ឆ្នាំ២០២៥ មានអ្នកជំងឺគ្រុនឈាមសរុបជាង ៥ម៉ឺនករណី ក្នុងនោះស្លាប់ ៦៤ករណី

លោក ឡូ វាសនាគិរី រដ្ឋលេខាធិការក្រសួងសុខាភិបាល បានឱ្យដឹងថា ក្នុងឆ្នាំ២០២៥ មានអ្នកជំងឺគ្រុនឈាមសរុបចំនួន ៥៣ ៣៩៧ករណី ក្នុងនោះស្លាប់ ៦៤ករណី។ នេះបើតាមរបាយកាណ៍របស់លោក នៅក្នុង «សន្និបាតបូកសរុបការងារសុខាភិបាលលើកទី៤៥ ឆ្នាំ២០២៥ និងលើកទិសដៅការងារបន្ត» នាព្រឹកថ្ងៃទី២៦ ខែមករា ឆ្នាំ២០២៦។

បើតាមលោក ឡូ វាសនាគិរី ក្រៅពីជំងឺគ្រុនឈាម មានអ្នកជំងឺអេដស៍ដែលកំពុងព្យាបាលដោយឱសថប្រឆាំងមេរោគអេដស៍កើនឡើងពី ៦៦ ៩៩៤នាក់ ដល់៧១ ៦៩៧នាក់ ឬកើនឡើង ២,៤៣ភាគរយ ធៀបនឹងឆ្នាំ២០២៤ អ្នកជំងឺ ៦៩៧នាក់ ក្នុងនោះមនុស្សពេញវ័យ ៦៨៨នាក់ និងកុមារ ៩នាក់ ត្រូវាយការថាស្លាប់។ រីឯអត្រាជោគជ័យនៃការព្យាបាលជំងឺរបេងនៅរក្សាបានខ្ពស់ រហូតដល់ ៩៦%។ ចំណែក គោលដៅជាតិលុបបំបាត់ជំងឺគ្រុនចាញ់នៅឆ្នាំ២០២៥ ត្រូវបានសម្រេច ដោយសារគ្មានករណីឆ្លងថ្មីនៅក្នុងខែធ្នូ ឆ្នាំ២០២៥ និងគ្មានករណីសស្លាប់តាំងពីឆ្នាំ២០១៨។

ដោយឡែក ករណីថ្មីជំងឺទឹកនោមផ្អែម ដែលបានទៅពិនិត្យ ព្យាបាល នៅមូលដ្ឋានសុខាភិបាលសាធារណៈមានចំនួន ២៩២ ១៩៧ករណី កើនឡើង ២៦,៨% ធៀបនឹងឆ្នាំ២០២៤ អ្នកជំងឺសម្រាកពេទ្យមានចំនួន ១៨ ៤២៩នាក់។ ករណីថ្មីជំងឺលើសសម្ពាធឈាម មានចំនួន ៤៥១ ០០៩ករណី កើនឡើង១២,២០% និងអ្នកសម្រាកព្យាបាលមានចំនួន ៤១ ៤៦៣នាក់ ដោយកើនឡើង១៩,១៧% ធៀបនឹងឆ្នាំ២០២៤។

ការពិនិត្យពិគ្រោះជំងឺបេះដូងសរសៃឈាម មានចំនួន ១៥ ៣២៤កររណី និងអ្នកជំងឺសម្រាកព្យាបាលមានចំនួន ២៥ ៤៨១នាក់ ក្នុងនោះអ្នកជំងឺ ១ ០៩១នាក់ បានបាត់បង់ជីវិត។ លោក ឡូ វាសនាគិរី បានឱ្យដឹងទៀតថា មានអ្នកជំងឺមហារីក ទៅទទួលសេវាព្យាបាលចំនួន ៣៥ ៩២១នាក់ កើនឡើង ១៣,៩% ធៀបនឹងឆ្នាំ២០២៤ ក្នុងនោះអ្នកជំងឺ ១៥៥នាក់ បានបាត់បង់ជីវិត៕