ព័ត៌មានជាតិ

អង្គការទស្សនៈពិភពលោកអំពាវនាវឱ្យមានការការពារកុំឱ្យមានគ្រោះថ្នាក់បន្ថែមទៀតលើកុមារនិងសហគមន៍

បានផុស

៦ ខែ មុន

នៅ

ថ្ងៃអង្គារ ៩ ធ្នូ ២០២៥

ដោយ

អង្គការទស្សនៈពិភពលោកអន្តរជាតិប្រចាំកម្ពុជា បានបង្ហាញក្ដីបារម្ភបន្ទាប់ពីមានការប៉ះទង្គិចប្រដាប់អាវុធរវាងកម្ពុជានិងថៃសាជាថ្មី និងអំពាវនាវឱ្យមានការខិតខំប្រឹងប្រែងការពារកុំឱ្យមានគ្រោះថ្នាក់បន្ថែមទៀត និងធានាសុវត្ថិភាព និងសុខុមាលភាពរបស់កុមារ និងសហគមន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីថ្លែងការណ៍របស់ WV ប្រចាំកម្ពុជាថ្ងៃទី៨ ខែធ្នូ បានលើកឡើងថាពេលនេះអង្គការកំពុងវាយតម្លៃពីតម្រូវការបន្ទាន់និងធ្វើការជាមួយអាជ្ញាធរកម្ពុជាដើម្បីជួយគាំទ្រដល់គ្រួសារដែលរងផលប៉ះពាល់។

ក្នុងសេចក្ដីថ្លែងការណ៍នោះលើកឡើងថា៖ «អង្គការទស្សនៈពិភពលោកអន្តរជាតិ ប្រចាំនៅកម្ពុជាមានការព្រួយបារម្ភយ៉ាងខ្លាំងចំពោះការប៉ះទង្គិចគ្នានៅតាមបណ្តោយព្រំដែនកម្ពុជា-ថៃ ដែលបណ្តាលឱ្យមានការផ្លាស់ទី និងការរំខានដល់អាយុជីវិត។ កុមារគឺជាជនងាយរងគ្រោះបំផុតក្នុងវិបត្តិនេះ»។

នាយកប្រចាំប្រទេសនៃអង្គការទស្សនៈពិភពលោកប្រចាំកម្ពុជាលោក ជេណេស អ៊ីម៉ានួអែល ហ្គីនទីញ បានបង្ហាញក្ដីបារម្ភថាអង្គការលោកទើបតែបានរៀបចំកម្មវិធីជួយស្ដារដល់កុមារ និងសហគមន៍ដែលរងផលប៉ះពាល់ពីការប៉ះទង្គិចគ្នាកាលពីចុងខែកក្កដាកន្លងទៅ ហើយអ្វីដែលកើតឡើងនៅពេលនេះគឺបានបង្កើតនូវការឈឺចាប់ និងលំបាកបន្ថែមទៀតដល់ជនស៊ីវិល។

លោកបន្ថែមថា៖ «ទស្សនៈពិភពលោក និងសហគមន៍សប្បុរសធម៌ យើងបន្តសង្ឃឹម និងបួងសួងសុំសន្តិភាពសម្រាប់ប្រទេសទាំងពីរដែលអាចរួមគ្នាស្វែងរកសន្តិភាព និងដំណោះស្រាយដែលស្ថិតស្ថេរ»។

ដោយគ្មានការប្រកាសជាមុនទាហានថៃបានបើកការវាយប្រហារមកលើកម្ពុជាតាមបណ្តោយព្រំដែនចាប់តាំងពីព្រឹកថ្ងៃទី៨ ខែធ្នូ បានបង្ខំឱ្យពលរដ្ឋខ្មែររត់ភៀសខ្លួនគេចទៅទីតាំងសុវត្ថិភាពជាបន្តបន្ទាប់ សាលារៀនក្នុងខេត្តជាប់បន្ទាត់ព្រំដែនជាមួយថៃ៤ខេត្តបិទទ្វារសរុប ៣៧៧សាលា គ្រូបង្រៀន៣១៩៧នាក់ ប៉ះពាល់សិស្សសរុប ៧៨ ៥៨៥នាក់។ គិតត្រឹមម៉ោង៦ព្រឹកថ្ងៃទី៩ ខែធ្នូនេះមានមនុស្សជាង២ម៉ឺននាក់បានភៀសសឹក ខណៈមនុស្ស៧នាក់ស្លាប់ និងរបួស២០នាក់៕