កីឡា

ស្ថាបនិកសហព័ន្ធគុនខ្មែរនៅរុស្ស៊ីប្រាប់ថា គុនខ្មែរកំពុងរីកចម្រើនខ្លាំងនៅរុស្ស៊ី

បានផុស

៣ years មុន

នៅ

ថ្ងៃចន្ទ ៣០ មករា ២០២៣

ដោយ

អ្នកគាំទ្រវិស័យកីឡាប្រដាល់គុនខ្មែរនាប៉ុន្មានថ្ងៃចុងក្រោយនេះបានចាប់អារម្មណ៍នឹងកីឡាប្រដាល់គុនខ្មែរដែលត្រូវបានផ្សព្វផ្សាយពីគម្រោងរៀបចំការប្រកួតនៅប្រទេសរុស្ស៊ីនាខែកុម្ភៈខាងមុខ ស្របពេលកីឡាប្រដាល់«គុនខ្មែរ»ត្រូវបានប្រកាសដាក់ឲ្យប្រកួតជាផ្លូវការក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Oleg Kudrinsky នាយក និងស្ថាបនិកសហព័ន្ធកីឡាប្រដាល់គុនខ្មែរនៅប្រទេសរុស្ស៊ីបានប្រាប់«កម្ពុជាថ្មី»ថា ពិតណាស់ សហព័ន្ធកីឡាប្រដាល់គុនខ្មែរប្រចាំប្រទេសរុស្ស៊ីមនឹងរៀបចំការប្រកួតជើងឯកគុនខ្មែរ Kun Khmer Cup នៅរុស្ស៊ីពីថ្ងៃទី៣ ដល់ទី៥ ខែកុម្ភៈ ឆ្នាំ២០២៣ខាងមុខនេះនៅសង្វៀន ONE X ONE Fighting Arena។

លោកបានបន្តឲ្យដឹងថា ៖«ការប្រកួតនេះមានកីឡាករ កីឡាការិនីជាង២០០នាក់មកពីតំបន់ និងទីក្រុងផ្សេងៗនៅប្រទេសរុស្ស៊ីចូលរួមប្រកួត។ សម្រាប់កីឡាករ កីឡាការិនីឆ្នើមៗបំផុតនឹងចូលរួមការប្រកួតលក្ខណៈអន្តរជាតិ និងកម្រិតអាជីព។ និយាយទៅគុនខ្មែរនៅប្រទេសរុស្ស៊ីបានកំពុងរីកចម្រើនខ្លាំងក្នុងរយៈពេលជាង៥ឆ្នាំកន្លងទៅ ដោយមានក្លឹបតាមតំបន់ និងទីក្រុងជាច្រើនបានចូលជាសមាជិកសហព័ន្ធ ដើម្បីក្លាយជាគ្រួសារកីឡាគុនខ្មែរ»។

លោកបានបញ្ជាក់ថា សហព័ន្ធកីឡាប្រដាល់គុនខ្មែរប្រចាំនៅប្រទេសរុស្ស៊ីត្រូវបានបង្កើតឡើងកាលពីឆ្នាំ២០១៨ ដោយមានលោក Pavel Arais ជាប្រធាន ខ្លួនលោកផ្ទាល់ជានាយក និងជាស្ថាបនិក និងលោក Sergey Babayan ជាអនុប្រធាន ព្រមទាំងមានក្លឹបជាច្រើនជាសមាជិក៕