ក្លិប Barcelona សម្រេចចិត្តនឹងទិញផ្តាច់ Rashford ពី Man United ហើយ

ក្លិបអ្នកមានបុណ្យ FC Barcelona បានធ្វើការសម្រេចចិត្តរួចរាល់អំពីអនាគតរបស់កីឡាករ Marcus Rashford ដោយពួកគេគ្រោងនឹងទិញផ្តាច់ខ្សែប្រយុទ្ធស្លាបសញ្ជាតិ អង់គ្លេស រូបនេះពី Manchester United នៅចុងបញ្ចប់រដូវកាលនេះ។

Rashford នៅរដូវកាល ២០២៥-២០២៦ ត្រូវបាន Barcelona ខ្ចីជើងពី Man United មួយរដូវកាលអមជាមួយជម្រើសទិញផ្តាច់ក្នុងតម្លៃ ៣៥ លានដុល្លារអាមេរិក។ យ៉ាងណា ចាប់តាំងពីផ្លាស់មកកាន់ទឹកដី អេស្ប៉ាញ ខ្សែប្រយុទ្ធសញ្ជាតិ អង់គ្លេស វ័យ ២៧ ឆ្នាំ បានបង្ហាញសមត្ថភាពល្អគួរឱ្យកត់សម្គាល់ ដោយការបង្ហាញខ្លួនលើទីលានសរុបចំនួន ១១ ប្រកួត រូបគេរកបាន ៣ គ្រាប់ និង ៥ បញ្ជូន (assists)។

ក្រោយបង្ហាញសមត្ថភាពល្អបែបនេះ បានធ្វើឱ្យថ្នាក់ដឹកនាំ Barcelona ក៏ដូចជាគ្រូបង្វឹកលោក Hansi Flick ពេញចិត្តលើ Rashford ជាខ្លាំង។ ថ្មីៗនេះសារព័ត៌មាន អេស្ប៉ាញ SPORT បានចុះផ្សាយថា ក្លិប Barcelona បានត្រៀមរួចរាល់ហើយ ដើម្បីទិញផ្តាច់យក Rashford នៅរដូវកាលក្រោយ ទោះបីជាមានការជជែកអំពីតម្លៃខ្លះ ដោយ​សារតែស្ថានភាពវិបត្តិហិរញ្ញវត្ថុក៏ដោយ។

ប្រភពដដែលបានបន្ថែមថា Barcelona អាចមានលទ្ធភាពទិញផ្តាច់យក Rashford ក្នុងតម្លៃ ៣៥ លានដុល្លារអាមេរិក តាមអ្វីដែល Man United ចង់បាន ប៉ុន្តែរឿងប្រាក់ឈ្នួល Rashford ទំនងនឹងត្រូវកាត់បន្ថយ ដោយរូបគេនឹងមិនអាចទទួលបានដូចនៅ Man United ដែលទទួលបានក្នុងមួយសប្តាហ៍ចំនួន ៤២.៣២ ម៉ឺនដុល្លារអាមេរិកឡើយ។

ងាកមកកាន់ Rashford ដែលជាសមីកីឡាករផ្ទាល់វិញ ក៏មិនមា​នការស្តាយក្រោយក្នុងការចាកចេញពី Man United ផ្លាស់មកកាន់ Barcelona ដែរ ហើយតាមសម្តី ដែលគេធ្លាប់និយាយកន្លងមក គឺរូបគេចង់លេងនៅទឹកដី អេស្ប៉ាញ ឱ្យបានច្រើនរដូវកាល តាមដែលអាចធ្វើទៅបាន៕

ប្រែសម្រួល៖ សេម កុសល
ប្រភព៖ Sportbible