បញ្ចប់ពិធីបុណ្យសែននំព្រះខែយប់មិញ អ្នកក្រុង ហាណូយ ប្រមូលផ្ដុំគ្នាស្ទះពេញផ្លូវ មិនខ្លាចផ្ទុះឆ្លងកូវីដ

មនុស្សម្នា និងយានយន្តយ៉ាងច្រើនកកកុញបានប្រមូលផ្តុំតាមដងផ្លូវនៅកណ្តាលទីក្រុងហាណូយ ដើម្បីប្រារព្ធពិធីបុណ្យពាក់កណ្តាលរដូវស្លឹកឈើជ្រុះ ឬបុណ្យសែននំព្រះខែកាលពីល្ងាចថ្ងៃអង្គារ ហើយវាក៏ជាថ្ងៃដំបូង បន្ទាប់ពីបទបញ្ជាគម្លាតសង្គមត្រូវបានបន្ធូរបន្ថយនៅក្នុងរដ្ឋធានី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុណ្យសែននំព្រះខែត្រូវបានគេសង្កេតឃើញនៅក្នុងប្រទេសអាស៊ីមួយចំនួន រួមមានវៀតណាម ចិន និងកូរ៉េខាងត្បូងនៅថ្ងៃទី ១៥ នៃខែទី ៨ តាមច័ន្ទគតិជារៀងរាល់ឆ្នាំ ។

ប៉ុន្តែសម្រាប់ពិធីបុណ្យសែននំព្រះខែនៅឆ្នាំនេះ ទីក្រុង និងខេត្តជាច្រើននៅក្នុងប្រទេសវៀតណាម រួមទាំងទីក្រុងហាណូយ នៅតែស្ថិតក្នុងការប្រកាន់ខ្ជាប់នូវវិធានការគម្លាតសង្គមយ៉ាងតឹងរ៉ឺង សម្រាប់ការប្រយុទ្ធប្រឆាំងនឹងជំងឺកូវីដ ១៩ ។

ទោះយ៉ាងណាក៏ដោយ ដោយសារទីក្រុងហាណូយបានបន្ថូរបន្ថយច្បាប់តឹងរ៉ឺងមួយចំនួន ពាក់ព័ន្ធនឹងកូវីដនៅមុនពេលរាត្រីនៃពិធីបុណ្យសែននំព្រះខែ មនុស្សម្នាយ៉ាងច្រើនកុះករបានធ្វើដំណើរទៅកណ្តាលទីក្រុង ដោយមើលទៅដូចជាការជួបជុំនៅឆ្នាំមុនៗ ។

ផ្លូវដែលនាំទៅដល់បឹង Hoan Kiem និងតំបន់ Old Quarter ដែលជាចំណុចសំខាន់នៃពិធីបុណ្យ មានការកកស្ទះចរាចរណ៍ ខណៈម៉ូតូ និងរថយន្តជាច្រើនបានប្រជ្រៀតធ្វើដំណើរលើផ្លូវតែមួយ ។

ទីក្រុងហាណូយដែលមានប្រជាជនចំនួន ៨ លាននាក់ បានកត់ត្រាករណីឆ្លងជំងឺកូវីដ ១៩ ក្នុងសហគមន៍ចំនួន ១២ ករណីកាលពីថ្ងៃអង្គារ ដោយបង្កើនករណីឆ្លងសរុប ចាប់តាំងពីរលកថ្មីនៃការចម្លងបានវាយប្រហារប្រទេសវៀតណាមនៅថ្ងៃទី ២៧ ខែមេសា ឡើងដល់ ៤,១៧៨ នាក់ ក្នុងនោះមានអ្នកស្លាប់ចំនួន ៤៥ នាក់ ។

ចំណែកពាក់ព័ន្ធនឹងការចាក់វ៉ាក់សាំងការពារជំងឺកូវីដ ១៩ វិញ មជ្ឈមណ្ឌលចាក់វ៉ាក់សាំងជាតិបានឲ្យដឹងថា បុគ្គលិកសុខាភិបាលបានចាក់វ៉ាក់សាំងការពារជំងឺកូវីដ ១៩ ជាង ៥.៧ លានដូសដល់ប្រជាជនក្នុងទីក្រុង ខណៈជាង ៧៤៧,០០០ នាក់បានចាក់ពេញ ២ ដូស ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ នៅ ហាណូយ អ្នកអត់ចាក់វ៉ាក់សាំង ត្រូវចុះហត្ថលេខាលើលិខិតស្នាមផ្លូវច្បាប់ ទទួលខុសត្រូវចំពោះការចម្លងរោគ