U-23 កម្ពុជា មានកីឡាករ១៥នាក់បង្ហាញខ្លួនលើកដំបូង ក្នុងព្រឹត្តិការណ៍កីឡាស៊ីហ្គេម នៅឆ្នាំនេះ

ក្រុមជម្រើសជាតិ U-23 កម្ពុជា នៅថ្ងៃទី០៩ ខែឧសភា ឆ្នាំ២០២២ នេះនឹងចាប់ការប្រកួតទី១ របស់ខ្លួនក្នុងពូល B នៃព្រឹត្តិការណ៍កីឡាស៊ីហ្គេម ដោយត្រូវជួប U-23 ឡាវ ខណៈថ្ងៃនេហផងដែរ គេរំពឹងកីឡាករកម្ពុជា ១៥នាក់នឹងបង្ហាញខ្លួនលើកដំបូងក្នុងព្រឹត្តិការណ៍ដែលធ្វើរៀងរាល់ ២ឆ្នាំម្ដងមួយនេះ។

យោងតាមបញ្ជីឈ្មោះសរុបដែលមានកីឡាករ ២០នាក់ ក្រុម U-23 កម្ពុជា មានកីឡាករ ៥នាក់ប៉ុណ្ណោះដែលធ្លាប់បានចូលរួមប្រកួតក្នុងព្រឹត្តិការណ៍នេះម្ដងហើយភាគច្រើនកាលពីឆ្នាំ២០១៩ កន្លងទៅថ្មីៗរួមមាន កីឡាករ ហ៊ុល គឺមហ៊ុយ (លើកទី២), យើ សាហ្វី (លើកទី២), សៀង ចន្ធា (លើកទី២) និងកីឡាករ ម៉ៅ ពិសិដ្ឋ (លើកទី២) លើកលែងតែ ជួន ចាន់ចាវ ចូលរួមលើកទី២ ដែរ ប៉ុន្តែលើកចុងក្រោយកាលពីឆ្នាំ២០១៧។

ក្រៅពីនេះកីឡាករ ១៥នាក់ផ្សេងទៀត ការចូលរួមលើកនេះគឺជាលើកដំបូងសម្រាប់ពួកគេរួមមាន វីរៈ ដារ៉ា,  តាំង ប៊ុនឆៃ, សឿត ណាវ៉ា, ជា សុខម៉េង, ផាត់ សុខា, វាំង ដាវ៊ីន, ញាន សុស៊ីដាន, ស៊ិន សុវណ្ណមករា,  មិន រតនៈ, ជូ ស៊ិនទី, គី រីណា, សារ ទី, លឹម ពិសុទ្ធ, អ៊ឹម សំអូន និង ណារ៉ុង កក្កដា (ជាកីឡាករកោះហៅថ្មីជំនួស អ៊ាន ពិសី ដែលរងរបួស)។

រំឮកផងដែរថា កីឡាករដែលចូលរួមព្រឹត្តិការណ៍នេះ លើប្រភេទកីឡាបាល់ទាត់ អាចធ្វើការកោះហៅសមាជិកថ្មីមកជំនួសបាន លុះត្រាតែកីឡាករម្នាក់ ឬច្រើននាក់នៃក្រុមនោះមានវិជ្ជមានកូវីដ-១៩ ហើយផ្លាស់ប្ដូរបានចំពោះតែក្នុងបញ្ជីបឋមកីឡាករ ៥០នាក់ប៉ុណ្ណោះ។

សម្រាប់ការប្រកួតថ្ងៃនេះផងដែរ នឹងធ្វើឡើងនៅវេលាម៉ោង ៤:០០រសៀល នាកីឡដ្ឋាន Thien Truong ដែលមានចំងាយប្រមាណ ៩០គីឡូម៉ែត្រពីរដ្ឋធានីហាណូយ។ ការប្រកួតនេះមានការផ្សាយផ្ទាល់នៅលើកញ្ចក់ទូរទស្សន៍ជាតិ ទទក ខណៈអ្នកគាំទ្រដែលនៅប្រទេសវៀតណាម អាចចូលទស្សនាបានដោយមិនមានការគិតថ្លៃសំបុត្រឡើយ។

ថ្ងៃនេះផងដែរ ក្រុមជម្រើសជាតិនារីកម្ពុជា ក៏មានការប្រកួតដំបូងដូចគ្នា ដោយត្រូវជួប ជម្រើសជាតិនារីហ្វីលីពីន នៅវេលាម៉ោង ៧:០០យប់ នៅកីឡដ្ឋាន Cam Pha ដែលមានចម្ងាយប្រមាណ ១៥៣គីឡូម៉ែត្រ ពីរដ្ឋធានីហាណូយ៕

អត្ថបទ៖ មន្នីរ័ត្ន