កូនប្រុសលោកស្រី អ៊ុងសាន ស៊ូជី អំពាវនាវ​ឲ្យ​ដោះលែង​ម្ដាយ​ជា​បន្ទាន់ក្នុង​សន្និសីទនៅសាធារណរដ្ឋឆែក

លោក Kim Aris កូនប្រុសរបស់អតីមេដឹកនាំមីយ៉ាន់ម៉ាលោកស្រី Aung San Suu Kyi ដែលកំពុងជាប់ពន្ធនាគារបានអំពាវនាវឱ្យមានការដោះលែងលោកស្រីជាបន្ទាន់ក្នុងអំឡុងពេលសន្និសីទ Forum 2000 លើកទី ២៩ នៅទីក្រុង Prague សាធារណរដ្ឋឆែក ចាប់ពីថ្ងៃទី ១២ដល់ថ្ងៃទី១៤ ខែតុលា។ នេះបើយោងតាមការចេញផ្សាយរបស់ Mizzima News នៅថ្ងៃទី១៤ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងតាមរយៈវីដេអូខល Aris បានជំរុញឱ្យមេដឹកនាំពិភពលោក និងអ្នកចូលរួមគាំទ្រកិច្ចខិតខំប្រឹងប្រែងដើម្បីដោះលែងម្តាយរបស់គាត់ និងអ្នកទោសនយោបាយផ្សេងទៀតនៅក្នុងប្រទេសមីយ៉ាន់ម៉ា។ លោកបានរំលឹកពួកគេថា លោកស្រី Aung San Suu Kyi គឺជាមិត្តជិតស្និទ្ធរបស់អតីតប្រធានាធិបតីឆែកលោក Vaclav Havel ដែលបានបង្កើតសន្និសីទ Forum 2000 ហើយបាននិយាយថា ប្រជាជនមីយ៉ាន់ម៉ានៅតែត្រូវការជំនួយពីអន្តរជាតិដើម្បីស្តារលទ្ធិប្រជាធិបតេយ្យឡើងវិញ។

ប្រធានាធិបតីឆែកលោក Petr Pavel ក៏បានថ្លែងនៅក្នុងព្រឹត្តិការណ៍នេះផងដែរ ដោយសរសើរមនុស្សដែលការពារសេរីភាព និងក្រោកឈរឡើងដើម្បីជួយអ្នកដទៃ។ លើសពីនេះសន្និសីទក៏បានពិភាក្សាអំពីបញ្ហាប្រឈមជាសកលធំៗ ដូចជាសង្រ្គាមរបស់រុស្ស៊ីនៅអ៊ុយក្រែន ការរីករាលដាលនៃរដ្ឋាភិបាលផ្តាច់ការ ព័ត៌មានក្លែងក្លាយ និងបញ្ហាដែលបច្ចេកវិទ្យាប៉ះពាល់ដល់លទ្ធិប្រជាធិបតេយ្យ។

គួរបញ្ជាក់ថាសន្និសីទ Forum 2000 ត្រូវបានបង្កើតឡើងក្នុងឆ្នាំ ១៩៩៧ ដោយអតីតប្រធានាធិបតីឆែកលោក Vaclav Havel, អ្នកឈ្នះរង្វាន់ណូបែលសន្តិភាពលោក Elie Wiesel និងសប្បុរសជនដ៏ធំបំផុតរបស់ប្រទេសជប៉ុនលោក Yohei Sasakawa ។ ជារៀងរាល់ឆ្នាំ វេទិកានេះបានប្រមូលផ្តុំមេដឹកនាំ និងសកម្មជនពិភពលោក ដើម្បីពិភាក្សាអំពីបញ្ហាសំខាន់ៗ ដូចជាសិទ្ធិមនុស្ស សន្តិភាព និងលទ្ធិប្រជាធិបតេយ្យ៕

អត្ថបទ៖ ប៊ុន សុភាព