យប់នេះ Bayern ត្រូវការឈ្នះដាច់ខាតដើម្បីឡើងទៅវគ្គ៨ក្រុម UCL

ក្រុម Bayern Munich ត្រូវបើកទ្វារកីឡដ្ឋាន Allianz Arena ទទួលក្រុមភ្ញៀវ Lazio ការប្រកួតជើងទី២ ពានរង្វាន់ UEFA Champion League នាវេលាម៉ោង៣យប់ ខណៈក្រុមម្ចាស់ផ្ទះត្រូវការជ័យជម្នះចាំបាច់ដើម្បីឱកាស​ឡើងទៅវគ្គ៨ក្រុមចុងក្រោយ។

Bayern Munich ធ្វើមិនបានល្អទេនាប៉ុន្មានប្រកួតចុងក្រោយ។ យប់នេះពួកគេត្រូវការជ័យជម្នះជាដាច់ខាត​ បន្ទាប់​ពី​​ជើងទី១ ពួក​គេ​បាន​ចាញ់​​អាល្លឺម៉ង់ Lazio ១-០ កាលពីថ្ងៃទី១៦ ខែកុម្ភៈ។ ក្នុងរដូវកាលនេះ Bayern Munich ​ក៏​ធ្វើមិនបានល្អ​ក្នុង​លីគកំពូលអាល្លឺម៉ង់​។ គិតត្រឹមសប្ដាហ៍ទី២៤ ពួកគេតាមពី​ក្រោយ​ក្រុមលេខ១ Bayer Leverkusen រហូតដល់ទៅ១០ពិន្ទុ។

ចំពោះប្រវត្តិជួបគ្នា៣លើកចុងក្រោយ ក្រុម Bayern Munich ឈ្នះ២ និងចាញ់១។ Lazio វិញក៏ធ្វើមិនបានល្អ​ដែរ​ក្នុង​លីគ។ គិតត្រឹមសប្ដាហ៍ទី២៧ លីគ​អុីតាលី ពួកគេឈរ​លេខ៩ កំពុងប្រឈម​អត់​បាន​កៅអីលេង​ពានរង្វាន់អឺរ៉ុប រដូវកាលក្រោយ។ យប់​នេះ Lazio មានផលចំណេញដោយសារ​បាន​យក​ឈ្នះ​កាលពីជើងទី១ ដូច្នេះការប្រកួតជើងទី២ ពួក​គេ​ត្រូវ​ការ​ត្រឹម​ស្មើ ក៏​បាន​ឡើង​វគ្គបន្ត។

ការប្រកួតចុងក្រោយរបស់ក្រុមទាំង២ សុទ្ធតែធ្វើមិនបានល្អដូចគ្នា។ កាលពីថ្ងៃសៅរ៍ Bayern Munich បានត្រឹមស្មើគ្នា ២-២ ជាមួយក្រុម SC Freiburg ខណៈក្រុម Lazio ចាញ់ក្រុម AC Milan ១-០។ យប់នេះ ចាំមើលថា ក្រុមយក្សអាល្លឺម៉ង់​ Bayern Munich អាចវាយបកយកឈ្នះក្រុម​អុីតាលី Lazio ដើម្បីឡើងទៅវគ្គបន្តបានដែរទេ៕

អត្ថបទ៖ ផា រតនា