កីឡា

ភ្លើងគប់អូឡាំពិក២០២៤ ចាប់ផ្តើមបំភ្លឺនៅកន្លែងកំណើត មុនពេលដង្ហែទៅបារាំង

បានផុស

២ ខែ មុន

នៅ

ថ្ងៃព្រហស្បតិ៍ ១៨ មេសា ២០២៤

ដោយ

កាលពីថ្ងៃអង្គារ៍ ទី១៦ ខែមេសា ភ្លើងគប់កីឡាអូឡាំពិក ទីក្រុងប៉ារីស ឆ្នាំ២០២៤ ត្រូវបានបំភ្លឺក្នុងពិធីប្រពៃណីមួយនៅក្នុងទីក្រុងអូឡាំព្យាបុរាណ ប្រទេសក្រិកជាកន្លែងកំណើតកីឡាអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាសម្តែងជនជាតិក្រិក អ្នកនាង Mary Mina ដែលដើរតួជាបូជាចារ្យជាន់ខ្ពស់ បានដុតភ្លើងកាលពីថ្ងៃអង្គារ៍ ដោយប្រើអណ្តាតភ្លើងបម្រុងជំនួសកញ្ចក់ប៉ារ៉ាបូល ដោយសារមេឃមានពពកច្រើនសម្រាប់ការចាប់ផ្តើមពិធីដង្ហែបន្តពីប្រទេសក្រិក ទៅប្រទេសបារាំង។

ពិធីដង្ហែភ្លើងអូឡាំពិកនឹងបញ្ចប់ក្នុងរដ្ឋធានីបារាំង ជាពេលពិធីបើកជាផ្លូវការរបស់ម្ចាស់ផ្ទះកីឡាអូឡាំពិករដូវក្តៅ និងជាលើកទី៣ដែលបារាំងបានធ្វើម្ចាស់ផ្ទះ បន្ទាប់ពីធ្លាប់ធ្វើនៅឆ្នាំ១៩០០ និង១៩២៤។

អណ្ដាតភ្លើងនេះនឹងត្រូវប្រគល់ជាផ្លូវការទៅឱ្យអ្នករៀបចំកម្មវិធីអូឡាំពិក នាទីក្រុងប៉ារីស នៅក្នុងកីឡដ្ឋាន Panathenaic របស់ទីក្រុងអាតែនដែលជាទីតាំងរៀបចំកីឡាអូឡាំពិកសម័យទំនើបដំបូង នៅថ្ងៃទី២៦ ខែមេសា ឆ្នាំ១៨៩៦ បន្ទាប់ពីការដង្ហែរយៈពេល ១១ថ្ងៃនៅទូទាំងប្រទេសក្រិក។

បន្ទាប់មកនឹងចេញដំណើរនៅថ្ងៃបន្ទាប់ទៅកាន់ប្រទេសបារាំងនៅលើសំពៅដែលមានឈ្មោះថា Belem ឆ្ពោះទៅទីក្រុង Marseille នៅថ្ងៃទី៨ ខែឧសភា ជាមួយនឹងមនុស្សប្រមាណ ១៥០,០០០នាក់ ដែលត្រូវបានរំពឹងនឹងចូលរួមក្នុងពិធីនេះនៅកំពង់ផែចាស់របស់ទីក្រុងភាគខាងត្បូង។

ទីក្រុង Marseille ដែលបង្កើតឡើងដោយអ្នកតាំងលំនៅក្រិក Phocaea ប្រហែល ៦០០ឆ្នាំមុនគ្រិស្តសាករាជ នឹងក៏ជាកន្លែងរៀបចំការប្រកួតកីឡាទូកក្តោង សម្រាប់អូឡាំពិក២០២៤នេះផងដែរ។

ការដង្ហែនៅប្រទេសបារាំងនឹងប្រើពេល៦៨ថ្ងៃ ហើយគ្រោងនឹងបញ្ចប់នៅទីក្រុងប៉ារីស នាថ្ងៃទី២៦ ខែកក្កដា ឆ្នាំ២០២៤៕