កីឡា

ឈឿង ល្វៃ សុំសម្រាកមួយរយៈដោយនិយាយថា «មិនមានមុខជួបបងប្អូនទៀតទេ»

បានផុស

៣ years មុន

នៅ

ថ្ងៃចន្ទ ២៦ មិថុនា ២០២៣

ដោយ

ម្ចាស់មេដាយមាសស៊ីហ្គេម ឈឿង ល្វៃ បានសុំទោសដល់អ្នករាល់គ្នា និងនិយាយថា គ្មានមុខជួបប្អូនទៀតទេ បន្ទាប់ពីរូបគេធ្វើមិនបានល្អក្នុងជំនួបសងសឹកលើអ្នកលេងឆ្លងដែនថៃ សាមី បានចាមេក នាយប់ថ្ងៃអាទិត្យ ទី២៥ ខែមិថុនា ឆ្នាំ២០២៣។

ឈឿង ល្វៃ ត្រូវបានកីឡាករថៃ សាមី វាយយកឈ្នះបានយ៉ាងលឿនត្រឹមទឹកទី១ដោយប្រើកណ្តាប់ដៃ និងទាត់ជើងក្រោមឲ្យអាជ្ញាកណ្តាលរាប់៨ដល់ទៅ២ដង និងលើកទី៣ត្រូវបានអាជ្ញាកណ្តាលបញ្ឈប់ការប្រកួតតែម្តង។

ក្រោយចប់ការប្រកួត កីឡាករប្រដាល់មកពីខេត្តកំពង់ធំបាននិយាយថា ៖«សុំទោសបងប្អូន សុំទោសលោកគ្រូ សុំទោសដែលខ្ញុំធ្វើមិនបាន។ ខ្ញុំសុំសម្រាកមួយរយៈហើយ អរគុណដែលចាំគាំទ្រ។ ខ្ញុំខំពង្រឹងដែរ នៅតែមិនទាន់ជា។ អរគុណក្តីស្រឡាញ់របស់បងប្អូន មិនមានមុខជួបបងប្អូនទៀតទេ។ សុំមិនមានការឆ្លើយតបអាធ្យាស្រ័យ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសំណេរនេះមានន័យថា ជើងដែលធ្លាប់ត្រូវបានកីឡាករថៃ សាមី ទាត់ឲ្យដើរលែងរួចក្នុងជំនួបលើកទី១កាលពីខែមេសានោះមិនទាន់ជាសះស្បើយពេញលក្ខណៈឡើយ បើទោះបីជារូបគេបានពង្រឹងច្រើនសប្តាហ៍ក៏ដោយ។ រូបគេនឹងសម្រាកពង្រឹងវិជ្ជាគុនយូរទៀតដើម្បីធ្វើឲ្យកាយសម្បទារឹងមាំ ស៊ូធន់ និងមានគុណភាព។

ឈឿង ល្វៃ ជាកីឡាករដែលមានអាវុធល្អ និងកាយសម្បទាអំណោយផលពីធម្មជាតិ ប៉ុន្តែរូបគេនៅខ្ចីទាំងភាពធន់ ស៊ូ និងកម្លាំងស៊ុហ្វ។ នៅពេលដៃគូវាយត្រូវធ្ងន់គឺងាយបាក់ស្រុត និងឈឺចាប់។ រូបគេត្រូវការបង្កើនការហ្វឹកហាត់ឲ្យខ្លាំងបន្ថែមទៀត។

ទោះបីជាយ៉ាងណា ពាក្យថា កីឡាគឺមានឈ្នះ ចាញ់ និងស្មើ ដូច្នេះអ្វីដែលសំខាន់ ត្រូវមានស្មារតីតស៊ូ មិនបោះបង់ និងព្យាយាមពង្រឹងសមត្ថភាពបន្តទៀត។

មុនពេលប្រកួតជាមួយ សាមី លើកទី២នេះ ឈឿង ល្វៃ បានប្រកួតឈ្នះកីឡាករថៃសម្រាប់ប្រភេទកីឡាឃីកបុកស៊ីងដែលធ្វើឲ្យរូបគេបានឈ្នះមេដាយមាសក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ៕

អត្ថបទ៖ វីរបុត្រ