ព័ត៌មានអន្ដរជាតិ

លោកត្រាំជំរុញឲ្យហ្សេលេនស្គីទទួលយកលក្ខខណ្ឌរបស់ពូទីន បើមិនដូច្នេះនឹងត្រូវរុស្ស៊ីកម្ទេច

បានផុស

៩ ខែ មុន

នៅ

ថ្ងៃចន្ទ ២០ តុលា ២០២៥

ដោយ

Chheang

យោងតាមសេចក្ដីរាយការណ៍របស់ Financial Times ក្រៅតែពីជំនួបផ្លូវការរវាងលោក ដូណាល់ ត្រាំ និងលោក វ៉ូឡូឌីមៀរ ហ្សេលេនស្គី នៅសេតវិមានកាលពីថ្ងៃសុក្រសប្ដាហ៍មុន ក៏មានកិច្ចពិភាក្សាបិទទ្វារដ៏ក្ដៅគគុកទៀតមួយផងដែររវាងមេដឹកនាំទាំងពីរ ដោយក្នុងនោះលោកត្រាំបានជំរុញឲ្យលោកហ្សេលេនស្គីទទួលលក្ខខណ្ឌបញ្ចប់សង្គ្រាមរបស់រុស្ស៊ី បើមិនដូច្នោះទេអ៊ុយក្រែននឹងត្រូវរុស្ស៊ីកម្ទេចចោលតែម្ដង។

លោក ហ្សេលេនស្គី និងលោក ត្រាំ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Financial Times បានចុះផ្សាយកាលពីថ្ងៃអាទិត្យទី១៩ខែតុលាថា ប្រភពជាច្រើនដែលដឹងពីកិច្ចប្រជុំ បានលើកឡើងថា លោកត្រាំបានព្រមានលោកហ្សេលេនស្គីឲ្យធ្វើកិច្ចព្រមព្រៀង ឬប្រថុយនឹងការបំផ្លិចបំផ្លាញពីប្រទេសរុស្ស៊ី។ លោកត្រាំបានប្រាប់មេដឹកនាំអ៊ុយក្រែនថា ទីក្រុងកៀវកំពុងចាញ់សង្គ្រាមហើយ «ប្រសិនបើ [មេដឹកនាំរុស្ស៊ី] ចង់បានវា គាត់នឹងបំផ្លាញអ្នក»។ កាន់តែភ្ញាក់ផ្អើលជាងនេះ ប្រភពបានឲ្យដឹងទៀតថា លោកត្រាំបានគ្រវែងចោលផែនទីសមរភូមិរបស់អ៊ុយក្រែន ហើយប្រាប់លោកហ្សេលេនស្គីថា លោកពិតជាធុញទ្រាន់នឹងមើលឃើញផែនទីទាំងនោះណាស់។

ការប្រឈមមុខដាក់គ្នានេះ បានធ្វើឡើងក្រោយមានការហៅទូរសព្ទរវាងលោកត្រាំ និងប្រធានាធិបតីរុស្ស៊ីលោក វ៉្លាឌីមៀរ ពូទីន ក្នុងអំឡុងពេលដែលមេដឹកនាំរុស្ស៊ីត្រូវបានគេរាយការណ៍ថាបានស្នើឲ្យអ៊ុយក្រែនបោះបង់ចោលតំបន់ Donbas ទាំងមូលជាថ្នូរនឹងការរក្សា«ផ្នែកតូចមួយចំនួន» នៃតំបន់ Kherson និង Zaporizhzhia។

ថ្លែងបន្ទាប់ពីកិច្ចប្រជុំនៅអាមេរិក លោកហ្សេលេនស្គី បាននិយាយថា «ជំហានត្រូវសម្រេចចិត្តគឺចាំបាច់ត្រូវការពីសហរដ្ឋអាមេរិក អឺរ៉ុប បណ្តាប្រទេស G20 និង G7» ដើម្បីបញ្ចប់សង្រ្គាម ប៉ុន្តែលោកមិនបានធ្វើអត្ថាធិប្បាយលើកិច្ចពិភាក្សាតឹងសរសៃករវាងជាមួយលោកត្រាំ ដែលត្រូវ Financial Times រាយការណ៍នោះទេ។

នៅក្នុងបទសម្ភាសន៍ជាមួយ Fox News កាលពីថ្ងៃអាទិត្យ លោកត្រាំ បានលើកឡើងថា លោកពូទីននឹងយកអ្វីមួយពីអ៊ុយក្រែន ដោយបន្ថែមថា «ខ្ញុំមានន័យថា ពួកគេបានប្រយុទ្ធគ្នា គាត់ដណ្ដើមបានធនធានច្រើន…គាត់បានឈ្នះធនធានមួយចំនួន»។

លោកត្រាំ ជាថ្មីម្តងទៀតបានបដិសេធក្នុងការផ្តល់មីស៊ីល Tomahawk ដល់ទីក្រុងកៀវ ដូចដែលបានស្នើសុំដោយលោកហ្សេលេនស្គី ហើយនិយាយលើកហេតុផលថា សហរដ្ឋអាមេរិកក៏មានតម្រូវការសម្រាប់មីស៊ីលទាំងនោះផងដែរ៕

ដោយ៖ ឈាង