ្នះមិត្តរួមជាតិខ្លាចាស់ Yodsanklai ប៉ុន្តែជាលើកទី១ដែលប្រកួតការពារជាមួយកីឡាករបរទេស។ រូបគេមានបទពិសោធលើសង្វៀន២០១ដង ក្នុងនោះឈ្នះ១៦៤ និងចាញ់៣៤ដង។

Jamal Yusupov៖ រូបគេបានបង្កភាពភ្ញាក់ផ្អើលកាលពីឆ្នាំ២០១៩នៅពេលផ្តួលខ្លាចាស់ថៃ Yodsanklai ឲ្យសន្លប់នៅក្នុងទឹកទី២។ រូបគេជោគជ័យជាំនៅសង្វៀនប្រទេសចិន និងជាគ្រូបង្ហាត់ថែមទៀត ដូច្នេះអាចជាតារាគ្រោះថ្នាក់សម្រាប់កីឡាករថៃ៕