Pep Muñoz ចង់ឲ្យមានការពង្រឹងសមត្ថភាពរបស់អាជ្ញាកណ្ដាលបន្ថែមទៀត

លោក Pep Muñoz គ្រូបង្វឹកក្លិបព្រះខ័នរាជស្វាយរៀងមានការភ្ញាក់ផ្អើលយ៉ាងខ្លាំងពីកម្រិតបាល់ទាត់ក្នុងលីគកំពូលកម្ពុជា ក្រោយ​លោក​ដឹកនាំបាន៩ប្រកួតជាមួយលទ្ធផលដ៏ល្អដែលមិនចាញ់សោះក្នុងជុំទី១។ ជាមួយគ្នានេះ​លោកក៏ចង់ឲ្យមានការពង្រឹងមន្ដែមលើសមត្ថភាព​របស់​មន្ត្រី​អាជ្ញាកណ្តាល​លើទីលាន​នៃ​លីគកំពូល​កម្ពុជា។

លោក Pep Muñoz និយាយថា៖«ខ្ញុំគិតថា ក្រុមអាជ្ញាកណ្ដាលកាត់សេចក្តីក្នុងការប្រកួតត្រូវការជំនួយបន្ថែមដូចជាការឆែកមើលវីដេអូក្នុង​ពេលមានការបង្កកំហុសលើទីលាន ដើម្បីជាជំនួយបន្ថែមឲ្យមានភាពងាយស្រួលក្នងការសម្រេចចិត្តពាក់ព័ន្ធជាមួយការកាត់សេចក្តីនិងពង្រឹងបន្ថែមសមត្ថភាពកាត់​សេចក្តីរបស់ពូកគាត់»។

ពានរង្វាន់ខេមបូឌានព្រីមៀរលីគរដូវកាល ២០២៣-២៤ បានបញ្ចប់ការប្រកួតជុំទី១ ដោយចាប់ផ្តើមការប្រកួតដំបូងតាំងពីថ្ងៃទី៥ ខែសីហា ឆ្នាំ២០២៣។ ឆ្លងកាត់ការប្រកួតប្រជែងជិត៣ខែ ក្នុងរដូវកាលថ្មីនេះគឺសង្កេតឃើញថាមានភាពខុសប្លែកគ្នាជាច្រើនបើបៀបធៀបនឹង​រដូវកាលមុន។ ចំនួនអ្នកគាំទ្រក៏មានការកើនឡើង ខណៈការប្រកួត​លើ​ទីលានកាន់តែមានភាពតានតឹង ប៉ុន្តែក្នុងក៏មានរឿង​ខ្លះដែលកើតមានជុំវិញការកាត់សេចក្តីរបស់អាជ្ញាកណ្ដាលផងដែរ។

លោក Pep Muñoz បានបន្ថែមថា៖«លីគកំពូលមានភាពល្អប្រសើរច្រើន។ ក្រុមទាំងអស់ក៏មានការរៀបចំបានល្អបូករួម​ទាំង​កីឡាករ​មានគុណភាព និងសមត្ថភាព។ ការប្រកួតក្នុងលីគទាំងអស់សុទ្ធតែជាការប្រកួត​ដ៏​លំបាក។ សម្រាប់ខ្ញុំកម្រិតនៃការប្រកួតប្រជែងក្នុងលីគកំពូលកម្ពុជាមានភាពល្អប្រសើរលើពីអ្វីដែលខ្ញុំរំពឹងទុកទៅទៀត»៕

អត្ថបទ៖ ផា រតនា