ប្រតិកម្ម​ក្រសួង​ការបរទេស៖ ​ស្ទើរ​គ្រប់ប្រទេសជុំវិញ​ពិភពលោក ការ​បង្កើតច្រកទ្វារអ៊ិនធឺណិត​ ជាឧបករណ៍​ដើម្បីបង្កើន​ចំណូលជាតិ​

នេះជាការបញ្ជាក់នៅក្នុង​សេចក្តី​បំភ្លឺរបស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ទាក់ទងការបង្កើតច្រកទ្វារអ៊ិនធឺណិតជាតិ ជាមួយគ្នានោះ អ្នកនាំពាក្យ​សម្តែង​ការ​ខកចិត្ត ចំពោះ​ការបន្តបកស្រាយខុស ពីប្រព័ន្ធផ្សព្វផ្សាយបរទេសមួយចំនួនអំពីគោលបំណង នៃ​ការបង្កើតច្រកទ្វារអ៊ិនធឺណិតជាតិនៅក្នុងប្រទេសកម្ពុជា បើទោះបីជាមានការពន្យល់ និងការបំភ្លឺជា​ច្រើនដង​ក្តី។

បើតាមអ្នកនាំពាក្យក្រសួងការបរទេស ​​ដើម្បីសម្រួល និងគ្រប់គ្រងការតភ្ជាប់អ៊ិនធឺណិត និងពង្រឹងសន្តិសុខជាតិ និងការប្រមូលពន្ធ ក៏ដូចជាថែរក្សាសណ្តាប់ធ្នាប់សង្គម និងការពារវប្បធម៌ជាតិ រាជរដ្ឋាភិបាល​​បានបង្កើតគណៈ កម្មាធិការអន្តរក្រសួងមួយនៅឆ្នាំ២០១៩ ស្តីពីការបង្កើតច្រកទ្វារអ៊ិនធឺណិតជាតិ ដើម្បីសិក្សា និងរិះរកវីធីសាស្រ្តនានា សម្រាប់ការបង្កើត​​យន្តការដ៏ចាំបាច់មួយនេះ ដែលគណៈកម្មាធិការនេះ ត្រូវបាន​បង្កើតឡើង​តាមរយៈក្រសួងប្រៃស​ណីយ៍ និងទូរគម​នាគមន៍ ដែលជាស្ថាប័នជំនាញ បាន​ចាប់ផ្តើមការសិក្សាទូលំទូលាយមួយអំពីគំរូហេដ្ឋារចនាសម្ព័ន្ធពីបណ្តាប្រទេសផ្សេងៗ​ នៅជុំវិញពិភពលោក និងបានពិនិត្យឃើញថា ប្រទេសស្ទើរតែទាំងអស់សុទ្ធតែមានច្រកទ្វារអ៊ិនធឺណិត និង​បទប្បញ្ញត្តិដោយឡែកពីគ្នា។

ក្រោយមក អនុក្រឹត្យស្តីពីច្រកទ្វារអ៊ិនធឺណិតជាតិ ដែលបានចុះហត្ថលេខានៅថ្ងៃទី ១៦ ខែកុម្ភៈ ឆ្នាំ២០២១ ត្រូវបានរៀបចំឡើងដោយតម្លាភាព ហើយការពិគ្រោះយោបល់នានាត្រូវបានធ្វើឡើងជាមួយអ្នកជំនាញជាច្រើននៅក្នុងវិស័យនេះ ប្រតិបត្តិករឯកជន និងស្ថាប័នពាក់ព័ន្ធនានា ជាច្រើនលើកច្រើនសា។ អ្នកនាំពាក្យបញ្ជាក់ថា “ការបង្កើតច្រកទ្វារ​អ៊ិន​ធឺណិតជាតិ ដែល​មានជាទូទៅស្ទើរគ្រប់ប្រទេសជុំវិញពិភពលោក ដើរតួជាឧបករណ៍មួយដ៏មានប្រសិទ្ធភាព ដើម្បីបង្កើនការប្រមូលចំណូលជាតិ ដោយឈរលើមូលដ្ឋាននៃការប្រកួតប្រជែងប្រក​បដោយតម្លាភាព សមភាព និងស្មោះត្រង់រវាងរដ្ឋ និងប្រតិបត្តិករទូរគមនាគមន៍។ លើសពីនេះ វារួមចំណែកដល់ការទប់ស្កាត់ឧក្រិដ្ឋកម្មតាមអ៊ិនធឺណិត ដូចជាការប្រើប្រាស់ដោយខុសច្បាប់នូវការតភ្ជាប់បណ្តាញឆ្លងដែន ការលេងល្បែងអនឡាញខុសច្បាប់ ការបោកប្រាស់តាម   អ៊ិន​ធឺណិតជាដើម។ យន្តការនេះមិនមានបទប្បញ្ញត្តិណាមួយដូចដែលត្រូវបានចោទប្រកាន់ថាអនុញ្ញាតឱ្យមានការប្រមូលទិន្នន័យរបស់អ្នកប្រើប្រាស់ និងការរឹតបន្តឹងសេរីភាពនៃការបញ្ចេញមតិនោះទេ”។

អ្នកនាំពាក្យក្រសួងការបរទេសបញ្ជាក់ដែរថា ​រដ្ឋាភិបាលនឹងរៀបចំដាច់ដោយឡែកនូវច្បាប់ ស្តីពីការការពារទិន្នន័យផ្ទាល់ខ្លួន នៅពេលដែល​សេចក្តី​ព្រាងច្បាប់ ស្តីពីសន្តិសុខតាមអ៊ីនធឺណិតត្រូវបានបញ្ចប់។

ចំពោះការចោទប្រកាន់​ថា ការបង្កើតច្រកទ្វារអ៊ិនធឺណិតជាតិ អនុញ្ញាត​ឱ្យ​អាជ្ញាធរកម្ពុជា​ត្រួតពិនិត្យ និង​តាម​ដាន​រាល់​សកម្មភាពតាមប្រព័ន្ធអ៊ិនធឺណិត ចាប់ និងរឹតបន្តឹងការប្រាស្រ័យទាក់​ទងនានាតាមប្រព័ន្ធឌីជីថល ព្រមទាំងប្រមូល រក្សាទុក និងចែករំលែកទិន្នន័យផ្ទាល់ខ្លួនរបស់អ្នកប្រើប្រាស់ បង្កើតហានិភ័យដល់សិទ្ធិសេរីភាពក្នុងការបញ្ចេញមតិ រួមទាំងសិទ្ធិក្នុងការស្វែងរក ទទួលបាន និងចែកចាយព័ត៌មាន និងគំនិតនានា ក៏ដូចជាសិទ្ធិឯកជនភាព គឺជាការចោទប្រកាន់ដោយគ្មានមូលដ្ឋាន។

ផ្ទុយ​ទៅ​វិញ រាជរដ្ឋាភិបាលគោរពសិទ្ធិ​ឯកជន​ភាព និងសេរីភាពក្នុង​​ការ​​បញ្ចេញ​មតិ​របស់បុគ្គល និង​ការពារទិន្នន័យ​ផ្ទាល់ខ្លួន ដែល​​​ទាំង​​អស់​​នេះ​ ​មាន​​​ចែង​​​ក្នុង​​​​​ច្បាប់ រដ្ឋធម្មនុញ្ញ សន្ធិសញ្ញាស្តីពីសិទ្ធិមនុស្សអន្តរជាតិ ដែលបានផ្តល់សច្ចាប័នរួច ក្រមរដ្ឋប្បវេណី ក្រមព្រហ្មទណ្ឌ និងច្បាប់ស្ដីពីទូរគមនាគមន៍៕​

អត្ថបទ៖ កោះកែវ