កីឡា

សម្តេចតេជោ ហ៊ុន សែន ផ្ដល់គន្លឹះ ៤ ដល់មហាសន្និបាតក្រុមប្រឹក្សាអូឡាំពិកអាស៊ី

បានផុស

១ year មុន

នៅ

ថ្ងៃអង្គារ ៤ តុលា ២០២២

ដោយ

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី០៤ ខែតុលា ឆ្នាំ២០២២ បានអញ្ជើញបើកមហាសន្និបាតក្រុមប្រឹក្សាអូឡាំពិកអាស៊ី «OCA» លើកទី៤១ ដែលធ្វើឡើងនៅរាជធានីភ្នំពេញ សណ្ឋាគារសុខា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មហាសន្និបាតក្រុមប្រឹក្សាអូឡាំពិកអាស៊ី គឺជាព្រឹត្តិការណ៍ដ៏មានសំខាន់សម្រាប់ការជជែកពិភាក្សាលើព្រឹត្តិការណ៍កីឡាអូឡាំពិកអាស៊ី និងធ្វើឡើងជារៀងរាល់ឆ្នាំ មានប្រសាសន៍ក្នុងពិធីបើក សម្តេចអគ្គមហាសេនាបតីតេជោ ហ៊ុន សែន បានផ្ដល់ចំណុចគន្លឹះសំខាន់ៗចំនួន ៤ ដល់មហាសន្និបាត។

«ទី១ ថ្ងៃនេះមានការចូលរួមយ៉ាងសកម្មពីប្រទេសសមាជិក ដែលមានបទពិសោធន៍ជាច្រើនក្នុងវិស័យកីឡា ខ្ញុំសូមលើកទឹកចិត្តឲ្យមានកិច្ចពិភាក្សា និងចែករំលែកនូវឧត្តមនវានុវត្តន៍ល្អៗនៅក្នុងមហាសន្និបាតនេះ ពាក់ព័ន្ធនឹងការរៀបចំព្រឹត្តិការណ៍កីឡាធំៗ ការគ្រប់គ្រង និងការអភិវឌ្ឍន៍បច្ចេកទេសកីឡា ដើម្បីធ្វើឲ្យវិស័យកីឡាកាន់តែប្រសើរក្នុងតំបន់អាស៊ីយើងនេះ។

ទី២ សូមក្រុមប្រឹក្សាកីឡាអាស៊ី បង្កើនការធ្វើពិពិធកម្មសកម្មភាពកីឡាឲ្យបានកាន់តែច្រើនទៀត នៅតាមបណ្ដាប្រទេសសមាជិក ដើម្បីលើកកម្ពស់វិស័យកីឡានៅតំបន់អាស៊ី និងបង្កើនការផ្សារភ្ជាប់វិស័យកីឡាទៅនឹងវិស័យសេដ្ឋកិច្ច ជាពិសេសទេសចរណ៍កីឡា ដែលត្រូវបានចាត់ទុកជាប្រភេទទេសចរណ៍បៃតង ដើម្បីពង្រឹងមិត្តភាព សាមគ្គីភាពដែលរួមចំណែកដល់ការកសាងសុខសន្តិភាពប្រកបដោយចេរភាពក្នុងតំបន់។

ទី៣ គណៈកម្មាធិការជាតិអូឡាំពិកកម្ពុជា ជាពិសេសគណៈកម្មាធិការជាតិរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ ត្រូវបង្កើនកិច្ចសហការទាំងបច្ចេកទេស និងបទពិសោធន៍ជាមួយក្រុមប្រឹក្សាអូឡាំពិកអាស៊ី គណៈកម្មាធិការជាតិអូឡាំពិកនៃប្រទេសសមាជិក ក្រុមប្រឹក្សាសហព័ន្ធកីឡាអាស៊ីអាគ្នេយ៍ ក្រុមប្រឹក្សាសហព័ន្ធកីឡាអាស៊ានប៉ារ៉ា និងស្ថាប័នកីឡាអន្តរជាតិក្នុងការបណ្ដុះបណ្ដាល និងការអភិវឌ្ឍកម្រិតបច្ចេកទេសកីឡាដល់អត្តពលិកកម្ពុជាឲ្យបានដល់កម្រិតដែលអាចធ្វើទៅបាន ដើម្បីឲ្យអត្តពលិកកម្ពុជាអាចចូលរួមកាន់តែទំលំទូលាយ ក្នុងព្រឹត្តិការណ៍អន្តរជាតិនានានៅថ្ងៃអនាគត។

ទី៤ ខ្ញុំសូមអំពាវនាវដល់បណ្ដាប្រទេសសមាជិកនៃក្រុមប្រឹក្សាអូឡាំពិកអាស៊ី មេត្តាផ្ដល់ការកាំទ្រក្នុងគ្រប់ទម្រង់តាមដែលអាចធ្វើទៅតាម ដើម្បីឲ្យការរៀបចំប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ នៅព្រះរាជាណាចក្រកម្ពុជា ទទួលបានជោគជ័យខ្ពស់។»

ចុងបញ្ចប់ សម្តេចតេជោ ហ៊ុន សែន នាយករដ្ឋមន្ត្រី បានជូនពរមហាសន្និបាតក្រុមប្រឹក្សាអូឡាំពិកអាស៊ី ទទួលបានលទ្ធផលផ្លែផ្កា និងជោគជ័យនៅថ្ងៃនេះ និងទទួលបានផាសុកភាពជាមួយនឹងភាពសប្បាយរីករាយក្នុងការស្នាក់នៅព្រះរាជាណាចក្រកម្ពុជា។

មហាសន្និបាតក្រុមប្រឹក្សាអូឡាំពិកអាស៊ី ដែលធ្វើឡើងចន្លោះពីថ្ងៃទី ០១ មានប្រតិភូផ្នែកកីឡាប្រមាណ ៣៣៦ រូប មកពី ៥៥ ប្រទេសជុំវិញពិភពលោក។ ក្នុងនោះមានប្រតិភូមកពីបណ្តាប្រទេសក្រុមប្រឹក្សាអូឡាំពិកអាស៊ី ចំនួន ៤៥ ប្រទេស ព្រមទាំងប្រទេសចលនាអូឡាំពិកអន្តរជាតិ ចូលរួមសង្កេតការណ៍ប្រមាណ ១០ ប្រទេសទៀត។ ក្រៅពីនោះ ក៏មានប្រតិភូថ្នាក់ដឹកនាំគណៈកម្មាធិការអូឡាំពិកអន្តរជាតិមួយចំនួនទៀតផងដែរ៕

អត្ថបទ៖ មន្នីរ័ត្ន