លោក ត្រាំ ហៅ​ច្រក Hormuz បន្លំមែនថា ជាច្រក«សមុទ្រត្រាំ»​

ប្រធានាធិបតីអាមេរិក លោក ដូណាល់ ត្រាំ បាន​ព្រមាន​​ជាថ្មី​​ឲ្យអ៊ីរ៉ង់ត្រូវតែបើកច្រកសមុទ្រ Hormuz ប្រសិនបើខ្លួនចង់ឈានដល់កិច្ចព្រមព្រៀងសន្តិភាព ហើយ​​លោក ត្រាំ ថែម​ទាំង​​ព្រលយ​បែប​​​លេងសើចបន្លំ​មែន ដោយ​លំហៅ ច្រកសមុទ្រ​ហ័រមូស​ដ៏ចម្រូង​ចម្រាស​នេះ ថា​​ជា «ច្រកសមុទ្រត្រាំ»។ នេះបើយោងតាមសារព័ត៌មាន timesofisrael បានចុះផ្សាយនាថ្ងៃទី២៨មីនា ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងវេទិកាវិនិយោគ FII Priority នៅទីក្រុង Miami រដ្ឋ Florida កាលពីថ្ងៃទី២៧មីនា លោក ត្រាំ បានធានាដល់​អ្នកចូលរួម​ថា យោធាអាមេរិកកំពុងសម្រេចបាននូវវត្ថុ​បំណងយោធារបស់ខ្លួន នៅក្នុងសង្គ្រាមរយៈពេលបួនសប្តាហ៍ប្រឆាំងនឹងអ៊ីរ៉ង់។ ទីក្រុងតេហេរ៉ង់ «ជិតដល់ថ្ងៃ​បរាជ័យ» ដោយលោកជឿថា ​ការគ្រប់គ្រងយោធា និងកម្មវិធី​នុ​​យក្លេអ៊ែររបស់អ៊ីរ៉ង់ បានរងការខាតបង់សម្បើមណាស់​។

លោកបានថ្លែង បន្ថែមទៀតថា៖​«ពួកគេត្រូវតែបើក ច្រកសមុទ្រត្រាំ ខ្ញុំចង់មានន័យថាច្រក Hormuz។ សូមអភ័យទោស ខ្ញុំសុំទោស! វាជាកំហុសដ៏គួរឲ្យភ័យខ្លាចមួយ» ដែលភ្លាមៗនោះបានបង្កឲ្យមានសំណើចពី​អ្នកចូលរួម​​ជន នៅក្នុងក្រុមអ្នកស្តាប់នៅចំពោះមុខប្រធានាធិបតីអាមេរិក។

មេដឹកនាំអាមេរិកបានព្យាករណ៍ថា ប្រព័ន្ធផ្សព្វផ្សាយនឹងកេងចំណេញពីសេចក្តីថ្លែងការណ៍មួយនេះ។ ទោះជាយ៉ាងណាក៏ដោយ លោកក៏បានសង្កត់ធ្ងន់ផងដែរថា សម្រាប់ខ្លួនលោក «គ្មានអ្វីចៃដន្យទេ» អ្វីដែលលោកនិយាយ និងធ្វើភាគច្រើន គឺសុទ្ធតែជាចេតនាទាំងអស់។

ច្រកសមុទ្រហ័រមូស គឺជាចំណុចកណ្តាលនៃជម្លោះរវាងអាមេរិក និងអ៊ីស្រាអែល និងអ៊ីរ៉ង់ចាប់តាំងពីថ្ងៃទី ២៨ ខែកុម្ភៈ។ ផ្លូវសមុទ្រដែលដឹកជញ្ជូនប្រេង ២០% នៃការផ្គត់ផ្គង់ប្រេងរបស់ពិភពលោក ត្រូវបានរារាំងដោយអ៊ីរ៉ង់ ដើម្បីឆ្លើយតបទៅនឹងសត្រូវ ខណៈដែលអរិភាពរវាងភាគីទាំងពីរកាន់តែកើនឡើង។

យ៉ាងណា ការប្រយុទ្ធគ្នាបានបន្តអស់រយៈពេល ៤ សប្តាហ៍មកហើយ ហើយមិនបង្ហាញសញ្ញានៃការថមថយឡើយ។ រដ្ឋមន្ត្រីការបរទេស G7 បានចេញសេចក្តីថ្លែងការណ៍រួមមួយ បន្ទាប់ពីកិច្ចប្រជុំមួយនៅប្រទេសបារាំង កាលពីថ្ងៃទី ២៧មីនា ដោយអំពាវនាវឲ្យបញ្ឈប់ការវាយប្រហារទាំងអស់លើជនស៊ីវិលជាបន្ទាន់ និងទាមទារឲ្យអ៊ីរ៉ង់ស្តារសេរីភាពនៃការធ្វើនាវាចរណ៍ឡើងវិញយ៉ាងឆាប់រហ័សនៅក្នុងច្រកសមុទ្រហ័រមូស៕

អត្ថបទ៖ សាង ស្រីល័ក្ខ